Naalakkersuisup nunatsinni assammik arsartartut nunanut allanut unammisartuisa VM-imut anngunniunneranni angusaat tulluusimaarutigaa

Ilinniartitaanermut, Kultureqarnermut, Timersornermut Ilageeqarnermullu Naalakkersuisup nunanut allanut unammisartut takutitsilluarnerat tulluusimaarutigaa. Nunanut allanut unammisartut Amerikami Avannarlermiut Caribiamiullu nunarsuatsinni VM-imi unammersuarnissamut anngunniunneranni nuna tamarmi illersuivoq, Naalakkersuisullu nunanut allanut unammisartut siunissagissaarnerat takuaa.

Naalakkersuisut sinnerlugit Peter P. Olsenip nunarput sinnerlugu assammik arsartartut nunanut allanut unammisartut, sungiusaasut aamma allat peqataasut tiguarteqqanartumik anngunniunnerat qutsavigai.

”Unammisartutta unammiuaarnermi takutitsilluarnerat tulluusimaarutigeqaara. Assammik arsartartoqatigiit ilungersorlutik anguniakkaminnik ilungersuuteqartut ataqatigiilluartullu isiginnaarlugit Timersornermut Naalakkersuisutut tiguartinnarlunilu isumassanik tunioraasuuvoq. Naak VM-imut anngutinngikkaluartugut unammisartutta ulluinnagut kivittuusivaat, pikkunartumik unammersuarnerat malinnaavigaarput. Naalakkersuisut pingaartippaat meerartatta inuusuttortattalu maligassiuisunik nuannaartorisaqarnissaat, unammisartugullu, inuusuttunik arlaqartunik arsartullit, maligassiuilluarput. Imminnut tulluusimaarutigisinnaapput.” Naalakkersuisoq Peter P. Olsen qungujulalluni taama oqarpoq, nangillunilu: ”Unammisartugut uannut Naalakkersuisunullu kajumilersitsipput nunatta peqqissunik tunngavilinnik ingerlanneqarnissaanut, ataatsimoorlutalu anguniagaqarnissatsinnik nunarsuarmiuni timimik atuilluarnerpaajunissatsinnik suliniaqataanissatsinnik.
Qilanaaraarput piffissami aggersumi nunarput sinnerlugu assammik arsarnermi unammisartutta malinnaaviginissaannut.”

Naalakkersuisut nunarput sinnerlugu assammik arsartartut angerlamut ingerlalluarnissaannik siunissamillu pitsaasumik kissaappaat.