Kulturikkut nersornaat Neriusaamut aamma Mads Grønvoldimut, Kajumissaasiullu Seqininnguaq Lynge Poulsenimut

Ukioq manna Kulturikkut Nersornaat nipilersortartumut Mads Grønvoldimut aammalu atuagassiaq Neriusaamut tunniunneqarpoq, inuit pisinnaatitaaffiinut tunngatillugu ilungersuussisumut Seqininnguaq Lynge Poulsenimut Naalakkersuisut kajumissaatitut nersornaasiuttagaat tunniunneqarluni.
 
Ilinniartitaanermut, Kultureqarnermut, Timersornermut, Ilageeqarnermullu Naalakkersuisup Peter Olsenip Katuami nersornaatit taakku marluk Inuiattut Ullorsiorfimmi juunip 21-ani tunniuppai.
 
Mads Grønvoldi pillugu Peter Olsen ilaatigut oqarpoq:

• Nipilersoqatigiinni Ullorissat-ni ukioq 1984-imi pilersinneqarsimasumi siuttuuvoq. 1980-ikkunnilu kassettinik pingasunik Ullorissat saqqummersitsisimapput. Ukiumi 1995-imi nuuteeraq saqqummersitaat: ”Siunissamut” Sølv-imik ULO-nnassutigivaat.
• Nipilersuusiarisimasaasa ilaatigut imarai asanninneq, misigissutsit, kammagiinneq, siunissaq, nunamut nunallu avataanut kusanaqisumut asannissuseq, erinarsuutit nuannersut qiimasullu Kalaallillu inooriaasaat piorsarsimassusaallu aamma tunngasut. Maluginiarneqarpoq erinarsuusiai politikimut tunnganatik inummut avataanullu tunngasuuneri.

Neriusaaq pillugu Peter Olsen ilaatigut oqarpoq:

• Atuagassiap Kalallit Nunanni eqqumiitsuliortarneq piorsarsimassutsillu oqaluttuarisaaneranik piujuartitsisuusimavoq, saqqummiuttagaallu ilusilersuutinik kusanarluinnartunik pitsaasunillu peqartarsimalluni. Atuagassiaq nammineq kajumissutsimik suliaqarluartut ingerlataraat ukiorlu manna ukiunik 30-liilluni. Atuagassiamik suliaqartartut ilaat ullumikkut ilagivagut, ilaat allani najugaqarput, ilaallu qimagutereersimallutik. Atuagassiaq taassuminngalu nammineq kajumissutsimik suliaqartartut nersugassarujussuupput Nunatsinni eqqumiitsuliornermut piorsarsimassutsikkullu suliaqarnermut tunngasunik ilisimasanik ingerlaavartumik saqqummersitsisarnerat pillugu.

Seqininnguaq Lynge Poulseni pillugu Peter Olsen ilaatigut oqarpoq:

• Ukiukikkaluaqaluni suliamini pingaarutilinni, taakkunani ilaatigut inuit suiaassutsikkut aammalu atoqateqarnikkut kajumissutsiminni immikkoortinneqaratik assigiiaartumik pisinnaatitaaffeqarnissaat aammattaaq nunap inoqqaavisa inuunerannut atugassarititaasut pillugit aammalu tarnikkut peqqinnerulernissaannik suliniutimini maluginiagassaalersimalluni. Inuit pisinnaatitaaffii tamanut atuuttussaapput, aamma upperisinnaasariaqarparput namminiussuseqarsinnaatitaanerput pillugu.

Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq.
 
Naalakkersuisut kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.

Attavissaq: 
 
Paninnguaq Steenholdt (Departementet for Uddannelse, Kultur, Forskning og Kirke)
Toqq/direkte 34 57 02
PSLT@nanoq.gl