AtuartigukMittarfiliortiternerni aningaasaqarneq pillugu nassuiaat
Nassiussisuuvoq: Aningaasaqarnermut Naligiissitaanermullu Naalakkersuisoqarfik
Naalakkersuisoqatigiinnissamut isumaqatigiissummi imatut allassimasoqarpoq:
“Inatsisartut mittarfiliornissamut aalajangiiffigereersimasaat pillugit aningaasaqarnikkut inissisimaffik ersarissumik inuiaqatigiinnut nassuiarneqassasoq naalakkersuisooqatigiit isumaqatigiipput. Taakkununngalu aningaasartuutaajumaartussallu pillugit Inatsisartut nutaat suleqatigineqassapput. Covid-19-ip ilutigisaanik aningaasaqarnitta eqqugaanera pillugu nunatta ammaqqikkiartuaarnissaanut pilersaarusiortoqarnissaa aningaasaqarnitsinnut attuumassuteqarpoq. Tamannalu ukiunut arlalinnut pilersaarusiorneqassasoq naalakkersuisooqatigiit isumaqatigiipput.”
Tamanna tunngavigalugu Ineqarnermut, Attaveqatigiinnermut, Aatsitassanut Naligiissitaanermut Naalakkersuisoq Naaja H. Nathanielsen aamma Aningaasaqarnermut Nunamullu Namminermut Naalakkersuisoq Asii Chemnitz Narup mittarfiliortiternerit siumut ingerlaneri aningaasaqarnerlu pillugit nassuiaammik suliaqarput. Nassuiaat Naalakkersuisut nittartagaanni pissarsiarineqarsinnaavoq, aammalu tusagassiorfinnut nalunaarummut matumunnga ilanngunneqarluni.
Nassuiaat qaammatini tulliuttuni misissueqqissaarnernik naatsorsukkanillu nutaanik malitseqartinneqassaaq. Taakku ingerlaavartumik saqqummiunneqartassapput.
Nassuiaatip tamanut ammasumik saqqummiunneqarnerata saniatigut ullumi Inatsisartut Aningaasaqarnermut Akileraartarnermullu Ataatsimiititaliaanni ilaasortat, Sanaartornermut Ataatsimiititaliamut ilaasortat kiisalu partiit siulittaasui ilisimatitsiviusumik ataatsimeeqatigineqassapput. Ilisimatitsiviusumik ataatsimeeqatigiinnermi aningaasaqarneq aammalu mittarfiliortiternerni killiffiit sukumiisumik saqqummiunneqassapput.
Ineqarnermut, Attaveqatigiinnermut, Aatsitassanut Naligiissitaanermut Naalakkersuisoq Naaja H. Nathanielsen aamma Aningaasaqarnermut Nunamullu Namminermut Naalakkersuisoq Asii Chemnitz Narup oqarput:
”Neriuppugut nassuiaammi suliami killiffiit takussutissilluarneqarumaartut. Matumani suliat pingaarutillit, innuttaasunut tamnut sumiluunniit najugaqaraluarpata sunniuteqartussat pineqarput. Taamaattumik suliat ataatsimoorlutik nuna tamakkerlugu iluaqutaanissaat pingaaruteqarluinnarpoq. Piffissami aggersumi inuiaqatigiit ilisimasaannik sulianullu paasisimanninnerinik annertusititsinissatsinnut qilanaarpugut. Suli nunatsinni attaveqaatit pillugit annertuunik aalajangiisartussaavugut. Oqallinnerit pilernissaannut tikilluaqqusivugut aammalu oqaloqateqarnissamut piareersimalluta.”
Nassuiaat uani nassaariuk
Annertunerusumik paasisaqarusunnermi Ineqarnermut, Attaveqatigiinnermut Naligiissitaanermullu Naalakkersuisoqarfik attaveqarfigineqassaaq, uunga box909@nanoq.gl