2027-mut raajat, saarulliit aamma uiluiit pisassat pillugit aalajangersarneqarpoq

Naalakkersuisut 2027-mut Kalaallit Nunaata Kitaani aamma Tunumi raajat, saarulliit uiluiillu pillugit TAC-mik aalajangersaanissaq akuersissutigaat.

Raajat

Kalaallit Nunaata Kitaa

2027-mi Kalaallit Nunaata Kitaani raajartassiissutit (TAC) 80.000 tonsinut aalajangersarneqarput. Tamanna 2026-mut sanilliullugu 5.000 tonsinik qaffariarneruvoq.
TAC raajarniarnermut aqutsinissamut pilersaarut Kalaallit Nunaata Kitaanut atuuttoq naapertorlugu aalajangersarneqarpoq.

Kalaallit Nunaata Tunua
2027-mi Kalaallit Nunaata Tunua raajarniarnermut TAC 6.500 tonsinut aalajangersarneqarpoq. Tamanna 2026-mut sanilliullugu 500 tonsinik appariarneruvoq.

Saarulliit – avataasiorluni aalisarneq

Kalaallit Nunaata Kitaa

2027-mi Kalaallit Nunaata Kitaani avataasiorluni saarullinniarnermut TAC 16.000 tonsinut aalajangersarneqarpoq. Tamanna siorna killiffiusumut assinguvoq.

Aalisagartassiissutit aqutsiveqarfiit avannarlermut kujallermullu ima agguataarneqarput:
• Aqutsiveqarfik avannarleq (NAFO 1A-1C): 4.800 tons.
• Aqutsiveqarfik kujalleq (NAFO 1D-1F): 11.200 tons.

Kalaallit Nunaata Tunua

2027-mi Kalaallit Nunaata Tunua avataasiorluni saarullinniarnermut TAC 43.500 tonsinut aalajangersarneqarpoq.

Aalisagartassiissutit aqutsiveqarfinnut ima agguataarneqarput:
• Dohrn Banke: 35.500 tons.
• Kalaallit Nunaata kujataata kangia: 8.000 tons.

Dohrn Bankemi aalisagartassiissutit 2026-mut sanilliullugit 1.500 tonsinik ikilisinneqarput. Tamanna pisarineqartartut ikiliartornerannik aalisarnermillu inuussutissarsiuteqartunit nalunaarutigineqartunik tunngaveqarpoq, taakkulu aalisakkat amerlassusaasa appariartortuunerannut takussutissaapput.

Saarulliit – sinerissap qanittuani aalisarneq

Kalaallit Nunaata Kitaa

2027-mi Kalaallit Nunaata Kitaani sinerissap qanittuani saarullinniarnermut TAC 24.815 tonsinut aalajangersarneqarpoq. Taakkunannga 23.315 tonsit inuussutissarsiutigalugu aalisartunut, 1.500 tonsillu sunngiffimmi aalisartunut immikkoortinneqarput.
Ilisimatuussutsikkut siunnersuinermi 2027-mi sinerissap qanittuani saarulliit avannarlermiittut ataatsimut annerpaamik 2.305 tonsinik, kujallermiittullu annerpaamik 3.221 tonsinik pisarineqarnissaat innersuussutigineqarpoq.
Tamatuma saniatigut 2027-mi sinerissap qanittuani angallatinut 6 meterinit takinerusunut immikkut 3.000 tonsinik aalisagartassiisoqarpoq. Angallatit taakku tunngaviusumik sinerissap killinganit 3 sømilit avataani aalisarsinnaapput. Aalisagartassiissutit aqutsiveqarfinnut ima agguataarneqarput: Aqutsiveqarfik avannarleq (NAFO 1A-1C) 1.000 tonsinik, aqutsiveqarfiullu kujalleq (NAFO 1D-1F) 2.000 tonsinik.

Kalaallit Nunaata Tunua

2027-mi Kalaallit Nunaata Tunua sinerissap qanittuani saarullinniarneq killilersugaanngitsumik aalisarnertut aalajangersarneqarpoq, aalisakkat amerlassusaannut ilisimatuussutsikkut siunnersuinissamut suli naammattumik paasissutissaqanngimmat.
Taakku saniatigut inassutigineqarpoq pisassiissutit taakku angallatinit 6 meterinit annernit sinerissap qanittuani 3 sømilit avataanni aalisarneqarsinnaassasut. Tamanna ilaatigut Tunumi aalisarnerup ineriartortinneqarneranut inuussutissarsiutillu unammillersinnaassusiata nukittorsarneqarnissaanut iluaqutaassaaq.

Uiluiit

2027-mi Kalaallit Nunaanni uiluerniarnermut TAC 2.520 tonsinut aalajangersarneqarpoq. Tamanna ukiut siuliinut assinguvoq.
TAC-mut aalisagartassiissutinut takussutissiaq uani nassaarineqarsinnaavoq: Naalakkersuisut.gl

Aalisagartassiissutit aamma GFJK-p nittartagaani takuneqarsinnaalissapput. Tassani ullut tamaasa nutarterneqartumik aalisagartassiissutit malinnaaffigineqarsinnaapput.
Paasissutissat sukumiinerusut pillugit Aalisarnermut, Piniarnermut, Nunalerinermut Imminullu Pilersornissamut Naalakkersuisoqarfik attavigineqarsinnaavoq uunga: apn@nanoq.gl