Avannaata Qimussersuanut tapiissutit pillugit nassuiaat

Ippassaq Nunatta Karsiata naatsorsuutaanik Inatsisartuni oqaluuserinninnermut atatillugu uannut Ilinniartitaanermut, Kultureqarnermut, Timersornermut Ilageeqarnermullu Naalakkersuisumut tatiginninnginnermik saqqummiussisoqarpoq. Tamatumunnga atatillugu innuttaasut eqqarsaatigalugit suliami tapiissutinut tunngasumi pissutsit piviusut inatsisitigullu tunngavigineqartut pillugit nassuiaateqarnissaq pingaaruteqartutut isigaara. Siunertaavoq suliap ingerlasimanera, aningaasaliissuteqarnermut tunngaviusoq kiisalu tapiissutit atorneqarsimanerannik Naalakkersuisoqarfiup malitseqartitsinera pillugit erseqqissaassuteqarnissaq.

Naalakkersuisut Kalaallit Nunaanni Qimussertartut Kattuffiannut (matuma kingorna KNQK-mik taaneqartussamut) Avannaata Qimussersuanik ingerlatsinissamut tapiissuteqartarput. Tamanna Kulturikkut ingerlatsineq sunngiffimmilu sammisassaqartitsineq pillugit Inatsisartut inatsisaat nr. 5, 6. juni 2016-imeersoq naapertorlugu pisarpoq.

Siumup tatiginninnginnermik siunnersuutaata saqqummiunneqarnerani Inatsisartut inatsisaanni § 38, § 40, imm. 1, aamma § 41, imm. 1 innersuussutigineqarput. § 38-ip imarisai imaapput:

  § 38.  Aningaasanut inatsimmi aningaasaliissutissatut aalajangersakkat iluini Naalakkersuisut kulturikkut ingerlatsinermut sunngiffimmilu sammisassaqartitsinermut tapiissuteqassapput.

Qimussimik sukkaniunnermut tapiissutit taamaalillutik aningaasanut inatsimmi kontumi pingaarnermi 40.95.01-imi, Eqqumiitsuliornermut kulturimut tapiissutit allat, aningaasaliissutit iluanni tunniunneqarsimapput.

Inatsisartut inatsisaanni § 40, imm. 1-ip imarisai imaapput:

 § 40.  Kulturikkut ingerlatsinissamut sunngiffimmilu sammisassaqartitsinissamut Naalakkersuisunit tapiissutisisut tapiissutit siunertamut atorneqarnerat uppernarsassavaat tamannalu pillugu piumasaqartoqarneratigut uppernarsaasissallugit.

Aalajangersagaq tapiissutinik tigusisumut sammitinneqarpoq, taamaattumillu KNQK-mut Avannaata Qimussersua 2025-imut atatillugu 2025-mi tapiissutigineqartunut tunngatillugu isigineqassaaq. Naalakkersuisoqarfiup 2025-mi tapiissuteqarnermini aningaasaliissuteqarnermut allakkamini allassimavaa tapiissutit missingersuutit naapertorlugit atorneqanngippata tapiissutit tamakkerlugit ilaannaakortumilluunniit utertillugit akileqquneqarsinnaasut. Tamatuma saniatigut naatsorsuutinik nassiussinissamik piumasaqaateqartoqarpoq. KNQK-p qimussimik sukkaniunnermut naatsorsuutit ulloq 4. november 2025 nassiuppai. Naalakkersuisoqarfiup naatsorsuutinik misissuinerata kingunerisaanik sukumiinerusumik misissuisoqarnissaa pisariaqalersimavoq, tamannalu nakkutilliinermut tunngasumik suliassamik aallartitsinermik kinguneqarsimavoq.

Ulloq 24. februar 2026 KNQK nutaamik qinnuteqaateqarpoq. Tamatumuuna Avannaata Qimussersua 2026-ip, ulloq 28. marts 2026 ingerlanneqartussap, ingerlanneqarneranut tapiissutit qinnutigineqarput. Tapiissutit ulloq 20. marts 2026 akuersissutigineqarput.

