AtuartigukGreenlandic Greenhouse 2021-mi Nunani Avannarlerni Siunnersuisoqatigiinnit Avatangiisinut Nersornaaserneqartussatut innersuunneqarpoq
Avatangiisinut suliniutit Nunani Avannarlerni tamarmeersut pissaganartorpassuit nutaaliorfiusorpassuillu akornanni Greenlandic Greenhouse ingerlaqqippoq. Avatangiisinut suliniutit katillugit 8-t 2021-mi Nunani Avannarlerni Siunnersuisoqatigiinnit Avatangiisinut Nersornaat pillugit naggataatigut anngunniunnermi ilaatinneqarput. Ukioq manna nungusaataanngitsumik inuussutissalerineq qulequtarineqarpoq. Naggataatigut ajutaasoq ulloq 2. november 2021 toqqarneqassaaq.
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Greenlandic Greenhouse illup iluani naatitsivimmi naatitanik naatitsisarpoq, tassani salatit allallu naatitat aamma naasut mamarsaatissat Kalaallit Nunaataa kitaani illoqarfinnut arlalinnut tunisassiarisarlugit.
Taama nillertigisumiittuni naatitanik naatsitsisoqarsinnaanera Issittumi pissutsini asseqanngilluinnarpoq. Tamanna naatitanik issumik atuinani, kisianni imermi inuussutissartaqarluartumik atuilluni, nutaaliorluni periaaseq atorlugu iluatsissimavoq. Naasut qaqqortariarsuit kokosit sinnikuiniipput, aammalu naatitanik tunisassiornermiit sinnikut najukkani uumasut nerisassaattut atorneqarsinnaapput aammalu siunissami aamma ungasianiit kiassarnermut atorneqarsinnaassallutik.
Tunisassiorneq Nuummi ingerlanneqarpoq aammalu naatitsiviup kiassarneqarnera Nuummi ikuallaavimmi kissaq atorneqanngitsoq atorlugu ingerlanneqarpoq kiisalu najukkami erngup nukinganik nukissiorfimmiit sarfalersorneqarluni. Taamaalilluni naatitanik tunisassiorneq avatangiisinut mingutsitsinngilaq.
- Greenland Greenhouse ingerlaqqimmat nuannaarutigaara. Tamanna pissusissamisoortumik naleqquppoq. Inuusuttut aallarnisaasut pingasut Nicklas Birkely, Rasmus Damsgaard aamma Charlie Brandt, annertuumik tunniusimallutik, naammagittarsinnaassuseqarlutik nutaaliorlutillu suliniut aallartissimavaat, naatitanik najukkami naatinneqartunik tunisassianik imminut pilersornissamut iluaqutaasumik aammalu najukkami akisussaaqataanissamik qulakkeerisumik. Tamanna kusanartorujussuuvoq aammalu neriuutigaara tamanna nunatsinni maani aammalu Nunani Avannarlerni tamaginni allat isumassarsiorfigisinnaassagaat, oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund.
Kalaallit Nunaata sinneranut tunisassiornini aammalu suliassaqarfiit allat iluanni, soorlu qeqqussat, annertusitinniarlugu, suliffeqarfik annertuunik pilersaaruteqarpoq. Periaaseq Nunani Avannarlerni tamaginni isumassarsiortitseqataasinnaavoq, tassani isorliunerusut amerlasuut taamatut ilusilimmik iluaqutaasumik naatitsisalersinnaassallutik.
Greenlandic Greenhouse 2021-mi Nunani Avannarlerni Siunnersuisoqatigiinnit Avatangiisinut Nersornaammut innersuunneqarpoq, tassani ukioq manna qulequtarineqarluni Nungusaataanngitsumik inuussutissalerineq. Avatangiisinut nersornaammut ajugaasoq, Nunani Avannarlerni Siunnersuisoqatigiit Københavnimi ataatsimiinnerannut atatillugu ulloq 2. november 2021 tamanut saqqummiunneqassaaq. Nersornaat 300.000 danskit koruuniinik aningaasartaqarpoq.
2021-mi Nunani Avannarlerni Siunnersuisoqatigiinnit Avatangiisinut Nersornaammut 8-t innersuunneqarput. Innersuunneqartut pillugit annertunerusut atuakkit Nunani Avannarlerni Siunnersuisooqatigiit nittartagaanni.
Paasissutissanik annertunerusunik piniarnermi, attaveqarfigineqassaaq immikkoortortaqarfimmi pisortaq Paninnguaq Kristiansen pcni@nanoq.gl oqarasuaat 345416