Tuttunniarnissamut umimmanniarnissamullu piffissaliussat pisassiissutillu – Aasaanerani aamma Ukiaanerani 2021

Matumuuna aasaanerani ukiaaneranilu 2021-imi piffissaliussat piniarfiusussat, tuttutassiissutit kiisalu umimmattassiissutit aalajangerneqartut nalunaarutigineqarput. Tuttunik aamma umimmannik ukiup qanoq ilinera najoqqutaralugu piniarnikkut pitsaanerpaamik atorluaanissaq APN-miit pingaartinneqarpoq. Taamaammat neqit, ammit, qiviut allallu pitsaanerpaamik atorluarnissaat pillugu tuttut sapinngisamik aasaanerani ukiaaneranilu piniarneqartarnissaat umimmaallu aasaanerani, ukiaanerani kiisalu ukiuunerani piniarneqartarnissaat anguniarneqartarpoq.

Piniarfik 2-mi – Sisimiut-Kangerlussuaq – ukiuni arfineq-pingasuni kisitsisoqarnikuunani Martsimi 2018-mi Pinngortitaleriffimmiit tuttunik umimmannillu pisortatigoortumik kisitsisoqarpoq. Piniarfik 3-mi – Akia-Maniitsoq – ukiuni qulinngiluani kisitsisoqarnikuunani Martsimi 2019-mi aamma taamatut kisitsisoqarpoq taamatullu Piniarfik 4-mi – Ameralik – ukiuni arfineq-marlunni kisitsisoqarnikuunani kisitsisoqarluni. Kisitsinerit tunngavigalugit siorna Pinngortitaleriffimmiit nutaamik siunnersuisoqarpoq, tassanilu piniarfinni annerpaanni tuttunniarnerup sivitsorneqarnissaa ilaatigut inassutigineqarluni. Taamaakkaluartoq piniartut ilisimasaat tunngavigalugu siornamut naleqqiullugu annikitsunik allannguuteqartoqarpoq.

Ivittuuni umimmannik minnerpaaffiliinermik kisitsineq Apriilimi 2021-mi ingerlanneqartussatut pilersaarutigineqartoq aputip aqippallaarnera peqqutigalugu ingerlanneqarsinnaa-simanngilaq, kisiannili Juunimi 2021-mi ingerlanneqarsimalluni. Kisitsineq taanna tunngavigalugu Ivittuunut umimmattassanik aamma piniarnissamut piffissaliussamik aalajangiisoqarpoq.

Tuttut

1. Piniarfik 2, 3 aamma 4: Inuussutissarsiutigalugu tuttunniarneq 1. Augusti-mi aallartissaaq 31. Decembari ilanngullugu ingerlassalluni. Sunngiffimmi tuttunniarneq 1. August-mi aallartissaaq 31. Oktobari ilanngullugu ingerlassalluni. Kulavaat norrallit norraat ilanngullugit Piniarfik 2-mi piniaqqusaanngillat.
2. Piniarfik 1, 5, 6, 7, 8 aamma 11: Inuussutissarsiutigalugu tuttunniarneq 1. August-mi aallartissaaq 15. Oktobari ilanngullugu ingerlassalluni. Sunngiffimmi tuttunniarneq 1. August-mi aallartissaaq 30. Septembari ilanngullugu ingerlassalluni. Kulavaat norrallit norraat ilanngullugit piniaqqusaanngillat.
3. Piniarfik 9 aamma 10 (Kangerluarsorujuk, Nuna Prudhoe aamma Nuna Inglefield): Inuussutissarsiutigalugu aamma sunngiffimmi tuttunniarneq 1. Augusti-mi aallartissaaq 31. Decembari ilanngullugu ingerlassalluni. Kulavaat norrallit norraat ilanngullugit piniaqqusaanngillat.
4. Piniarfiit tamarmik: Tuttut angutivissat oktobarimi nuliunerup nalaani tippassinnaasut tuttunniarnermi ileqqorissaarnissaq pillugu piniaqqusaanngillat.

Tunngavilersuutit: Piniartut ilisimasaat malillugu Piniarfik 5-mi Qeqertarsuatsiaani tuttut Piniarfik 2-mi, Piniarfik 3-mi aamma Piniarfik 4-mi tuttunut sanilliullugit ikinnerupput taamaammat piniarfimmi pineqartumi ukiuni kingullerni marlunni ingerlanneqartup tuttunniarnermik sivitsuinerup unitsinneqarnissaa aalajangerneqarpoq.
Piniarfinni arlalinni tuttut angutivissat tippalernikut pisarineqartut qimaannarneqartartunik arlalissuarnik naammattuisoqartarnera pillugu piniartut ilisimasaat malillugu tuttut angutivissat oktobarimi nuliunerup nalaani tippassinnaasut piniaqqusaannginnissaat aalajangerneqarpoq. Taamaammat inuussutissarsiutigalugu imaluunniit sunngiffimmi piniartut ataasiakkaat naliliisariaqassapput, tuttulu angutiviaq tippanersoq imaluunniit tippannginnersoq pillugu nalornisoqarpat, taava sussa aallaanagu.

