Quppernerup imarisaanut ingerlaqqigit

Kalaallit Nunaat nunarsuarmiunit COP31-mi tusarnaarneqarpoq

Nassiussisuuvoq: Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik
Naalakkersuisoq, jens-Erik Kirkegaard, Sermersuaq pillugu COP31-mut videokkut inuulluaqqusinera. Assiliisoq: Anton Dahl-Hansen

Kalaallit Nunaannit aallartitat sapaatit akunnerini kingullerni marlunni Naalagaaffiit Peqatigiit silap pissusia pillugu ataatsimeersuartitsineranni COP31-mi, Antalyami Tyrkiamiittumi peqataapput.
Oqariartuutigineqarpoq issittumi pisut nunarsuup sinneranut annertuumik pingaaruteqartut. Silap pissusiata allanngoriartornera pissutigalugu Sermersuaq aakkiartortillugu, tamanna nunarsuup sinneranut assigiinngitsorpassuartigut sunniuteqartarpoq, ilaatigut immap qaffakkiartorneratigut imaanilu sarfap ingerlanerisa allannguuteqarnerisigut. Taamaattumik silap pissusiata allanngoriartorneranut iliuusissanik pilersaarusiortoqartillugu Kalaallit Nunaanni ilisimasat ilanngunneqartarnissaat, Issittumilu allannguutinik namminneq takunnillutik misigisaqartartut tusarnaarneqartarnissaat pingaaruteqarpoq.
COP31-mi aaqqissuussinerit nalaani immikkut sammineqartut pingaarutillit ilagaat Sermersuaq, Sermersuullu aakkiartornerata kingunerisai pillugit ingerlanneqarpoq. Aaqqissuussineq Issittumi Siunnersuisoqatigiinnit, Kunngeqarfimmit 2027 tikillugu siulittaasuuffigineqartumit, aaqqissuunneqarpoq. 

Avatangiisinut, Pinngortitamut, Nukissiuutinut Ilisimatusarnermullu Naalakkersuisunngoqqammersoq Jens-Erik Kirkegaard, Nuummiit videokkut inuulluaqqusivoq. Naalakkersuisup Jens-Erik Kirkegaard erseqqissarpaa silap pissusiata allanngoriartornera aatsaat siunissami pisussatut isigineqarsinnaanngitsoq, nunatsinni Inuit ulluinnarni inuunerminni tamanna malugisinnaareerpaat. Naalakkersuisoq Jens-Erik Kirkegaard-ip inuusuttuulluni nipilersoqatigiit Guns N’ Rosesikkut erinarsugaasa ilaat innersuussutigalugu oqaluttuaraa, Kalaallit Nunaanni novembarimiapillunilu issittaraluartoq maanna siallersinnaalersimasoq soorlu erinarsuut atugaat “November Rain” pineqartoq...
Issittoq pillugu Aallartitaq Kenneth Høegh Antalyami aaqqissuussinermi peqataavoq, nunarsuarmilu siuttut kaammattorpai silap pissusiata allanngoriartornera pillugu isumaqatigiinngissutitik tunulliuteqqullugit.”Piffissami eqqissiviilliorfiusuni inuuvugut. Taamaattorli pinngortitap silallu pissusiata politikkikkut pissutsit apeqqutaatinngilaat […] kinguaariinni inuusuttortagut siunissamut neriuuteqarluartut pitsaanerusumik atugaqarnissaminnut pisinnaatitaaffeqarput.”

Kalaallit nipaat

Kalaallit Nunaannit peqataasut ilagaat Qassiarsummiu savaatilik Ellen Frederiksen aamma Kalaallit Nunaannit inuusuttut aallartitaasa siullersaat Iluliarmiu Najannguaq Berthelsen.
Ellen Frederiksen Inuit Circumpolar Councilimit nunap inoqqaavisa ilisimasaat pillugit ilisimasalittut qaaqquneqarpoq, silap pissusiata allanngoriartornera Kalaallit Nunaanni nunalerinermut ingerlatsinissamut periarfissanut maannangaaq qanoq sunniuteqartigineranik COP-imi peqataasunut oqaluttuaralugit.g.
Najannguaq Berthelsen EU-p OCT Youth Networkianit qaaqquneqarpoq, nunallu silap pissusianut allanngoriartorneranut iliuusissatut pilersaarutinik akuersissuteqartarnerminni inuusuttut nipaat puigunnginnissaannik kaammattuutigalugu, ullumikkutiliuuserisatta kingunerisaat inuusuttut ukiuni amerlasuuni atugaqartussaammata.

Silap pissusiata allanngoriartorneranut iliuusissani nunap inoqqaavisa pisinnaatitaaffiisa pitsaanerusumik illersorneqarnissaat, kiisalu nunat namminersortitat imarpiup akianiittut, soorlu Kalaallit Nunaata, silap pissusianut aningaasaliissutinik pitsaanerusumik pissarsisinnaanissaat Kalaallit Nunaata aallartitaanit COP31-p nalaani sulissutigineqarpoq. 

Aallartitat aamma ilisimatusartunut Kalaallit Nunaanni silap pissusia pillugu ilisimatusarnermik suliaqartunut kaammattuutigaat kalaallit ilisimatusartut, aamma piniartut innuttaasullu allat ilisimasaat, ilisimatusarnermi pitsaanerusumik peqataatittaqqullugit. Arctic Hubimmi nalunaarusiaani nutaami erseqqissarneqarpoq Kalaallit Nunaat pillugu ilisimatuussutsikkut allaaserisat quliugaangata ataasiinnaap missaani Kalaallit Nunaanni ilisimatusartumik suleqateqarfiusartoq.

Paasissutissanik amerlanerusunik pissarserusukkaanni naalakkersuisumut allattaagallartoq Nivi Geisler Kristiansen-Berthelsen attavigineqarsinnaavoq, pan@nanoq.gl

  • Naalakkersuisoqarfimmi pisortaq, Natuk Lund Meire, COP31-imi silarsuarmi silaannaap allanngoriartornerani killiffiit allanngorfiusinnaasut (climate tipping points) pillugit Islandip Nunallu Avannarliit Ministeriisa Siunnersuisoqatigiivisa aaqqissuussaanut oqaligiarnera. Assiliisoq: Joel Sheakoski

  • Issisttumi Aaallartitaq, Kenneth Høegh, silarsuup siuttui kaammattorpai silaannaap illersorneqarnissaa pillugu isumaqatigiinngissutiminnik immikkoortitsillutik suleqatigiinnissaat. Assiliisoq: UN Climate Change – Kubilay Ciftci.

  • OCT Youth Network aqqutigalugu Kalaallit Nunaata aallartitaanut ilaasutut, Najannguaq Berthelsen, inuusuttut aallartitaat COP31-mi peqataatinneqarnissaat inuusuttullu peqataallutillu sunniuteqaqataanissaasa pingaaruteqassusiat immikkut ukkatarai. Assiliisoq: Green Overseas

  • Ellen Frederiksen Qassiarsummiit Inuit Circumpolar Councilimit nunap inoqqaavisa ilisimasaat pillugit ilisimasalittut qaaqquneqarpoq