Quppernerup imarisaanut ingerlaqqigit

Novembarip 19-anni Angutit Nunarsuaq Tamakkerlugu Ulluat pillugu Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisup Mariane Paviasen Jensenip oqaaseqaataa

Nassiussisuuvoq: Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik
Ullumikkut Angutit Nunarsuaq Tamakkerlugu Ulloraat. Arnat Nunarsuaq Tamakkerlugu Ulluat malunnartittarnerattut ullormi matumani angutit ulluat aamma malunnartittariaqarparput. 

Ullormi tamanna pissutissaqarluni atuutsinneqalerpoq. Ullumikkut nunarsuarmi pissutsit eqqarsaatigalugit inuiaqatigiinni angutit nukappiaqqallu immikkut ukkatarineqarnissaat pingaaruteqarluinnartutut isigivara. Arnat assigalugit aamma taakku isummanik pigiliutiinnakkanik ajoqutaasunik ulluinnarni inuunerminnut imminnullu isiginninnerminnut sunniuteqartartunik nalaataqartarlutillu ilungersuuteqarput.

Ajoraluartumik angutit misigissutsiminnik oqaluttuartassannginnerannik suli isumaqartoqartarpoq. Suiaassutsimut taamatut isiginnittaaseq ajoqutaallunilu isummanik pigiliutiinnakkanik tunngaveqartoq isumaqarpunga. Misigissutsit tamarmik akuerineqartariaqarput inissaqartinneqarlutillu, ilaannikkullu allanut oqaluttuarinissaat aalajangiisuulluinnarsinnaavoq. Misigissutsinik oqaluttuarneq pissutigalugu angut “angutivittut” naleqassutsiminik annaasaqarneq ajorpoq. 

Ingammik angutit inuusuttut nukappiaqqallu inuit attaveqaqatigiittarfiini qupperaatillutik sunik takusaqartarnerat tusaraangakku assut ernumalersarpunga. Nunani tamalaani angutit tunuarsimaarnerunissaannik sunniiniarlutik iliuuseqartoqarpoq. Digitalikkut attaveqaqatigiittarfinni “angutiviup” qanoq ittuusariaqarneranik isummat peqqinnanngitsut ajoqutaasullu siaruarsarneqarput. Nunani allani misissuinerit takutippaat angutit inuusuttut nukappiaqqallu internettimi videonik, angutinut tunngasunik isummanik pigiliutiinnakkanik aamma suiaassutsinut pissusissaritinneqartunik ajoqutaasunik siaruarterisunik, takutinneqartaleraluttuinnartut. Internettimilu avatangiisit taamaattut inuusuttortatsinnut sakkortuumik sunniuteqarlutillu ilungersunartunik kinguneqarsinnaapput.

Kingunerisinnaasai nukappiaqqanut kisimi sunniuteqartanngillat. Angutit qanoq pissusilersortariaqarnerannik oqariartuuterpassuit ajoqutaasut iluanni arnat qanoq ittuusariaqarnerannik nikassaasunik isummanik, ilaannikkullu arnanik uumissuisunik peqarpoq. Misissuinerit takutippaat arnat amerlatsikkiartortut angutinit inuusuttunit ataqqineqanngitsumik pineqartarnertik annertusiartortutut misigigaat. Tamanna angutit arnallu akornanni avissaartuutsitsisarpoq, suiaassutsinullu pissusissaritinneqartut aserorsaataasartut, inuiaqatigiinnut iluaqutaanngilluinnartut, suli nakussatsittarlugit.

Taamaattumik inuusuttut allanik periarfissinneqarnissaat pingaaruteqarpoq.

Maligassiuisunik pitsaasunik angutitut misiginneqataasinnaalluni akisussaassuseqarlunilu inuusoqarsinnaaneranik takutitsisinnaasunik pisariaqartitsipput. Inuusuttut inuuneranni peqataasunik isumassarsiorfigisinnaasaminnillu pisariaqartitsipput. Tassaasinnaapput ataataat, angajui, akkaavi imaluunniit angaavi, ilinniartitsisui sungiusaasuiluunniit. 

Inuusuttut takusariaqarpaat angutit ilaqutariinni ataatsimoorfinnilu pitsaasumik peqataagaangata tamanna allanngueqataasartoq. Nukappiaqqamut angummik tarrarsorfigisinnaasaminik, aamma niviarsiaqqamut inooqatigiinneq pitsaasoq ataqqinninnerlu qanoq ittuusariaqarnersut ilinniartumut. Angutit najuuttut, ataqqinnittut isumassuisullu toqqissisimanermik pilersitseqataasarput, suiaassutsinullu pissusissaritinneqartunik ajoqutaasunik allanngortitsinissamut periarfissaqartitsillutik.

Taamaattumik ullumikkut ulloq atorniarpara anguterpassuit maligassiuisut nukittuullu nersorniarlugit,  taakkumi ullut tamaasa angutit kinguaariit tulliuttut tunngaviusumik tunngaveqartumik nunarsuarmilu paasinninnermik oqimaalutaqarlutik ikiuutaasarput, tassani kikkut tamarmik kinaassusaat inissaqartinneqarluni.  Eqqartuunneqaratik, nalilersorneqaratik nakkarsarneqaratillu. Inooriaatsitsinnillu aallussaqaqataasut aamma nersugassaapput. Akisussaaffinnik pimoorussisut tulluusimaarutissaapput. 

Angutinik pitsaasumik maligassiuisuunissaminnik akisussaaffimmik tigusisartunik pisariaqartitsivugut, taakkulu ataatsimoorluta tapersersortariaqarpavut. Angutit inuusuttut nukappiaqqallu aliasukkaangamik imaluunniit silarsuaq paatsiveerunnartutut sapernartutullu misigigaangamikku misigissutsiminnik aniatitsinissamut aamma inissaqarlutillu periarfissaqarnissaat qulakkeertariaqarparput. Kikkut tamarmik naleqarput. Misigissutsiminnik aniatitsiffigisinnaasaminnik nassaannginnertik pissutigalugu amerlanerusunik annaasaqarnissarput inuiaqatigiittut  nammassinnaanngilarput. 

Angutimmi aamma qiasarput.
Angutit aamma annilaangasarput.
Angutit aamma nalornisarput.
Angutit aamma tarnikkut kingunerlutsitsisarput.
Angutit aamma misigissuseqarput.
Angutit aamma ilungersuuteqartarput.

Neriuppunga tamatta inuiaqatigiinnik inissaqartitsinermik assigiinngissutsinillu tunngaveqartunik, kikkut tamarmik inissaqartinneqarfiannik, pilersitseqataallutalu sulissutiginnissinnaasugut. Kinguaariippassuarni iliortarsimanitsitut ikioqatigiiffiusunik imminnullu najorfiusunik. Inuiaqatigiinnik angutit nukappiaqqallu misiginneqataaneq, ataqqinninneq ataatsimoornerlu tunngavigalugit kinaassutsiminnik ineriartortitsisinnaaffiannik – internettimi algoritmit kisiisa tunngaviginagit.

Angutit Nunarsuaq Tamakkerlugu Ulluanni pilluaritsi.