Ilisimatitsissut: Nuup aqutsiveqarfiani 2020-mi tuttunniarnissamut akuersissutit 3.263-it inuussutissarsiutigalugu aamma sunngiffimmi piniartunut tunniunneqarput kisianni taamaallaat 1.442-it pisanik nalunaarutitalimmik utertinneqarlutik, tassalu affaannaalluunniit inorlugit. Taamatut inissisimasoqarnera naammaginanngilluinnarpoq tamannalu pillugu tuttoqatigiit piniarfinni qanoq sakkortutigisumik piniarneqartarnerat qanorlu innerat APN-mut Pinngortitaleriffimmullu nalileruminaappoq. Pisanik nalunaaruteqarneq inatsisitigut pisussaassutaammat pisanik nalunaaruteqartanngitsunut kinguneqartitsisinnaaneq APN-mi inatsisinik sukaterinikkut sulissutigineqarpoq. Ilutigalugu APN digitalimik Piniarneq-App-mik suliaqarpoq, tamannalu pillugu mobiilikkut pisanik nalunaaruteqarnissaq ukiuni aggersuni periarfissaalissaaq.

Erseqqissaatit: Erseqqissaatigineqarpoq kommunimiit tuttunniarnissamut akuersissutit piniarfikkaartumik ataasiakkaarlugit tunniunneqartassasut, tamannalu inuussutissarsiutigalugu (akuersissummut tuttut qulit) aamma sunngiffimmi piniartunut (akuersissummut tuttut tallimat) siorna 2020-mi kommunit nalunaarsuinerat malillugu akuersissutinik utertitsinikkut pisanik nalunaaruteqarsimanngitsunut tamanut atuuppoq. Kommunit nalunaarsuinerat malillugu taamatut inissisimasut aatsaat akuersissummik pisanik naammaginartumik immersorneqartumik utertitsinikkut akuersissummik nutaamik qinnuteqarsinnaassapput. APN-ip kommunit qanimut suleqatigalugit akuersissutinik tunniussisarneq utertitsisarnerlu malinnaaffigivaa.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaammata.

Umimmaat

1. Aqutsiveqarfik Maniitsoq: Piniarfik 1-mi, 2-mi, 3-mi aamma 4-mi inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassalluni. Tiggaat tammajuitsussanik piniartitsinermi piniagassat aamma kulavaat norrallit norraat ilanngullugit piniaqqusaanngillat.
2. Aqutsiveqarfik Sisimiut: Inuussutissarsiutigalugu aamma sunngiffimmi killilimmik umimmanniarneq 1. Augusti-mi aallartissaaq 15. Oktobari ilanngullugu ingerlassalluni umimmattassiissutillu 400-iupput. Umimmattassat pisarinngitsuukkat Ukiuunerani 2022-mut nuunneqassapput. Tiggaat tammajuitsussanik piniartitsinermi piniagassat aamma kulavaat norrallit norraat ilanngullugit piniaqqusaanngillat.
3. Umimmaqarfik Naternaq: Inuussutissarsiutigalugu aamma sunngiffimmi umimmanniarneq 1. August-mi aallartissaaq 15. Oktobari ilanngullugu ingerlassalluni umimmattassiissutillu 120-iupput. Ussuit Nunaat, Ipiutaarsuup Nunaa aamma Eqalummiut Nunaat umimmaqarfimmut Naternamut ilanngunneqarnikuupput. Umimmattassat pisarinngitsuukkat Ukiuunerani 2022-mut nuunneqassapput. Tiggaat tammajuitsussanik piniartitsinermi piniagassat kulavaat norrallit norraat ilanngullugit piniaqqusaanngillat.
4. Aqutsiveqarfik Qaanaaq: Piniarfimmi Kap Atholl-mi inuussutissarsiutigalugu sunngiffimmilu umimmanniarnissamut umimmattassiissutit 40-niit 60-iunut qaffanneqarput. Piniarfimmi Nuna Inglefield-mi aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iupput. Tiggaat tammajuitsussanik piniartitsinermi piniagassat aamma kulavaat norrallit norraat ilanngullugit piniaqqusaanngillat.
5. Aqutsiveqarfik Ivittuut: Inuussutissarsiutigalugu aamma sunngiffimmi piniarnissamut umimmattassat minnerpaaffiliinermik kisitsineq tunngavigalugu 45-pput, angutivissat 18-it arnavissallu 27-it tamarmik 1-2-ukiulinnik. Piniarnissamut piffissaliussaq 15. oktobarimiit 15.decembari ilanngullugu ingerlassaaq.
6. Aqutsiveqarfik Sigguk: Inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassaaq. Umimmattassiissutit allannguuteqaratik 150-iupput. Tiggaat tammajuitsussanik piniartitsinermi piniagassat aamma kulavaat norrallit norraat ilanngullugit piniaqqusaanngillat.
7. Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassaaq aammattaaq 10. Novembari-miit 10. Decembari ilanngullugu. Umimmattassiissutit allannguuteqaratik 115-iupput. Tiggaat tammajuitsussanik piniartitsinermi piniagassat aamma kulavaat norrallit norraat ilanngullugit piniaqqusaanngillat.

