Avatangiisinut aningaasaateqarfik suliniutinut eqqagassalerinermik aallussiviusunut tapersiivoq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu NaalakkersuisoqarfikAvatangiisinut aningaasaateqarfik suliniutinut nutaanut 12-nut, ullumikkut siunissamilu avatangiisinut iluaqusiisussanut 8 millioner koruuninik agguaavoq.
Suliniutit tapersiivigineqartut pingaarnertigut makkununnga tunngassuteqarput:
- Eqqagassalerineq aamma nunami namminermi eqqagassalerinermut aaqqiissutissat
- Eqqakkanik immikkoortiterineq
- Aalisakkanut qassutit/piniariartarfiit
- Isumalluutinik eqqumaffiginninnerulerneq
Ilaatigut Kangerlussuarmi aamma Kommune Qeqertalimmi eqqagassalerinermut, Sisimiut eqqaanni aalisakkanut qassutit/sakkut salinneqarnissaannut, poortuutinut ataasiaannartakkanut utertitseriaatsimik nutaamik misissueqqissaarnissamut kiisalu silap pissusaa aammalu aningaasaqarneq kaaviiaartoq ukkataralugu inuusuttunut sammisaqartitsinissamut aaqqissuussinissamullu tapersiisoqarpoq.
”Avatangiisinut aningaasaateqarfik suliniutinut pissanganartunut arlalinnut taperseeqataammat nuannaarutigisorujussuuara. Qinnuteqaatit soqutiginaatillit arlaqarsimapput, aammalu suliniutinut siunnersuutit pimoorussisorpassuaqarmat aammalu aningaasaateqarfimmut soqutiginninnerup annertoorujussuunera nuannaarutigaakka. Suliniutit siunissami ukiorpassuarni avatangiisinut iluaqusiisussat suliarineqarnerisa malinnaaffiginissaa qilanaaraara", Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Avatangiisinut aningaasaateqarfik aamma 2021-mi nunami namminermi eqqagassalerinermut aaqqiissutissap ESANI A/S-ip pilersinneqarnissaanut tapersiivoq, tamatuma kingunerisaanik Sisimiuni aamma Nuummi nunami namminermi ikuallaavinnik nutaaliaasunik marlunnik, nunarput tamakkerlugu eqqagassanik tigooqqaasartussanik, sanasoqassalluni.
Avatangiisinut aningaasaateqarfimmik, nunarput tamakkerlugu avatangiisinut tunngasunut pitsanngorsaanermik suliaqarnermut tapersiisartussamik, pilersitsisoqarnissaa 2018-imi Ukiaanerani ataatsimiinnermi Inatsisartut akueraat. Ukiut tamaasa suliniutinut avatangiisinut iluaqusiisussanut aningaasassanik immikkoortitsisoqartassaaq.
Paasissutissanik annertunerusunik piniarnermi attaveqarfigineqassaaq:
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq, Mette Skarregaard Pedersen, oqarasuaat: +299 346476, e-mail: mesp@nanoq.gl
Suliniutit tapersiivigineqartut allattorsimaffiat takuuk uani.
Sammisaq | Qinnuteqartoq | Suliniut |
Eqqagassalerineq nunalu tamakkerlugu eqqagassanut aaqqiissut | Kommune Qeqertalik | Ikerasaarsummi eqqagassanik tigooqqaaveeqqamik pilersitsineq |
Qeqqata Kommunia | Qeqqata Kommuniani nunaqarfinni kissarsuutinik piiaaneq passussinerlu | |
ESANI A/S | Puunik ataasiarluni atortakkanik utertitsisarnermut aaqqiissummik nutaamik misissueqqissaarneq il.il. | |
Qeqqata Kommunia | Kangerlussuarmi eqqagassalerineq | |
Kommune Kujalleq | Qaqortumi eqqagassanik katersuinermut atortut | |
Eqqagassanik immikkoortiterineq | Avannaata Kommunia | Nunaqarfinnut 4-nut trillebørit motoritallit 4 |
Qassutit/ piniariarfiit | Sisimiut Tømrer & Boat Safari | Sisimiut eqqaanni qassutinik/atortunik eqqagassanillu allanik katersineq |
Birgitta K. Danielsen | Kullorsuup eqqaani piniariarfinnik asiliarfinnillu iluarsaassineq | |
Isumalluutinik atuineq pillugu eqqumanerulerneq | Peqtigiifik Nalunnguarfik c/o Karl Lennert | Sisimiuni tatsip Nalunnguarfiup saligaatsuutinnissaa |
Avannaata Kommunia | Eqqagassanik immikkoortiterinerulernissaq pillugu sammiviliisumik iliuuseqartitsineq (nudging) isumassarsiorfigalugu paasititsiniaaneq | |
Maria Motzfeldt | Eqqaavimmut - Smid det i skralderen - Qeqertarsuatsiaat, Arsuk, Paamiut | |
Veronika I Homrum | Kalaallit Nunaat minguissiteqqiguk |