AtuartigukKalaallit Nunaat Parisimi isumaqatigiissummut peqataalissaaq
Nassiussisuuvoq: Naalakkersuisut Siulittaasuata Naalakkersuisoqarfia
Ataasinngornermi oktobarip 25-anni Naalakkersuisut aalajangerput Kalaallit Nunaata Parisimi isumaqatigiissummut peqataannginnera atorunnaarsinneqassasoq. Tamanna pivoq qulaajaanerup nutaap takutimmagu Kalaallit Nunaat Danmarkip nammatassatut agguagarsiaanut peqataatinneqanngikkaluarluni CO2-millu aalajangersimasumik annikilliliinissamik pisussaaffilerneqanngikkaluarluni Parisimi isumaqatigiissummut peqataalersinnaanissaminut periarfissaqartoq. Taamaalillutik Naalakkersuisut Parisimi isumaqatigiissutip Kalaallit Nunaannut atuuttunngortinneqarnissaanut piareersaatit Inatsisartutigut aallarnissavaat.
”Tulluusimaarutigaara Naalakkersuisut Parisimi isumaqatigiissummut peqataalissallutik aalajangersinnaammata. Maanna danskit naalakkersuisui nalunaarfigisinnaalerpakka Parisimi isumaqatigiissummut peqataalernissap atortussanngortinneqarnissaanik sulineq Inatsisartunut tunniunneqarumaartoq. Nunat issittumiittut silap kissakkiartuinnarneranik malunnaateqarfiunerpaat ilagaat, Naalakkersuisuniillu isumaqarpugut akisussaaffiup ilaanik kivitseqataasariaqarluta.” Naalakkersuisut Siulittaasuat Múte Bourup Egede oqarpoq.
Parisimi isumaqatigiissut Naalagaaffiit Peqatigiit ataanni silap pissusia pillugu isumaqatigiissutaavoq pingaarnertut inatsisitigut pituttuisuusoq. Isumaqatigiissummut peqataasut tamarmik pisussaaffeqarput silap pissusia pillugu nunaminni anguniakkaminnik saqqummiussissallutik ataavartitsissallutillu.
CO2-mik aniatitsinerup annikillisinnissaanut Kalaallit Nunaat pisussaaffilerneqanngikkaluartoq Naalakkersuisut akisussaaqataarusupput nunarsuarmi silap pissusianut tunngatillugu ajornartorsiornerup akiorniarneqarnissaanut. Taamaattumik Naalakkersuisut aalajangersimapput Kalaallit Nunaanni uuliamik ujarlernermik misissueqqissaarneq unitsinneqassasoq, taarsiulluguli nukissiuutinik ataavartunik minguinnerusunik (erngup nukinganik isumalluuteqarneq il.il.) atuinermik nittarsaassinermillu siuarsaasoqassasoq.
Naalakkersuisut isumaqarput CO2-mik aniatitsinnginnerulernissamik piujuaannartitsisunillu mingutsitsinngitsunik nukissiuuteqalernissamik siunnerfeqarneq kalaallit nunaanni ataatsimoorluta qanoq iliuuseqarfigisariaqaripput. Siunissaq nukissiuutinik ataavartumik minguinnerusumik atuiffiuvoq, taamatullu ajunnginnermik angusaqarsinnaalluta. Kalaallit Nunaat pisariaqartitamiit annerusumik erngup nukinganik isumalluutissaqarpoq. Tamakku erngup nukinganik isumalluutit annertuut Kalaallit Nunaanni nunanilu tamalaani aningaasaliisartut, sarfamik akikitsumik ataavartumillu annertoorujussuarmik, assersuutigalugu qarasaasiaqarfinnut imaluunniit P2X-inik suliaqarnermut atorneqartussamik atorfissaqartitsisut, suleqatigalugit atorluarneqarsinnaapput.
Novembarimi nunarsuarmi siuttuusut Naalagaaffiit Peqatigiinni ukiumoortumik silap pissusia pillugu Glasgowimi ataatsimeersuartoqarnissaani katersuutissapput. Ataatsimeersuarnermi ujartorneqassaaq Naalagaaffiit Peqatigiinni silap pissusia pillugu isumaqatigiissummi Parisimilu isumaqatigiissummi anguniagaasuni suliniutit siuarsarnissaannut ilaasortaasut ataatsimoorlutik iliuuseqarnissaat. Silap pissusia pillugu ataatsimeersuarnerup Naalakkersuisut periarfississavai Parisimi isumaqatigiissummut tunngatillugu pisortatigoortumik aalajangernerup nunat tamalaat akornanni tusagassiisartunik malinnaavigineqarluni saqqummiunnissaanut.
Sukumiinerusumik paasisaqarusukkaanni attaveqarfissaq: Birita í Dali, Immikkut Siunnersorti, Nunanut Allanut Naalakkersuisoqarfik, e-mail: bida@nanoq.gl