Akiuussutissamik tamakkiisumik kapitinnikunut killilersuinernik nutaamik qasukkaanerit 1. juuni 2021-mi atuutilissapput

Naalakkersuisut ullumikkut avataaniit angalasarnermut katersuuttarnermullu nalunaarutini nutaamik qasukkaanissat akuersissutigaat. Qasukkaanerit taakku pingaarnertut tamakkiisumik akiuussutissamik kapitinnikunut tunngapput aammalu ulloq 1. juuni 2021-miit atuutilissallutik.

Avataaniit tikinnermut atatillugu qasukkaanerit
Inuit tamakkiisumik Covid-19-imut akiuussutissamik kapitereernikuusut aamma ulloq 1. juuni 2021 aallarnerfigalugu, avataaniit tikereernerminni ullut tallimassaani misissortinnissartik utaqqeqqaartarunnaassavaat. Misissuivik ammassappat inuit taakku avataaniit tikereernerminniit ulloq ataaseq qaangiutereeraangat misissortereersinnaassapput. Misiligummik tigusinermi tunillatsissimannginneranik ersiuteqarpat, taava inuk pineqartoq mattusimajunnaarsinneqassaaq taamaammallu assersuutigalugu suliartorsinnaanngussalluni imaluunniit katerisimaartunut peqataasinnaanngussalluni.

Taamatuttaaq inuit Covid-19-imut tamakkiisumik akiuussutissamik kapitinnikut, illoqarfimmiiit toqqaannaq tikinneqarfigineqartartumit illoqarfimmut nunaqarfimmulluunniit allamut ingerlaqqittussanut atatillugu, avataaniit tikereernerannit aqaguani misissortereersinnaapput.

Meeqqat 2-11-t akornanni ukiullik angalaqataasut ingiaqatigisamittuulli Covid-19-imut misiligummik tigusiffigineqarnissaminnut neqeroorfigineqassapput. Tamanna assersuutigalugu isumaqarpoq, angajoqqaat tamakkiisumik akiuussutissamik kapitereernikuullutik avataaniit angalasut taakkulu qitornaat angalaqataasut angalareernerminnit ullup tulliani misissortissinnaassapput, naak aamma qitornaat assersuutitut aqqanilinnik qaammatinillu arfineq-pingasunik utoqqaassuseqartoq akiuussutissamik kapitissimanngikkaluartoq.

Ulloq 1. juuni 2021 aallarnerfigalugu meeqqanut marluk ataallugit ukiulinnut Covid-19-imik tunillatsissimannginnermik uppernarsaammik takutitsisoqartarnissaanik piumasaqaat atuutsikkunnaarneqassaaq. Meeqqat taakku avataaniit angalareernerminni aamma Covid-19-imut misissortissanngillat.

Katersuuttarnernut atatillugu qasukkaanerit
Ulloq 1. juuni 2021 aallarnerfigalugu inunnut Covid-19-imut akiuussutissamik tamakkiisumik kapitinnikunut katersuuttarnermut nalunaarummi inerteqqummut, nunanit allanit angalasunut inatsimmik atuutsitsiffiusumut, atuutsitsisoqarunnaassaaq. Tamanna isumaqarpoq inuit tamakkiisumik akiuussutissamik kapitinnikut Danmarkimeersut imaluunniit nunanit allaneersut assersuutaasumik nunatsinni angalasinnaanngussapput saqqummiussiartorlutik pikkorissaajartorlutilluunniit.

Taamatuttaaq inuit Covid-19-imut tamakkiisumik akiuussutissamik kapitinnikut, katersuuttarnermut nalunaarummi aaqqissuussanut kommuninit allanit tikittunit peqataasoqartussaatillugu inerteqqummut ilaatinneqanngillat. Taamaammat inuit taakku ulluni 14-ini utaqqeqqaartariaqaratik peqataasinnaanngussapput. Taamaammat avataaniit tikereernerup aqaguani Covid-19-imut misissortittoqarsinnaassaaq kingornalu aaqqissussamut peqataalluni.
Qasukkaaneq inunnut akiuussutissamik tamakkiisumik kapitereernikunut taamaallaat atuutissasoq erseqqissaassutigineqassaaq. Taamaammat meeqqat akiuussutissamik kapitinnikuunngitsut taamaattorli akiuussutissamik kapitinnikunik ingiaqateqartut katersuunnermut nalunaarummi inerteqqummut ilaatinneqanngillat.

Tamakkiisumik akiuussutissamik kapitinnikuuneq qanoq paasineqassava?
Qasukkaanernik arlalinnik nassuiaateqarnermi taaguut "kapitinnikut" taaguusiunnagu "akiuussutissamik tamakkiisumik kapitinnikut" taaguutigitinneqarnera maluginiassallugu pingaaruteqarpoq. Tamanna isumaqarpoq, aalajangersakkanit taaneqartunit ilaatinneqarniaraani akiuussutissamut marloriarluni kapitittoqariissasoq, assersuutigalugu akiuussutissanik Moderna-mik imaluunniit Pfizer-imik kapitissimagaanni. Akiuussutissami ataasiaannarluni kapitissimagaanni, taava malittarisassanut nalinginnaasunut ilaassaaq.

Inuit tamakkiisumik kapitinnikuunngitsut, siusinnerusukkulli Covid-19-imik tunillatsinnikut, qasukkaanernut taakkununnga ilanngunneqanngillat taamaammallu malittarisassat nalinginnaasut malissavaat.

Pissutsit allat
Nalunaarutit aqagu (21. Maaji 2021-mi) saqqummiunneqarnissaat naatsorsuutigineqarpoq uani atuarneqarsinnaapput:
https://naalakkersuisut.gl/kl-GL/Kundgoerelser/2021

Apeqqutissaqartoqarpat Corona pillugu sianerfissamut oqaras. 80 11 00-imut imaluunniit corona@nanoq.gl-imut saaffiginnittoqarsinnaavoq.