AtuartigukIssittumi Siunnersuisooqatigiit ministeriisa ataatsimeersuaarnerat 2021
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Nunanut Allanut, Inuussutissarsiornermut, Niuernermut Silallu Pissusaanut Naalakkersuisoq Issittumi Siunnersuisooqatigiit ministeriisa ataatsimeersuaarneranni Reykjavik, Islandimi ulloq 20. maj 2021 peqataavoq.
Ministerit ataatsimiinneranut Issittumi nunat ministerii Issittumilu nunap inoqqaavisa aallartitaat peqataasoralugit Island qaaqqusisuuvoq, tassanilu periusissiaq ataatsimut pingaartitanik tunngavilik Siunnersuisooqatigiit 1996-mi pilersinneqarneraniit siullermeerluni akuersissutigineqarpoq.
Taasssuma saniatigut Reykjavikimi-nalunaarut atsiorneqarpoq aammalu SAO-nalunaarusiaat, islandiumiut siulittaasuuneranni angusimasanik imalik, Issittup imartaata avatagiisaanik, silaannaap pissusaanik nukissiutillu ataavartut iluarsissutaannik, Issittumilu inuit inuiaqatigiinnillu kiisalu Issittormiut Siunnersuisooqatigiivinik nukittunerusumik ukkatarinniffiusimasoq akuersissutigineqarpoq.
Issittumi Siunnersuisooqatigiit nunat tamalaat Issittumi nunallit akornanni suleqatigiinnermut tunngasunik oqalliffiuvoq pingaarutilerujussuaq, Naalakkersuisoq Pele Brobergilu Issittumi Siunnersuisooqatigiinni suliaq pillugu ima oqaaseqarpoq:”Nuannerpoq takullugu nunat issittormiut imminnut pituttoqatigiillutik periusissiap akuersissutigineqarneratigut ataatsimoorussamik ungasinnerusumut anguniangassittut, taamaasilluni uagut, tassa innuttaasut Issittumiittut ineriartortuarnissaanut, piffimmilu ineriartornermut aalajangeeqataanissaat qulakkeerneqarmat.”
Naalakkersuisoq Pele Brobergip ministeritut oqalugiarnermini naqissuserpaa, nunat issittormiut akornanni suleqatigiinnerup inerititaqarfiujuarnissaata pingaaruteqassusaa taavalu piffimmi ineriartorneq Issittumi inuiaqatigiinnut pisariaqartitaat naapertorlugit iluaqutaanissaat naqissuserlugu.
Kalaallit-islandiumiullu attaveqatigiinneranik suleqatigiinnerannillu Islandip nunanut allanut ministeria Guðlaugur Þór Þórðarsonilu ataatsimiinneq oqaloqatigiinnerillu piffissaqartinneqarputtaaq. Ataatsimiinnermi aamma Naalakkersuisoq Issittumi Siunnersuisooqatigiinni islandimiut siulittaasuuneranni iluatsilluartumi pilluaqquasivoq.
Aammattaaq Naalakkersuisoq Pele Broberg Canadap nunanut allanut ministeria Marc Garneau Kalaallit Nunaat Canadalu suleqatigiinnerit, killeqarfinnik isumaqatigiinniarnerit kiisalu killeqarfitsigut angalanerit pillugit pitsaasumik ataatsimeeqatigaa.
Ministerit ataatsimiinneranni siulittaasuuffik Islandimiit Ruslandimut tunniunneqarpoq, taakku qulequttatut pingaarnertut nammanneqarsinnaasumik ineriartorneq tassani pingaarnertut salliutillugit inummiit isigalugu, avatagiiseq aammalu nammanneqarsinnaasumik aningaasatigut ineriartorneq.
Attaveqarnermi paasissutissat:
Juno Berthelsen, Nunanut Allanut, Inuussutissarsiornermut, Niuernermut Silallu Pissusianut Naalakkersusumut allatsi tlf.+ 299 26 73 72 / + 45 53 12 89 72, e-mail: jube@nanoq.gl