AtuartigukMeeqqanut aarlerinartorsiortunut siunissaq pitsaasoq suliassanik suliarinninnikkut aallartittarpoq
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Meeqqanut inuusuttunullu aarlerinartorsiortunut miliuunit arlallit immikkoortinneqarput. Meeqqat inuusuttullu ajornartorsiuteqarpata, inuunerminni atugaat allaffiup qaani pappiliarpassuit akornanni iliinnarneqassanngillat, tuaviornerpaamilli ikiorneqassapput. Taamaammat meeqqat pillugit suliassat suliarineqarnissaannut kommunit ikiorneqassapput.
Meeqqat ikiorneqarnissamik pisariaqartitsigaangata sumiginnarneqaraangatalu taakku tuaviortumik ikiorneqartassapput. Taamaammat kommunini suliassanik suliarinnittarnermut ikiuunnerup nanginneqarnissaanut 2021-mi ilassutitut aningaasaliissutissanik qinnuteqaat 3,5 mio. kr.-iusoq Naalakkersuisut massakkorpiaq akuersiteqqammerpaat. Ajornartorsiut ingerlaannarluni qanoq iliuuseqarfigineqassaaq, taamaalilluni meeqqat inuusuttullu, ajoraluartumik ajunngitsunik meeraaffeqarfissaraluaminni ajunngitsumik meeraaffeqanngitsut annikinnerpaamik ajoqusernissaat qulakkeerniarneqassaaq.
Ikiuineq marlunnik siunertaqarpoq: suliassat ikilisinneqarnissaannut ingerlaannarluni ikiuineq aamma kommunini suliassanik suliarinnittartut piginnaanngorsarneqarnerat, taamaalillutik meeqqat aarlerinartorsiortut pillugit suliat suli pitsaanerusumik suliarisinnaaniassammatigit. Peqatigitillugu meeqqat inuusuttullu aarlerinartorsiortut siusinnerusukkut nassaarineqartarnissaat sukkanerusumillu ikiorneqartarnissaat ikiuinerup siunertaraa, taamaalillutik ajunngitsumik siunissaqalerniassammata, nuannaarlutik atuarniassammata aamma pitsaasumik sulinermik inuussutissarsiorsinnaalerniassammata.
Ikiuunneq kommunit nuannaarutigisimavaat, kisianni suliassanik suliarinninnissamut suli ikiortariaqarlutik akissuteqaatigisimavaat, taamaalillutik atasinnaasunik ataqatigiinnik aaqqissuussinernik ingerlatsinernillu pilersitsisinnaaniassagamik. Meeqqat pillugit suliat kivinneqarnissaat kommunit akisussaaffigivaat, kisianni suliassat suliarineqartussat nangeqqinneqarnissaannut Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisoqarfik ikiuivoq.
Suliassanik suliarinninnissamut ikiuinermi siullertut meeqqanut inuusuttunullu aarlerinartorsiortunut suliniutit patajaallisaavigineqarnissaat pillugit Kalaallit- qallunaallu oqartussaasoqarfiisa assigiinngitsunik suliallit akornanni suleqatigiittoqarpoq. Taamanikkut Danmarkimi Kommunernes Landsforening aqqutigalugu qallunaat kommunii 3-t suleqatigineqarput maannalu Danmarkimi Kommunernes Landsforening-imik nutaamik isumaqatigiissusiornissaq sulissutigineqarluni
Attavissaq
Paasisaqarnerunissamut attavigineqassaaq Naalakkersuisup allattaa Julia Lynge Ezekiassen, e-mail: jeze@nanoq.gl imaluunniit oq. + 299 25 78 54