Quppernerup imarisaanut ingerlaqqigit

Upernaviup aamma Qaanaap timmisartuussivigineqarnerannut akisussaaffiup agguagaanera Naalakkersuisut erseqqissarpaat

Nassiussisuuvoq: Attaveqaasersuutinut, Ineqarnermut Isorliunerusunut Upalungaarsimanermullu Naalakkersuisoqarfik
Qaanaami ikaartarfik

Ilulissat, Upernaviup aamma Qaanaap akornanni timmisartumik aqqutit kingullertigut eqqartorneqarnerat tunngavigalugu, tapiiffigineqanngitsumik timmisartumik sullissinerup aammalu pisortanit aningaasalersorneqartumik kiffartuussinissamut isumaqatigiissutit akornanni akisussaaffiup agguagaanera Naalakkersuisut erseqqissarusuppaat.

Ilulissat aamma Upernaviup akornanni timmisartumik aqqutit Air Greenland A/S-imiit tapiiffigineqanngitsumik atugassaqartitsiviusumik ingerlanneqarput. Tamanna isumaqarpoq ingerlatseqatigiiffiup nammineerluni angalanissamut pilersaarut aaqqissuuttaraa, ilanngullugit tapiiffigineqanngitsumik tunngaveqarneq aallaavigalugu aallartussat amerlassusissai, inissat aamma bilitsinut akigititat.

Kisiannili Upernaviup aamma Qaanaap akornanni timmisartumik aqqut Naalakkersuisut aamma Air Greenland A/S-ip akornanni kiffartuussinissamut isumaqatigiissummi ilaatinneqarpoq. Kiffartuussinissamut isumaqatigiissummut siunertaavoq Qaanaamut assartuussinikkut aqquteqarnissaanik qulakkeerinissaq.

Ilulissat aamma Upernaviup akornanni tapiiffigineqanngitsumik timmisartumik sullissineq Qaanaamut kiffartuussinissamut isumaqatigiissuteqarluni timmisartuussinermut ataqatigiissinniarlugu, Air Greenland A/S-ip toqqarsimavaa. Ilaasunut Qaanaamut ingerlasussat inissanik qulakkeeriniarluni, Ilulissat aamma Upernaviup akornanni aallartussamut pineqartumut bilitsinik tuniniaaneq killilerneqartoq, ingerlatseqatigiiffiup tassunga atatillugu paasissutissiissutigaa.

Naalakkersuisut erseqqissassavaat kiffartuussinissamut isumaqatigiissut Qaanaamut assartuussinikkut sullissinermut isumaqatigiissutigineqartumut tunngassuteqarmat aammalu Ilulissat aamma Upernaviup akornanni tapiiffigineqanngitsumik aallartussat amerlassusaannut maleruagassiiviunani. Taamaalilluni aallaaviatigut Upernaviup tapiiffigineqanngitsumik sullinneqarnerata aaqqissuunnissaa Air Greenland A/S nammineerluni akisussaaffigaa.

Air Greenland A/S kiffartuussinissamut isumaqatigiissummi angallaviup ingerlavissaannik allanngortitsinissaq kissaatigalugu Naalakkersuisoqarfimmut saaffiginnippoq, taamaalilluni Qaanaaq siunissami Ilulissaniit toqqaannartumik sullinneqarsinnaaniassammat.

Taamatut allanngortitsinissamut periarfissat misissornissaat Naalakkersuisut piareersimaffigaat. Kisianni allanngortitsisoqassappat Qaanaamut assartuussinikkut sullissinerup isumaqatigiissutigineqartup suli qulakkeersimanissaa aammalu innuttaasunut kiffartuussinissamut isumaqatigiissuteqarluni aqquteqarnissaanik pinngitsuuisinnaanngitsunut siunertaanngitsumik ajorseriartitsinermik malitseqannginnissaa, pingaaruteqarpoq.

Annertunerusumik paasisaqarusunnermi Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfik attaveqarfigineqassaaq, uunga box909@nanoq.gl