AtuartigukKikkut Meeqqat pillugit Siunnersuisoqatigiinniissappat?
2022-p aallartinnerani Meeqqat pillugit Siunnersuisoqatigiit nutaat pilersinneqassapput. Pisortanit oqartussat, kattuffiit aamma peqatigiiffiit Meeqqat pillugit Siunnersuisoqatigiinnut piukkunnartunik inassuteqarsinnaapput.
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Oqartussat, paaqqinniffiit aamma kattuffiit peqatigiiffiilluunniit inassuteqarsinnaatitaasut, Meeqqat pillugit Siunnersuisoqatigiinni, piffissami 2022-mit 2026-mut (pisortanit oqartussaneersut 2022-mit 2024-mut) atuuttussani ilaasortassanik maanna inassuteqarsinnaanngorput.
Meeqqat pillugit Siunnersuisoqatigiit ilaasortaraat sulianik ilisimasalittut toqqagaasut 6-it kiisalu Meeqqat Illersuisuat, taanna Meeqqat pillugit Siunnersuisoqatigiinni siulittaasuuvoq. Meeqqat pillugit Siunnersuisoqatigiit aamma Meeqqat Illersuisuat Naalakkersuisunit toqqarneqartarput.
Pisortanit oqartussat aamma kattuffiit, peqatigiiffiit il.il. inassuteqarsinnaatitaasut allattorsimaffiat ima suliaavoq, Kalaallit Nunaat tamakkerlugu Meeqqat pillugit Siunnersuisoqatigiinni sinniisuutitaqarnissamut periarfissaqarluni.
Meeqqat pillugit Siunnersuisoqatigiit ilaasortaraat sulianik ilisimasallit, meeqqanut suliassaqarfimmi iliuusissanik ineriartortitsinerni Meeqqat Illersuisuannut ikiuuttussaasut, meeqqanut tunngassutillit suulluunniit pillugit Meeqqat Illersuisuannut siunnersuisussaallutillu ilitsersuisussaasut aamma suliassaqarfinni piginnaasaqarfigisaminni ilisimasatik atorlugit ikiuuttussaasut. Meeqqat pillugit Siunnersuisoqatigiit ima katitigaassapput, meeqqat peroriartortarnerat ineriartornerallu, meeqqat atuartuunerat, meeqqat kulturikkut sunngiffimmilu sammisassaqartinnerat, meeqqat peqqissuunissaat, meeqqat inatsisitigut inissisimanerat pillugit aammalu meeqqanut immikkuullarissunik pisariaqartitsisunut tunngasunik annertuumik ilisimasaqartoqassalluni.
Meeqqat pillugit Siunnersuisoqatigiit allaffissornikkut sullinneqarnerat meeqqat pisinnaatitaaffiinut sullissivimmit MIO-mit isumagineqartarpoq.
Inassuteqarsinnaatitaasut allattorsimaffiat uani takuneqarsinnaavoq. Oqartussat, paaqqinniffiit aamma kattuffiit peqatigiiffiilluunniit inassuteqarsinnaatitaasut kisimik Meeqqat pillugit Siunnersuisoqatigiinni, piffissami 2022-mit 2024-mut atuuttussani ilaasortassanik inassutiginnissinnaapput.
Paasissutissat sukumiinerusut pillugit naalakkersuisup allattaa saaffigineqassaaq, uunga: Inûna Davidsen, e-mail: inda@nanoq.gl imaluunniit oqa. +299 25 78 54