Tunngavilersuutit: Aqutsiveqarfimmi Maniitsumi umimmanniarnerup 1. Augusti-mi aallartinnissaa aalajangerneqarpoq, imm. 5 takuuk, naak Biologit siunnersuinerat siornameersoq malillugu aatsaat 15. Augusti-mi allartinnissaa inassutigineqaraluartoq. Ileqqutoqqat malillugit umimmanniarnerup neqinillu panertulisarnerup APN-miit pingaartinneqarnera tassani tunngaviuvoq, umimmannillu akornusiisarnerup ilaatigut ukiuunerani umimmanniarnerup assartuutinillu motoorilinnik atuinerup nalaani pisartup allatigut millisinneqarnissaa sulissutigineqarpoq.
Umimmaat Ussuit Nunaanni, Ipiutaarsuup Nunaani aamma Eqalummiut Nunaanni takuneqartartut Piniarfik Naternamut ilanngunneqarput pissutigalugu suli avannamut kimmullu ingerlaarsinnaanissaat Naternamilu umimmaqatigiinnut ilanngunnissaat APN-miit pingaartinneqarmat, imm. 7 takuuk.
Qaanaap aqutsiveqarfiani Piniarfik Kap Atholl-mi inuussutissarsiutigalugu sunngiffimmilu umimmattassat Biologit nunaminertap neriniarfissatut killilimmik nammassinnaanera pillugu siunnersuinerat aamma umimmaat amerlisimanerat piniarfiullu avataanut siaruaassimanerat pillugu piniartut ilisimasaat tunngavigalugu 40-runiit 60-inut qaffanneqarnissaat aalajangerneqarpoq, imm. 8 takuuk. Piniarfiup allineqarnissaa pisinnaasimanngilaq.

Erseqqissaatit: Erseqqissaatigineqarpoq qamuteralaat, ATV-t aamma qamutit motoorillit allat umimmannik malersuinermi piniarnermilu atornissaat inerteqqutaammat.

Piniarnermut allagartap 2021-mi 1. maaji sioqqullugu akilereersimanissaa pillugu piumasaqaat inuussutissarsiutigalugu aamma sunngiffimmi piniartunut tamanut atuuppoq. Soorlu aamma sunngiffimmi piniarnermut akuersissutit inunnut ukiut kingulliit qulit iluanni ataavartumik ukiuni marlunni Kalaallit Nunaanni najugalittut inuit nalunaarsorsimaffiannut nalunaarneqarsimasunut taamaallaat tunniunneqarsinnaanerat pillugu piumasaqaat atuuttoq.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfik, apn@nanoq.gl-mut imaluunniit AC-Fuldmægtig Nuka Møller Lund, numl@nanoq.gl-mut saaffiginnittoqarsinnaavoq.

Ilanngussaq 1: Piniarfinni ataasiakkaani piniarnissamut piffissaliussat pisassiissutillu.
Ilanngussaq 2: Kalaallit Nunaata kitaani tuttunut Piniarfik 1-11.
Ilanngussaq 3: Kalaallit Nunaanni umimmaqatigiit.
Ilanngussaq 4: Maniitsup aqutsiveqarfiani umimmannik Piniarfik 1, 2, 3 aamma 4.
Ilanngussaq 5: Tuttunut Piniarfik 11 aamma Ivittuut.
Ilanngussaq 6: Umimmaqarfik Naternaq.
Ilanngussaq 7: Ukiuni 2018-mi, 2019-mi aamma 2020-mi tuttutanik kisitsisit.
Ilanngussaq 8: Tuttut angutivissat Okotobarimi 2020-mi pisarineqartut qimaannarneqartullu.