Quppernerup imarisaanut ingerlaqqigit

Aalisartut piniartullu ullorsiorneranni Naalakkersuisoq pilluaqqusivoq

Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik

Kalaallit Nunaanni aalisartut piniartullu ullorsiornissi tamassi pilluangaaritsi, tamassilu uummammit pisumik qutsavigerusuppassi tamatsinnut tunniuttakkasi pillugit.

Aalisartut piniartullu inuiaqatigiinni pingaaruteqarluinnartumik inissisimapput. Nunatta aningaasaqarneranut suliffissaqartitsinermullu pingaaruteqarluinnartumik tapersiisarput, aammali kulturitsinnut, ileqqutoqqatsinnut najukkamilu ataatsimoornitsinnut pingaaruteqarlutik. Sulinersi Kalaallit Nunaata ineriartortinneqarneranut imminullu pilersornerulernissatsinnut periarfissatsinnut tunngaviulluinnarpoq.

Aamma aalisartut kattuffiisa suleqatigiilluarsimanerat, qalerallit pillugit isumaqatigiissuteqarnermik kinguneqartoq immikkut maluginiarusuppara. Kattuffiit oqaloqatigiinnikkut suleqatigiinnikkullu aalisartunut inuussutissarsiummullu ataatsimut iluaqutaasussanik ataatsimoorussamik aaqqiissutissarsisinnaammata tamanna nuannaarutigaara.

Ilulissani tikeraarninni isumaqatigiissummik tunniussaqarnissinnut qujanaq. Matumuuna erseqqissarusuppara kissaatigisasi siunnersuutigisasilu pingaartillugit tiguneqarmata. Isumaqatigiissutip imarisaanik iliuusissatut tigussaasunik piviusunngortitsinissaq sulissutigineqalereerpoq, tassalu inatsisiliornermi kiisalu TAC-mut aalisagartassiissutinullu aalajangersaanissami.

Suliassaqarfiit tamaasa pillugit isumaqatigiittuaannarneq ajorpugut, tamannalu pissusissamisoorpoq, soqutigisagut isiginnittaatsigullu assigiinngissinnaammata. Taamaakkaluartoq kattuffiit oqaloqatigilluarsinnaanerannut suleqatigiilluarsinnaanerannullu annertuumik pingaartitsivunga. Oqaloqatigiinnikkut, suleqatigiinnikkut ataqqeqatigiinnikkullu aalisarnermik nukittorsaasinnaasunik inuussutissarsiummilu aallutallit pitsaasumik atugassaqartinneqarnissaannut iluaqutaasussanik aaqqiissutissarsiorsinnaavugut. Neriuppungalu akornatsinni naapeqatigiiffissarsiortarnerput taanna ukiuni tullerni nangittumik anersaaqarfigalugu sulinerput ingerlateqqissagipput.

Naggataatigut tamassi sulilluarsimanissinnut, tunniusimalluarnissinnut inuiaqatigiinnullu pingaarutilimmik ingerlatseqataasimanissinnut qujaffigerusuppassi.

Aalisartut Piniartullu Ulluanni pilluaritsi!

Peter Borg
Aalisarnermut, Piniarnermut, Nunalerinermut Imminullu Pilersornissamut Naalakkersuisoq