Biskopinngortitsinissaq

Naalakkersuisut ulloq 3. marts 2020-mi biskopimut qinersisoqarnissaa nalunaarutigaat, ukiorlu taanna 7. oktober Naalakkersuisut nalunaarput Paneeraq Siegstad Munk taaneqarnerpaajusimasoq taamaasillunilu Kalaallit Nunaata biskopeqarfiani biskopiulissasoq.

Ulloq 1. december 2020-mi Paneeraq Siegstad Munk biskopitut sulilerpoq, taamaasillunilu siulini soraarneq Sofie Petersen, Kalaallit Nunaata biskopeqarfiani ukiuni 25-ni biskopioreersimasoq paarlallugu.  Biskopinngortitsinissaq ulloq 22. november 2020-imi pisussaasimagaluarpoq, taamanili angalasinnaanermut katersuussinnaanermullu maleruagassaasut pissutigalugit, biskopinngortitsinissaq nalinginnaasumik ingerlanneqaqqissinnaalernissaanut kinguartinneqassasoq aalajangiunneqarpoq.

Maannamut angalasinnaanermut katersuussinnaanermullu maleruagassat imaalersimapput biskopinngortitsinissaq pisinnaalerluni, taamaasillunilu Nuummi ulloq 1. august nal. 13 Hans Egede-ip oqaluffiani immikkut naalagiartitsinermi pissalluni. Tamatuma kingunerani ilagiinnut Nuummi Katersortarfimmi kaffillertoqassaaq, ullormullu persuarsiorneq naggaserlugu unnukkut nereqatigiinneqassalluni.

Oqaluffeqarnermut Naalakkersuisoq Peter Olsen ima oqaaseqarpoq ”Nuannaarnarpoq maanna biskopinngortitsinissaq pisinnaalermat, aammalu Naalakkersuisut oqaluffimmut persuarsiornermi aammalu oqaluttuarisaanermi eqqaamasassami taamaattumi ilaasinnaanertik qilanaarivaat”

Biskopinngortitsinissaq ingerlanneqarnissaa pillugu sukumiinerusumik paasissutissanik paasisaqarnerorusullutit Biskopip allaffianut imaluunniit AC fuldmægtig Line Hasselriis-imut attaveqarsinnaavutit +299 345708 land@nanoq.gl