AtuartigukAngerlarsimaffeqanngitsut oqallittarfiat siullermeerluni ingerlanneqarpoq - aallartilluarlunilu
Nuna tamakkerlugu angerlarsimaffeqanngitsut pillugit oqallittarfimmi pilersinneqaqqammersumi ataatsimiinneq siulleq ingerlanneqarpoq. Ataatsimiinnermi angerlarsimaffeqanngitsut pillugit suliassaqarfiit akimorlugit aaqqiissutissanik assigiinngitsorpassuarnik ataatsimiinnermi apuussisoqarpoq.
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Isumaginninnermut Suliffeqarnermullu Naalakkersuisoq Mimi Karlsen ulloq 23. august nuna tamakkerlugu angerlarsimaffeqanngitsut oqallittarfiannut pilersinneqaqqammersumut ataatsimiigiaqqusivoq. Ataatsimiinneq amerlasuunit najuuffigineqartumi siunertarineqarpoq suleriaqqinnissami misilittakkat kissaatillu paarlaassoqatigiinnissaat.
Isumaginninnermut Suliffeqarnermullu Naalakkersuisoq Mimi Karlsen ima oqaaseqarpoq ”Peqataasut tamarmik soqutiginnilluarput akuulluarlutillu, aamma angerlarsimaffeqannginneq pillugu ajornartorsiutit qaangerniagassallu amerlasuut saqqummiunneqarlutik. Maannakkut suliassarilerparput peqatigiilluta, innuttaasunut eqqugaasunut aammalu angerlarsimaffeqannginnermik eqqugaasunut ikiorsiissutaasinnaasut, aaqqiissutissat tigussaasut oqaloqatigiissutiginissaat sulissutiginissaallu”.
Nuna tamakkerlugu angerlarsimaffeqanngitsut oqallittarfianni ataatsimiinneq tulleq pissaaq ulloq 1. december 2021-mi. Ataatsimiinnerup tulliani Housing First, kommunini arlalinni atorneqalereersimasoq, pingaarnertut sammineqassaaq.
Isumaginninnermut Suliffeqarnermut Naalakkersuisoq Mimi Karlsen ima oqaaseqarpoq ”Angerlarsimaffeqanngitsuuneq pillugu oqalittarfiup nukittoqutigaa ulluinnarni angerlarsimaffeqanginneq pillugu aalajangersimasumik suliaqartut amerlasuut sinniisorineqarmata. Siunnersuutitsialaat isumassarsiatsialaallu saqqummiunneqartut tusarnaassavakka nalilersorlugulu qanoq innuttaasutsinnut tigussaasumik aaqqiissutissat timitalerniarnerlugit. Tullissaanik ataatsimiinnissaq qilanaarilereerpara”.
Angerlarsimaffeqannginneq pillugu oqalittarfimmi, angerlarsimaffeqannginnermik eqqugaasimasunik imaluunniit innuttaasunik eqqorneqaqqajaasunik suliaqartut, qitiusumik sulisut akuupput. Oqallittarfimmi kommuninit, A/S INI-mit, politiinit, Peqqinnissaqarfimmit, Allorfimmit, Kofoeds Skolemit, Pinerluuteqarsimasunut Isumaginnittoqarfimmit, Isumaginninnermut Aqutsisoqarfimmit aammalu Namminersorlutik Oqartussani pisortaqarfinnit arlalinnit peqataaffigineqarpoq. Ataatsiminnermi siullermi 28-it peqataapput.
Sukumiinerusumik paasissussanik pissarsiniartoqarpat naalakkersuisumut allatsi Naja Lynge Petersen e-mail: nlyp@nanoq.gl imaluunniit oqarasuaat +299 34 56 11 aqqutigalugu attavigineqarsinnaavoq.