AtuartigukTasiilami Qaanaamilu akiuussutissanik kapuinerit ornigarneqarluartut
Tasiilami, Qaanaami nunaqarfiinilu siullermeerluni akiuussutissanik kapuinerit naammassingajalerput, sumiiffinnilu marluusuni inuit tallimat missaanniikkaangata sisamat akiuussutissamik Moderna-meersumik kapitinnissamut neqeroorfigineqarnerminni akuersisarsimapput. Akiuussutissamik kapuisut Tunumi aamma Avannaani angalanerisa peqatigisaanik, akiuussutissamik kapuisut allat Kujataani akiuussutissanik kapueqqillutik angalapput, taakkulu kingullermik angalanerminniit ornigarneqarnerunissartik neriuutigaat.
Nassiussisuuvoq: Peqqissutsimut Naalakkersuisoqarfik
Ornigarneqarluarneq
Akiuussutissanik kapuisuniit innuttaasut ikiuuttorpassuillu nersualaarneqarput. Taakku oqaluttuarput isumagissaarneq malunnarluartoq, aammalu inuppassuit akiuussutissamik kapitikkiartorlutik apuunnissaminnut ikioqatigiittut. Taamaattumik sumiiffiit ilaanni 100%-it tikingajallugit kapitipput.
Nakorsaaneq ilisimatitsivoq, inuit quliugaangata arfineq pingasut imaluunniit qulingiluat kapitinnissaat angusinnaagutsigu, inuiaqatigiinni annertunerusumik tuniluuttoqarnissaa pinngitsoorsinnaagipput. Kisiannili eqqaamaneqassaaq, akiuussutissamik kapitissimanngitsut suli coronamik napparsimarujussualersinnaammata. Taamaattumik inunnut ataasiakkaanut akiuussutissamik kapitinneq Covid-19-imik napparsimarujussualernissamut illersuutaasussaavoq.
Matu tamanut ammavoq
Akiuussutissanik kapuineq pilersaarutit malillugit ingerlapput, aammalu akiuussutissanik kapuisut Kujataani angalaqqipput. Nalunaarutigineqarpoq matut innuttaasunut soqutiginnittunut tamanut ammasut. Kujataani akiuussutissanik kapuineq ornigarneqannginnerpaasoq misigineqareerpoq. Taamaattumik maanna innuttaasut, siullermeerlutik kapitikkusuttut innuttaasunut kapiteqqittussanut ilanngullugit akiuussutissersorneqarnissaannik aaqqissuussisoqarpoq.
Neqeroorut salliutiguk
Nunami isorartuumi aammalu najugaqarfinni avinngarusimanerusuni sapinngisamik amerlanerpaat kapitinnissaat annertuumik aaqqissuunneqartariaqarpoq. Taamaattumik akiuussutissanik kapuisut najuunnerini innuttaasut akiuussutissamik kapitinniarlutik angerlarsimaannarniarnissaat pingaaruteqarpoq. Maanna akiuussutissamik kapitinnissamut neqeroorummut itigartitsiniarluni aalajangertoqarpat, aammalu kingusinnerusukkut isuma allanngortinneqarpat, akiuussutissanik kapuinerup nalinginnaalernissaanut utaqqisoqartariaqarsinnaavoq. Angalasimagaanni akiuussutissanik kapuisut sumiiffigisamiinnerini akiuussutissamik kapitinnissaq tamatigut periarfissaasinnaavoq.
corona.nun.gl aqqutigalugu malinnaagit
Sapaatit akunnerinut tulliuttunut akiuussutissanik kapuinissamut pilersaarut saqqummiunneqareerpoq, aammalu nittartakkami nutaami, corona.nun.gl-imi “Akiuussutissanik kapuinerit” aamma “Akiuussutissanik kapuiffissaq tulleq” ataanni saqqummiunneqarluni. Assersuutigalugu sila peqqutigalugu allanngortoqarsinnaavoq, taamaattumillu nittartakkami malinnaasoqassasoq Corona pillugu Allattoqarfimmiit inassutigineqatigineqarpoq.
Nunatsinnut tikinnissamut piumasaqaatini nutaani sapaatit akunnerannut 600-t tikissinnaalernissaat akuerineqarpoq. Tassalu timmisartut ulikkaartalernissaat ilimanarsivoq. Taamaalilluni Kalaallit Nunaat avammut nunarsuatsinnut ammaanneqaqqittussanngorpoq. Tamanna pissutigalugu innuttaasut akiuussutissamik kapitinnissaat pingaaruteqarpoq, taamaalilluta tikittartut amerliartorneri ilutigalugit akunnitsinni immitsinnullu illersoqatigiinniassagatta.
Sapaatit akunnerata tulliani Uummannaq nunaqarfiilu, Kujataa kiisalu Qeqertarsuaq Qasigiannguillu orninneqassapput. Akiuussutissanik kapuisut qanoq ilinerani najukkannut tikissanersut nakkutiginissaat ornigunnissarlu isumatusaarnerussapput.