Aalisariutit pisassaannit umiatsiaararsortunut qaleralittassiissutinik aqutsiveqarfik 47-mi nuussisoqassaaq

Aalisarnermut akuersissutinut pisassiissutinullu nalunaarut nutaaq naapertorlugu aalisariutinit aqutsiveqarfimmi 47-mut, Qeqertarsuup Tunuanut, Upernavimmut aamma Uummannamut, qaleralittassiissutigineqartut tamakkerneqarsimanngippata, qaleralit­ta­rineqartut juunip 30-anni nalunaarutigineqareerpata, umiatsiaararsortunut nuunne­qar­lutik qaleralittassiissutigineqarsinnaapput.

Aqutsiveqarfik 47-mi, Qeqertarsuup Tunuani, Upernavimmi aamma Uummannami, aalisariutinut 6 meterinik anginernik qaleralinniartunut malittarisassaq tassaavoq qaleralittassiissutit nammineq pigisat tunineqarsinnaallutik.

Qaleralittassiissutit nammineq pigisat tunineqarsinnaasut atorluarnissaat qulakkeerumallugu, ukiumut pisassiissutit ukiumit ukiumut nuussinnaasunngorlugit periarfissaalerpoq.

Taamaalilluni qaleralinniarsinnaanermut akuersissuteqartut, pisariaqartitsisoqarpat, ukiup tullissaani pisassiissutit ilaannik novembarip 15-iata kingorna qaleralinniarsinnaapput. Aamma ukiumut pisassiissutit aalisarneqanngitsoortut ukiup tulliani juunip 30-at naallertinnagu aalisarneqarsinnaallutik.

Qalerallit juunip 30-at nallertinnagu aalisarneqarsimalereerpata ukiup siuliani pisassatut isigineqassapput. Periuserineqartoq nuussinertut pineqartarpoq.

Aalisarnermut akuersissutit pisassiissutillu pillugit nalunaarut nutaaq januaarip aallaqqaataani 2021-mi atulerpoq. Naalakkersuisut periarfissarilerpaat aalisariutit ukiumut pisassaat tamakkersimanngippatigit pisassiissutitut agguaqqissinnaallugit.

Naalakkersuisut aalisarneqarsimanngitsut umiatsiararsortunut nuussinnaavaat, tamanna pisat nalunaarutigineqareerpata pisinnaalluni. Pisariaqartitsisoqarpat Naalakkersuisut aamma aalajangersinnaapput, taakku aalisariutinit aalisarneqarsinnaassasut.

Aalisarneqanngitsuukkanik umiatsiaaqqanut nuussineq
Aqutsiveqarfimmi 47-mi aalisariutit 2020-mi aalisanngitsuugaat qanittukkut naatsorsorneqarput, takuneqarsinnaavorlu 3.058 tonsit aalisarneqarsimanngitsut.

Naalakkersuisut ullormi naatsorsuiffiusumi aqutsiveqarfimmi 47-mi umiatsiararsortunut nuullugit ima amerlatigisut sumiiffinnut ukununnga pisassanngortippaat:

Qeqertarsuup Tunuani: 1.896 tonsit
Upernavimmi: 397 tonsit
Uummannami: 474 tonsit

Qalerallit qaammatikkaarlugit pisassiissutaasarmata, pisarinngitsuukkat ukiup qaammataasa sinnerinut sumiiffinnut agguarneqassapput.

Pisassiissutinit sinneruttut sillimmatitut pineqassapput. 2021-imi qaleralittassiissutit ilaneqaqqissanngillat.

Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl