Aalisarnerup ineriartortinneqarnissaanut aningaasanik tapiiffigineqarnissamik suli qinnuteqartoqarsinnaavoq
Nassiussisuuvoq: Aalisarnermut Piniarnermullu NaalakkersuisoqarfikQaanaammi, Qimusseriarsuarmi Tunumilu aalisarnerup ineriartortinneqarnissaanut aningaasanik tapiiffigineqarnissamik suli qinnuteqartoqarsinnaavoq
Aalisarnerup ineriartortinneqarnissaanut Aalisarnermut Piniarnermullu Naalakkersuisoq maannamut 730.000 kr.-inik tapiissuteqarsimalerpoq. Suliniutit 5-t tapiiffigineqarsimapput, soorlu misileraalluni aalisarnissanut atortussanut, bundgarnersornermik pikkorissarnissamut aalisarnerlu pillugu isumasioqatigiissitsinissamut. Suliniutit tamarmik Tunumiipput.
2021-mi Tunumi, Qaanaami Qimusseriarsuarmilu aalisarnerup ineriartortinneqarnissanut Inatsisartut 1. mio.kr.-inik aningaasaliissuteqarnikuupput. Massakkullu 270.000 kr.-it sinnerullutik.
Taamaattumik Qimusseriarsuarmi Qaanaamilu aalisarnermik ineriartortitsilluni suliniutissanut aningaasanik tapiiffigineqarnissamik qinnuteqaqqullugit Naalakkersuisut kaammattuipput.
”Qaanaami, Qimusseriarsuarmi Tunumilu aalisarnerup ineriartortinneqarnissaanut atugassatut Inatsisartut aningaasaliinikuupput Naalakkersuisullu nunap immikkoortuisa pingasuusut tamarmik iluaquserneqarnissaat pingaartilluinnarpaat. Taamaattumik Qaanaami Qimusseriarsuullu eqqaani aalisartut piniartullu kaammattorusuppakka aningaasanik qinnuteqaqqullugit.”, taamak oqaaseqarpoq Naalakkersuisoq Aqqaluaq B. Egede.
Aalisarnerup ineriartortinneqarnissaanut peqataarusuttut kikkulluunniit suliniuteqarnissamut aningaasanik qinnuteqarsinnaapput. Kommunimi inuussutissarsiornermi siunnersortit KONFIFA-milu siunnersortit qinnuteqarnissami ikiortigineqarsinnaapput. Suliniutissap allaaserineqarnera missingersuutillu Aalisarnermut Piniarnermullu Naalakkersuisoqarfimmut nassiunneqassapput.
apn@nanoq.gl
Imaneq 1A, 701
3900 Nuuk
Paasisaqarnerorusukkuit Aalisarnermut Piniarnermullu Naalakkersuisoqarfik attavigiuk , apn@nanoq.gl.