Piniarnermut allagartap 2021-mi maajip aallaqqaataa sioqqullugu akilereersima-nissaa eqqaasitsissutigineqaqqippoq

Matumuuna eqqaasitsissutigineqaqqissaaq 2021-mi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaassagaanni piniarnermut allagartap tuttut umimmaallu pillugit nalunaarutit atuuttut naapertorlugit maajip aallaqqaataa sioqqullugu akilereersimanissaa. Tamanna inuussutissarsiutigalugu piniartunut aamma sunngiffimmi pinialuttartunut atuuppoq. Taamaalilluni piniarsinnaanermut allagartaq 2021-mi maajip aallaqqaataa sioqqullugu akilerneqarsimanngippat 2021-mi tuttunniarnissamut umimmanniarnissamullu akuersissutinik qinnuteqartoqarsinnaassanngilaq.

Ukiuni marlunni najugaqareersimanissamut piumasaqaat
Ilanngullugu aamma nalunaarutigineqaqqippoq piniakkanut killilersukkanut, taakkununnga ilanngullugit tuttunniarnissamut umimmanniarnissamullu qinnuteqarsinnaanermut tunngatillugu piffissaq qinnuteqarfiusoq sioqqullugu minnerpaamik ukiuni marlunni ataannartumik Kalaallit Nunaanni najugaqareersimanissaq pillugu piumasaqaat atuutsinneqarmat. Tamanna sunngiffimmi pinialuttartunut taamaallaat atuuppoq.

Akuersissutit utertinneqartussaapput
Ilutigalugu Naalakkersuisoqarfiup kommunit suleqatigalugit paasisimavaa tuttunniarnissamut umimmanniarnissamullu akuersissutit tunniunneqartartut ajoraluartumik affaat inorlugit utertinneqartartut. Akuersissutit pisanillu nalunaaruteqarneq inatsit malillugu piniarnerup naammassineqarnerata kingornatigut kingusinnerpaamik sapaatip akun­nerisa marluk qaangiunneranni utertinneqartussaapput tamannalu pisaqarsimanngikkaluaraanniluunniit aamma atuuppoq. Pisanik nalunaarutit amigartumik utertinneqartarnerat pillugu tuttoqatigiit umimmaqatigiillu ataasiakkaat qanoq peqassutsimikkut pissuseqarneri pillugit paasisimaneqarneri pillugu nalileruminaatsinneqarpoq.


Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl