AtuartigukSapaatip akunnera 18-imi ataatsimoorfiit peqqinnartut akuutitsisullu
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Sapaatip-akunnera 18-imi Nunatsinni imigassartortarnermi ileqqut imigassartoriaaserlu ukkatarineqartarlutillu eqqartorneqartarput. Ukioq manna sammisami ”Ataatsimoorfiit peqqinnartut akuutitsisullu”-mi meeqqat ilaqutaasalu atugarissaarnerat isumakkullu peqqissuunerat ukkatarineqarpoq.
Ilisimatusarnermit ersersinneqarpoq meeqqat inuusuttullu sammisassaqartitsinerni peqqinnartuni aaqqissuussaasunilu peqataasut imigassamut tupamullu naaggaarnerusartut. Tamatuma saniatigut ataatsimoorfiit peqqinnartut akuutitsisullu meeqqat inersimasullu isumakkut peqqissusaannik pitsaanerulersitsisarput.
Inuppassuit ataatsimoorfiit sammisassaqartitsinerillu kulturimik naleqartitanillu tunngavillit inuunermi nuannaarnerulissutigisarpaat. Tamatumani pineqarsinnaapput pinngortitami ataatsimoorluni sammisaqarneq, soorlu piniaqatigiinneq aalisaqatigiinnerlu, pilineq, pinngortitami nerisassiorneq, illoqarfik nunaqarfilluunniit qimallugu illuaqqami tupermiluunniit unnuinerit.
Sapaatip-akunnera 18 nuna tamakkerlugu malunnartinneqassaaq. Sapaatip-akunnerani 18-imi sammisassaqartitsinernut tapiissutisinissamik illoqarfinnit aqqanilinnit nunaqarfinnillu 21-nit qinnuteqaatit Isumaginninnermut Aqutsisoqarfimmit akuersissutigineqarput.
Sapaatip-akunnera 18 pillugu uani paasisaqarnerugit: www.paarisa.gl
Paasisaqarnerujumallutit Paarisami immikkoortortaqarfimmi aqutsisuugallartoq Tina Evaldsen attavigiuk oqarasuaatikkut +299 34 23 94 imaluunniit e-mailikkut:tiev@nanoq.gl