2026-mi tapiissutit tunniunneqannginneranni KNQK-p siulersuisui naatsorsuutit tapiissutillu atorneqarsimanerat pillugit ataatsimeeqatigaakka. Tassunga atatillugu aningaasaqarnermik aqutsinerup annertuumik sukateriffigineqarnissaanik kiisalu siunissami kukkunersiuisumik naalagaaffimmit akuerisaasumik imaluunniit nalunaarsorneqarsimasumik atuinissamik piumasaqaateqarpunga. Siulersuisut piumasaqaatit taakku akuersaarpaat, ilisimatitsissutigalugulu ukioq manna atuutilereersumik naatsorsuutinik nalunaarsuisartumik piukkunnaatilimmik toqqaasoqarsimasoq, taamatuttaarlu kukkunersiuisumik naalagaaffimmit akuerisaasumik imaluunniit nalunaarsorneqarsimasumik atuinissamik piumasaqaat akuerineqartoq.

Tamatuma saniatigut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq ataatsimiinnissamut qaaqquara. Siunertaavoq 2025-mi tapiissutit atorneqarsimanerannut tunngatillugu nakkutilliinermut tunngasumik suliaq pillugu ilisimatitsinissaq kiisalu KNQK-p marts 2026-mi qimussimik sukkaniunnissamut tapiissutinik qinnuteqaataata suliarineqarneranik oqaloqatigiinnissaq.

Tamanna tunngavigalugu ataatsimiinnerup kinguninngua aalajangerpunga 2026-mut aningaasanut inatsimmi tapiissutitut naatsorsuutigineqartut tunniunneqassasut. Taamaattorli qinnuteqaammi missingersuutit tunngavigalugit aningaasat siunertanut allanut tunngassuteqartutut nalilerneqartut ilanngaatigineqarput. Aalajangiineq pissutsinik ataasiakkaanik naliliinermik tunngaveqarpoq, ilaatigut siunissami kukkunersiuisumik atuinissamik erseqqissunik piumasaqaateqarnikkut kiisalu pissutsinik maleruagassanut naapertuutinngitsutut paasineqartunik malitseqartitsisoqarnissaa naatsorsuutigalugu.

Uannut aalajangiisuusimavoq qinnuteqaatip siunertaata iluaqutaassusaatalu sukumiisumik nalilersorneqarnissaat kiisalu tapiissutinut piumasaqaatit aalajangersarneqartut malinneqarnissaat qulakkiissallugu, matumani eqqortumik tamakkiisumillu naatsorsuusiornissamik piumasaqaat ilanngullugu.

§ 41, imm. 1-ip imarisai imaapput:

  § 41.  Tapiissutisisimasoq eqqunngitsunik paasissutissiisimappat, tapiissutisinissamut piumasaqaatit naammassineqanngippata imaluunniit tapiissutit aningaasaliissutigineqartussanut siunertanut allanut atorneqarsimappata tapiissutit aningaasaliissutigineqarsimasut tamakkiisumik ilaannakuusumilluunniit utertillugit akilerneqarnissaat piumasarineqarsinnaavoq.

Nakkutilliinermut tunngasoq suliaq naammassineqareermat tapiissutit ilaannik utertitsilluni akiliisitsinissamik piumasaqaateqarnissamut tunngavissaqartoq paasineqarpoq. Tassunga atatillugu KNQK-mik tapiissutit ilaasa taakku utertillugit akilerneqarnissaannut piumasaqaatit pillugit isumaqatigiissuteqartoqarpoq.

Tamanna tunngavigalugu kulturikkut sunngiffimmilu ingerlatsineq pillugu Inatsisartut inatsisaanni aalajangersakkat taaneqartut arlaat sorleq unioqqutissimaneriga takujuminaappoq. Tassunga atatillugu aamma oqaatigineqassaaq Kukkunersiuinermut Ataatsimiititaliap isumaliutissiissutaani aalajangersakkanik taaneqartunik inatsisinilluunniit allanik unioqqutitsisoqarsimaneranik allassimasoqanngimmat.

Annertunerusumik paasisaqarusukkaanni Naalakkersuisup allattaanut Kresten Lennertimut saaffiginnittoqarsinnaavoq, e-mailikkut krlt@nanoq.gl imaluunniit oqarasuaatikkut +299 345675.