Atuartiguk”Aalisarneq pillugu inatsisissamut isumaliutissiissummik allalluta aallartippugut”
Nassiussisuuvoq: Aalisarnermut Piniarnermullu Naalakkersuisoqarfik
Aalisarneq pillugu Ataatsimiititaliarsuaq ukiuni marlunni sulisimalerpoq, ataatsimiititaliarsuullu innersuussutissani Naalakkersuisunut, Inatsisartunut aalisarnermillu inuussutissarsiuteqartunut 2021-imi aasakkut saqqummiussassani inaarsaleruttorlugit. Ataatsimiititaliarsuaq marlunngornermi
13. apriili 2021 ataatsimeereerluni ataatsimiittarnissat kiserngoruttut amerlajunnaarput.
- Suli marlussoriarluta ataatsimiinnissarput pilersaarutigaarput isumaliutissiissummi sammisat kingulliit inaarsassallutigit, massakkulli allallugu aallartinnissaanut naammattunik atortussaqalereerpugut. Isumaliutissiissut pilersaarutit naapertorlugit juunip naanerani piariissaaq, Jens Paulsen, Aalisarneq pillugu Ataatsimiititaliarsuarmi siulittaasoq oqarpoq.
Aalisarneq pillugu Ataatsimiititaliarsuup innersuussutaanut oqallissaarummi ”Aalisagaatigut – atugarissaarnerput”-mi novembarimi 2019-imi saqqummersumi sammisat aallaavigineqarput.
Oqaaseqaatit tunuliaqutissiisut saqqummiunneqartut
Aalisarneq pillugu Ataatsimiititaliarsuup suliami naammassiartornerani innersuussutissanut oqaaseqaatit tunuliaqutissiisut ataatsimiititaliarsuarmit akuerineqartut saqqummiunneqarnissaat aalajangiuppaat. Innersuussutissanut tunngatillugit ajornartorsiutit tunuliaqutissiissutini nassuiarneqarput. Tunuliaqutissiissutit tassa innersuussutaanngillat.
- Innersuussutissat isummerfiginissaannut naammattumik ilisimasaqarnissaq siunertaralugu tunuliaqutissiissutit ataatsimiititaliarsuarmi ilaasortanut tunniunneqarput. Tunuliaqutissiissutini sammisat qaammarsaavigineqartut paasisaqarfiginissaannut tamat tassa periarfissaqalerput, Jens Paulsen nassuiaavoq.
Oqaaseqaatit tunuliaqutissiissutit naalakkersuisut.gl-imiittut ilaatigut makkuupput:
- Raajarniarnermi killiffik unammilligassallu
- Nunap immikkoortuani 47-mi sinerissap qanittuani qaleralinniarnerup killiffia unammillernartortaalu
- Oqaaseqaat tunuliaqutsiisoq, sulisoqarnermut aalisarnermi piginnaasanullu ineriartortitsinissamut ilinniarnissamullu tunngasoq
- Sinerissamut qanittumi saarullinniarnermi killiffik ajornartorsiutillu
Paasisaqarnerunissamut siulittaasoq Jens Paulsen attavigineqarsinnaavoq, oqarasuaat +299 55 57 95 imaluunniit e-mail jp@alg.gl.
Aalisarneq pillugu Ataatsimiititaliarsuup suliassai:
”Ataatsimiititaliarsuaq aalisarnermut tunngasuni ineriartortitsinissaq siuarsarniarlugu aamma aalisarnerup aalisakkallu inuiaqatigiinnut tamakkiisumik iluaqutaanissaat qulakkeerniarlugu aalisarnermut inatsisissamut allanullu suliniutinut attuumassuteqartunut siunnersuuteqassaaq.”Aallerfik: Aalisarneq pillugu Ataatsimiititaliarsuup suliassai
Aalisarneq pillugu Ataatsimiititaliarsuup suliassai, oqallissaarut ”Aalisagaatigut – atugarissaarnerput” atortullu allat, soorlu oqaaseqaatit tunuliaqutissiisut siuliani taaneqartut uani nassaarineqarsinnaapput.