Aatsitassanut Naalakkersuisoqarfik Europami Aatsitassarsiornermut peqatigiinnut ilaasortaalerpoq

17. juni 2021-mi, Aatsitassanut Naalakkersuisoqarfik Europami Aatsitassarsiornermut peqatigiinnut, tuluttoorlugu ’The European Raw Materials Alliance’-mut ilaasortanngorniarsinnaanera Naalakkersuisunit akuerineqarpoq, 25. juuni 2021-milunalunaarutigineqarpoq, Aatsitassanut Naalakkersuisoqarfik ilaasortanngorsimasoq.

Europami Aatsitassarsiornermut peqatigiit Europa-Isumalioqatigiissitamit 2020-mi nalunaarutigineqarpoq, taassumalu EU’p mingutsitsinngitsumik digitaliusumillu aningaasaqarnera tunngaveqartittussaavaa. Aatsitassarsiornermut peqatigiit attaveqaqatigiiffiuvoq, taassumalu aatsitassanik piiaanermi taakkulu nioqqutissiatut naammassinissaat tikillugu nalingat tamaat malinnaaffigalugu, tassanilu ilaatinneqarput EU-p iluani avataanilu soqutigisaqaqatigiit.

Aatsitassarsiornermut peqatigiit Europa-Isumalioqatigiissitap aatsitassanut ulorianaatilinnut 30-inut tunngasoq nalunaarsugaata saqqummiunneqarnera ilutigalugu nalunaarutigineqarpoq , taakkulu annersaat Kalaallit Nunaanniittuupput assigiinngiiaartunik uppernarsaasiorneqarsimasut aningaasarsiutigalugillu piiarneqarsinnaarpasittut.

Aatsitassanut Naalakkersuisoqarfiup Europami Aatsitassarsiornermut peqatigiiffiannut ilaasortaanermini Kalaallit Nunaanni aatsitassarsiornermi periarfissaqarneranut atatillugu aningaasaliinissamut periarfissaasut paasititsiniutigisarniarpai, Aatsitassanullu peqatigiinni ilaasortaasut naleqartunut tamanut atatillugu suleqatigisarniarlugit. Kalaallit Nunaanni aatsitassarsiornermi ingerlatseqatigiiffiit arlariit Aatsitassanut peqatigiinni ilaasortaapput.

Ineqarnermut, Attaveqatigiinnermut, Aatsitassanut, Naligiisitaanermullu Naalakkersuisoq Naaja H. Nathanielsen:

”Naalakkersuisut aatsitassarsiornermi suliffissuaqarneq annertuumik pingaartippaat. Inussutissarsiorfiup inerisarnissaa kissaatigineqarpoq Kalaallit Nunaata aningaasaqarnerata innuttaasunut iluaqutissanngornera assigiinngiiaartinnerulersinniarlugu. Aatsitassanut Naalakkersuisoqarfiup Europami Aatsitassarsiornermut peqatigiinni ilaasortaanera aatsitassarsiornermi anguniagaasut ilagaat..

EU’p mingutsitsinnginnissamut nikeriarnermi ukkataa – kiisalu aatsitassanik piiaanermut atatillugu avatangisiinik inuiaqatigiinnullu akisussaassuseqarneq – tamanna Kalaallit Nunaata siunnerfiinut naapertuuppoq. Taamaattumik qilanaaraara, Aatsitassanut Naalakkersuisoqarfiup Europami Aatsitassarsiornermut peqatigiinni ilaasortaasut suleqatigilissagai, Kalaallit Nunaannut iluaqutissaasut periarfissat ujartorlugit.”

Paasisaqarnerorusukkuit ataani taaneqartoq attavigisinnaavat: Aatsitassanut Naalakkersuisoqarfimmi pisortaq, Jørgen T. Hammeken-Holm, oqarasuaat normua: 34 68 46, imaluunniit e-mailikkut: joeh@nanoq.gl