AtuartigukIslandip Kulusuullu akornanni timmisartuussinerit aallarteqqipput
Nassiussisuuvoq: Peqqissutsimut Naalakkersuisoqarfik
Ukioq ataaseq sinnerlugu matoqqareerluta maanna Islandip Kulusuullu akornanni toqqaannartumik timmisartuussisoqarsinnaalerpoq. Ippassaq Naalakkersuisut aalajangerput, inuit Islandimiit tikissinnaasut amerliniarlugit, taamaalillunilu maanna nunatta Islandillu akornanni sapaatit akunnerannut katillugit arfinileriarluni timmisartuussisoqarsinnaalerpoq. Timmisartuussinernit taakkunannga pingasut Kitaanut ingerlasassapput aammalu pingasut kangianut ingerlasassallutik. Sapaatit akunnerannut inuit katillugit 180-it Islandimiit nunatsinnut timmisartuunneqarsinnaalissapput.
”Tasiilami inuussutissarsiutinik ingerlataqartut sivisuumik Islandimut timmisartuussinerit ammaanneqaqqinnissaat kissaatigisimavaat. Takornariaqarneq illoqarfimmi suliassaqartitsinermut ineriartortitsinermullu pingaaruteqartorujussuuvoq. Taamaattumik Naalakkersuisut kissaatigineqartumik naammassinnissinnaalernerat nuannaarutigaara,” Peqqissutsimut Naalakkersuisoq Kirsten Fencker oqarpoq.
Kangianut tikittussanut tikinnermut piumasaqaatit nalinginnaasut atuutissapput. Tassalu ilaasut tamarmik immersugassamik Sumut-mik immersuisimassapput nassiussisimassallutillu, nunat avannarliit ilaanni PCR-test-imik tunillatsissimannginnermut uppernarsaammik, sivisunerpaamik nalunaaquttap akunnerinik 48-nik pisoqaassuseqartumik takutitsisinnaassapput aammalu ilaasut 18-inik ukiullit utooqqaanerusulluunniit nunatsinni najugaqavissuunngikkunik timmisartumut ikiniarnerminni tamakkiisumik kapitissimassapput.