Aalisariutillit aappaagumut pisassiissutinut qinnuteqarsinnaapput

Aqutsiveqarfimmi Uummannami aalisariutillit qaleralinnik niuerutigineqarsinnaasunik pisassallit, ukioq manna pisassatik tamaasa nungullugit aalisarsimasut, aappaagumut pisassaminnik qinnuteqarlutik novembarip 15-iannit siumoortumik aalisalersinnaapput.

Aqutsiveqarfimmi Uummannami qinnuteqarsimasut akuerineqartullu aqutsiveqarfinnut allanut qaleralinnik aalisariartortariaqanngillat.

Siumoortumik aalisarniarlutik qinnuteqarniartut uunga allassinnaapput, Aalisarnermut Piniarnermullu Naalakkersuisoqarfik, e-mail: aalisa@nanoq.gl

Sukumiisumik paasisaqarusukkaanni Aalisarnermut Piniarnermullu Naalakkersuisoqarfimmut allattoqarsinnaavoq, e-mail: apn@nanoq.gl

Tusagassiuutinut nalunaarut qulaani pineqartoq erseqqissaataavoq, tusagassiuutinut nalunaarut ataani pineqartoq novembarip 12-anni 2021-mi nassiussaalluni.

Aalisariutit aqutsiveqarfimmi 47-mi tamani aalisarsinnaapput aamma ukiup tullianut siumoortumik pisassiissutinit aalisarsinnaapput

Aalisariutit 6 meterinik anginerit qaleralinnik niuerutigineqarsinnaasunik pisassallit (IOK) aqutsiveqarfimmi 47-mi; Uummannami, Upernavimmi aamma Qeqertarsuup Tunuani qaleralittassatik 47-mi tamani aalisarsinnaavaat.

Taamaasilluni aalisariutilik suli pisassalik, kisiannili pisassat aqutsiveqarfiit arlaanni nungussimappata, taava aqutsiveqarfinni allani marluusuni aalisariutip pisassaatini aqutsiveqarfimmi 47-mi arlaanni suli pisassaqarfiusumi aalisarsinnaavai.

Aalisarsinnaanermut pisassiissutillu pillugit nalunaarut §7 naapertorlugu pisassanik nunguutsisimasut aappaagumut pisassatik aalisarlugit ukioq taanna novembarip 15-iannit aallartissinnaavaat. Aalisarneqartussat ukiumut pisassaniit sipportumik aalisarsimagaanni ukiup tulliani pisassaniit ilanngaatigineqassaaq.

Siumoortumik pisassiissutinik aalisarniaraanni qinnuteqaat nassiunneqassaaq Aalisarnermut Piniarnermullu Naalakkersuisoqarfimmut, aalisa@nanoq.gl. Pisassat nuunneqartut aqutsiveqarfik Uummannami aalisarneqarsinnaapput.