Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

  4. Del link
🔈 Atuartiguk

Kalaallit Nunaat Imarpiup avannaata kangiani immami avatangiisinik mingutsitsinermut akiuiniarnissaq pillugu ministerit nalunaarutaannut ilannguppoq

Naalakkersuisut ministerit nalunaarutaannut ilanngunnermikkut, Naalakkersuisut uumasut assigiinngisitaarnerini annaasaqartarnermik unitsitsiniarluni ilorraallu tungaanut saatitsiniarluni, immami avatangiisinik mingutsitsisarnernik pinaveersaartitsiniarluni annikillisitsiniarlutillu, kiisalu silap pissusiata allannguutaasa kingunerinik unitsitsiniarluni taakkununngalu naleqqussaaniarluni suliniuteqarnerat erseqqissarpaat.

Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
OSPAR

Kalaallit Nunaat OSPAR-imi Ministerit Nalunaarutaannut 2021-mut ilannguppoq. OSPAR tassaavoq nunani tamalaani immami avatangiisit pillugit isumaqatigiissut, Imarpiup avannaata kangianut tamarmiusumut tunngassuteqartoq. Ministerit nalunaarutaat nunat uumasut assigiinngisitaarnerini annaasaqartarnermik (uumasunik naasunillu annaasaqartarnermik) unitsitsiniarlutik, immami avatangiisini mingutsitsinermik pinaveersaartitsiniarlutik annikillisitsiniarlutillu aammalu silap pissusiata allannguutaanik unitsitsiniarlutik naleqqussaaniarlutillu suliniuteqarnerinut nalunaarutinik arlalinnik imaqarpoq. Ministerit qaqqap immap naqqaniittup Evlanov-ip eqqaani sumiiffimmik immami avatangiisinik illersuiffiusussamik nutaamik toqqaaniarlutik aamma isumaqatigiipput. Taamaalilluni Imarpiup avannaata kangiata imartaani katillugit 10%-it illersugaalerput.
    - Naalakkersuisut piffissami qinigaaffiusumi matumani nunatsinni uumassusillit assigiinngissitaarnerinut periusissiaq siulleq suliarigamikku, nunarsuarmi pinngortitami anguniakkanik nutaanik sulissuteqarnissamut ilaalerput aamma plastikkinut iliuuseqarnissamut pilersaarusiorput, kiisalu erngup nukinga pillugu inatsisissatut siunnersuummik, nunatsinni nukissiuutinik ataavartunik atuinermik annertusititsinissamik siunertaqarfiusumik saqqummiussillutik. Taakku tamarmik Naalakkersuisut mingutsitsinnginnerusunik suliaqarnerisa inerneraat. Ministerit nalunaarutaannut ilaalernitsigut siunissamut piujuartitsiviusumut mingutsitsiviunnginnerusumullu alloriaqqippugut. Nunarsuarmi silap pissusiani avatangiisinilu unammilligassanik annertuunik suliaqarnialeraangatta, nunani tamalaani isumaqatigiittarnissarput suleqatigiilluartarnissarpullu pingaaruteqarpoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Nunatta ilaalernermigut plastikkinik igitanik, plastikkinik ataasiaannarluni atorneqartartunik aamma immami plastikkinik ikilisaanissamut imminut pisussaaffilerpoq, tamannalu Naalakkersuisut plastikkinik ataasiaannarluni atorneqartartunik atuinissamut kingusinnerpaamik 2023-mi inerteqquteqalernissaq pillugu nalunaarutaannut naapertuuppoq.
    - Naalakkersuisut nunanik allanik suleqateqarlutik pinngortitamik mingutsitsinnginnerulernissatsinnik qulakkeerinninniarput. Issittumi immami avatangiisit mingutsinneqarnissamut illersussavagut, taamaalilluni pinngortitami isumalluutit kinguaariinnit maanna inuusunit tulliuttussanillu annertunerpaamik iluaqutaasinnaassammata, Naalakkersuisoq Kalistat Lund oqarpoq.

Ministerit nalunaarutaanni nunat OSPAR-imut isumaqatigiissummut atsioqataasimasut ilaatigut Issittumi immami avatangiisit mingutsitsinermut, aammalu silap pissusiata allannguutaasa sunniutaannut illersornissaannut imminnut pisussaatipput. Tamanna ilaatigut suliniaqatigiiffiit allat, soorlu Issittumi Siunnersuisoqatigiit aamma FN-imi Nunani Tamalaani Imarsiornermut Suliniaqatigiiffik IMO suleqatigalugit ingerlanneqassaaq.

OSPAR-imi Ministerit Nalunaarutaa 2021 atuarneqarsinnaavoq, uani.

OSPAR-imi suliassaqarfik atuarneqarneqarsinnaavoq, uani

Paasissutissat
OSPAR-imi Ministerit Nalunaarutaat 2021 politikkikkut siunnerfinnut nalunaarutaavoq.
OSPAR (Oslo-Paris) immamik aammalu immami uumassusillit assigiinngisitaarnerinik illersuinissamik sulissuteqarpoq. OSPAR-imi suliassat inassuteqaatit inatsisitigullu pituttuiffiusumik isumaqatigiissutit arlallit aqqutigalugit aalajangersarneqartarput.

OSPAR-imut isumaqatigiissummi Imarpiup avannaata kangiani immami avatangiisit illersorniarneqarput. Isumaqatigiissutip atuuffii tassaapput Imarpik aamma kujataani Gibraltarimiit Qalasersuarmut Avannarlermut aammalu kangiani nunatta kangianiit Kattekat-imut Issittumi imartaq. Sumiiffik pineqartoq annertoorujussuuvoq, taakkununngalu nunat imartaat, inunnit sammisaqarfiusunik eqiteruffiungaatsiartut aammalu nunap inatsiseqarfiisa avataanni imartat annertuut ilaapput.

Attaveqarfissaq
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476/529844-mut imaluunniit e-mailit: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.