Isukasiani piiaanissamut akuersissut utertinneqarpoq

Ingerlatseqatigiiffimmut London Mining Greenland A/S-imut piffissamut killigititanik sivitsueqqinniaratik Naalakkersuisut aalajangerput. Taamaattumik Kalaallit Nunaata kitaani Isukasiani piiaanissamut akuersissut utertinneqalerpoq.

Ulloq 23. oktober 2013 Kalaallit Nunaata kitaani Isukasiani sumiiffimmut piiaanissamut akuersissut Naalakkersuisut tunniuppaat. Piiaanissamut akuersissut saviminissamut tunngatinneqarpoq.

Maannakkut ukiut arfineq pingasut qaangiunneranni suliassaq aatsitassarsiorfinngorluni suli ineriartortinneqanngilaq.

Piiaanissamut akuersissutit allat assigalugit Isukasiani piiaanissamut akuersissummi piffissamut killigititat arlallit ilaatinneqarput. Ilaatigut piiaanissamut matusinissamullu pilersaarummik akuersissuteqarfigineqarnissamut piffissamut killigititaq aammalu piiaaneq qaqugu kingusinnerpaamik aallartissanersoq piffissamut killigititaq. Piffissamut killigititanut taakkununnga siunertaavoq suliassap siumut ingerlanissaata qulakkeernissaa. Taamaaliornermi ingerlatseqatigiiffiup pissusiviusuni aatsitassarsiornermi ingerlatanik suliaqarani, aatsitassarsiorfissami patsisissarsiorluni, allanik soqutiginnissinnaasunik sumiiffimmut mattusimanninnissaa pinngitsoorneqartussaavoq.

Isukasiani piiaanissamut akuersissummut pisinnaatitsissummik pigisaqartoq pingasoriarluni piffissamut killigititamut sivitsuiffigineqarsimavoq. Ingerlatseqatigiiffiup sisamassaannik qinnuteqarneranut atatillugu Naalakkersuisut itigartitsipput.

Suliassami maannamut piiaanissamut matusinissamullu pilersaarummut tunngatillugu siumut ingerlasoqannginnera kiisalu pisinnaatitsissummik pigisaqartup qularnaveeqqusiinermut kontumut akiliisimannginnera tunngavigalugu itigartitsinissaq pillugu aalajangiineq pivoq. Qularnaveeqqusiinermi saliinissamut naammattunik aningaasassaqarnissaq qulakkeerneqartussaavoq. Pisinnaatitsissummik pigisaqartoq arlaleriarluni nukingisaarneqaraluarluni qularnaveeqqusiinermut kontumut aningaasanik naammattunik akiliisimanngilaq.

Piiaanissamut akuersissummi maannakkut killigititat atuutiinnarnerat, piffissamut killigititap sivitsorneqannginnerata sunniutigisussaavaa. Piffissamut killigititat taakkua 2020-mi ukiup affaani kingullermi naapput. Taamaalilluni piffissamut killigititat naareerput, aammalu akuersissut maannakkut utertinneqartussanngorpoq. Utertitsinermut ilaatillugu pisinnaatitsissummik pigisaqartoq:

• Nunap sannaa pillugu paasissutissat nalunaarsukkat il.il. tamaasa Aatsitassanut oqartussamut nassiuttussaavai
• Qularnaveeqqusiinermut kontumut sinneruttut 1,5 mio. koruunit akilertussaavai
• Sumiiffimmi akuersissuteqarfiusumi inaarutaasumik saliisussaavoq

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:

Pisinnaatitsissummik pigisaqartup arlaleriarluni piffissamut killigititanik isumaqatigiissutigineqartunik naammassinninnginnera akuersaarsinnaanngilarput. Aamma pisinnaatitsissummik pigisaqartoq arlaleriarluni nukingisaarneqaraluarluni aningaasanik isumaqatigiissutigineqartunik toqqorsisimannginnera isiginngitsuusaaginnarsinnaanngilarput. Pisinnaatitsissummik pigisaqartup pisussaaffini naammassisinnaanngippagit, allat periarfissinneqartussaapput.

Tamanna Aatsitassanut ikummatissanullu inatsimmi tunngaviusumik tunngavissaatinneqarpoq.

Aatsitassarsiorfimmik ingerlatsineq pillugu pitsaasunik sinaakkutissiinissaq qulakkeerniarlugu aammalu suliassat siumut ingerlanissaat qulakkeerniarlugu aammalu nunatsinnut isertitaqartitsilernissamut, Aatsitassanut ikummatissanullu inatsimmi maleruagassat pilersinneqarput. Naalakkersuisut aatsitassarsiornerup ineriartortinneqarnera pimooruppaat aammalu suleqateqarnerit pimoorussiviunissaat kissaatigalugu.

Pisumi matumani London Mining-ip sumiiffigisaa utertitsereernerup kingorna allanit atorluarneqarnissaanut ammaanneqassaaq. Aallaqqaammut pisinnaatitsissutip pitsaasumik unneqqarissumillu utertinneqarnissaa Naalakkersuisut qulakkeerniarpaat.

Utertitsinissap ingiaqatigisaanik Aatsitassanut oqartussap maannakkut sumiiffiup qinnuteqartussanut nutaanut ammaateqqinnissaa piareersaleruttorpaa. Ammaaqqinneq tamanut ammasumik pissaaq.

Paasissutissanik annertunerusunik piniarnermi attaveqarfigineqassaaq Naalakkersuisoqarfimmi pisortaaneq Jørgen Hammeken-Holm joeh@nanoq.gl –mut allalluni imaluunniit oqarasuaammut 346846-mut sianernermi.