AtuartigukTunillatsissimasut arfineq pingasut nutaat aamma meeraaqqerivimmik matusineq
Nassiussisuuvoq: Peqqissutsimut Naalakkersuisoqarfik
Pingasunngorneq unnukkut juulip 28-anni tunillatsissimasut nutaat arfineq pingasut paasineqarput. Upernavimmi ataaseq sinnerilu arfineq marluk Aasianni. Aasianni meeraaqqerivik nalunartut pillugit matuneqarpoq.
Upernavik
Tunillatsissimasoq tunillatsissimasunut ilisimaneqareersunut qanittumik attaveqarsimavoq, taamaammallu misissuisoqarnerani angerlarsimaannartooreerluni. Tunillanneqarsimasoq taanna maanna mattusimalereerpoq.
Aasiaat
Aasianni arfineq marluusuni tallimat inoqutigiinni ataatsineersuupput. Nukarlequtaat unnuaq aatsaat ersiuteqalersimammat ippassaq meeraaqqerivimmiissimavoq. Taamaattumik nalunartut pillugit kommune attavigineqarsimavoq, meeraaqqeriviup matuneqarnissaa kiisalu pisut pillugit meeraaqqerivimmiittuutillit angajoqqaat ilisimatinneqarnissaat qulakkeerniarlugu.
Tuniluunnerup paasiniarnera
Upernavimmi Aasiannilu nutaanik tunillatsittoqarsimaneranut atatillugu tunillatsissimasut tamakkerlutik angerlarsimallutik mattusimatinneqalereerput tuniluunnerullu aallaavia paasiniarneqalereerluni. Tunillatsissimasunik qanimut attaveqarsimasut tamarmik Corona pillugu allatseqarfimmiit sianerfigineqarumaarput, ullunilu arfineq marlunni angerlarsimaannarnissaannik peqquneqarlutik, ullullu arfineq marluk qaangiunneranni misissorteqquneqarlutik.
Qanimut attaveqarsimasut attaveqarnerminniit ullut 14-it tikillugit COVID-19-imut ersiuteqalernerlutik eqqumaffigeqqissaassavaat. Ullut arfineq marlussaanni misissortinnermi tunillatsissimanngitsutut inerneqaraluarpalluunniit mianersornissaq suli atuutissaaq, ersiuteqalernerlunilu eqqumaffigalugu.
Eqqaamajuk
Killilimmik angalaarnissamik aamma qanimut attaveqarnerit sapinngisamik ikittuinnaatinneqarnissaannik kikkulluunniit kaammattorneqarput Peqatigitillugu kikkut tamarmik ersiutaasinnaasunik eqqumaffiginninnissaat kaammattuutigineqarpoq, nalinginnaasumillu siunnersuutit eqqaamallugit:
- Ersiuteqaruit tunillatsissimasumilluunniit qanimut attaveqarsimaguit angerlarsimaannarit aamma misissortigit
- Errortukulagit assanulluunniit bakteriaajaat (håndsprit) atortaruk.
- Tangajoruit quersoruilluunniit talinnik asseruk.
- Allanut qanittumik attaveqarnaveersaarit
- Eqqiluisaarneq silaannarissaaneq eqqumaffigiuk - angerlarsimaffimmi aammali suliffinni
- Qanillinaveersaarit allallu taamatut ilioqqullugit.