Kuannersuit pillugu eqqartuussivimmi suliaq Naalakkersuisunit sivitsorsarneqanngilaq

ETM, ingerlatseqatigiiffik Greenland Minerals A/S-imut tunuliaqutaasoq ulloq 28. oktober aningaasanut niuerfimmi nalunaarummik nassiussivoq, ingerlatseqatigiiffiup tassani Naalakkersuisut Kuannersuit pillugu eqqartuussivimmi suliami sivitsorsaaneranik pisuutillugit.

ETM aningaasanut niuerfimmi nalunaarumminni ilaatigut allappoq Naalakkersuisut isummernissaat ukiut sisamat affarlu utaqqisimallugu. Aammalu Naalakkersuisut suliami tunniusimanissaat ujartorlugu.

Naalakkersuisut ingerlatseqatigiiffiup isornartorsiuinera ilisarisinnaanngilaat.

Akissutissap allaaserineranik tunniussinissamut piffissamut killigititap kinguartinneqarnissaa Naalakkersuisut eqqartuussissuserisuisa qinnutigisimagaat, eqqorpoq. Kinguartitsinissamik kissaateqarnermut tassunga pissutaavoq, akissutissap allaaserineqarnerata nutsertinnissaanik pisariaqartitsineq. Tamannalu suliami Naalakkersuisut isummersinnaanissaannut pisariaqarluinnarpoq.

Aammalu Naalakkersuisut suliap ingerlanera tamaat tunniusimasimapput, suliallu ingerlanissaanut suliassatik suliarisimallugit.

Suliap sivisuumik ingerlanerata Naalakkersuisuni pissutsinik pissuteqartoq, ersarinnerpaamik ilumuunnginnerarneqarsinnaavoq. Tamanna isumaqatigiissitsiniarnermut eqqartuussivimmit uagutsinnut oqaatigineqarsimavoq. Isumaqatigiissitsiniarnermut eqqartuussiviup aalajangiinermini 9. marts 2026-meersumi erseqqissarpaa:

”[…] [Naalakkersuisut] aqutsisumik suleqatigiinnik sulisoqarlutik suliassaq ingerlassimagaat, [Naalakkersuisut] suliap ingerlanerani eqqartuussivimmi suliassami isumaqatigiinngissutaasut tamarluinnangajammik aalajangiiffigineqarneranni ilalerneqarsimasut, aammalu [Naalakkersuisut] suliap ingerlanerani [ETM-ip ingerlatseqatigiiffianit immikkoortortaasumit] kimigiisiutigineqartunit eqaannerusumik, pisariinnerusumik akikinnerusumillu periaaseqarnissamut siunnersuuterpassuarnik saqqummiussisimasut. Tassani ilaatigut pineqarput aalajangiisinnaatitaanermut apeqqutip suliarineqarneranut piffissaq pillugu apeqqut, tamatumunnga atatillugu uppernarsaasersuinerup annertussusaa, allaganngorlugu imaluunniit oqaasiinnarnik tunngavilimmik aalajangiinissaq pillugu apeqqut kiisalu oqaasiinnartigut isumaqatiginninniarnerup ilusissaa sivisussusaalu.”

Múte B. Egede oqarpoq:

”Nutserinissaq siunertaralugu kinguartitsinissamik Naalakkersuisut kissaateqarnerannut ETM akerliusimavoq, tamatumalu takuteqqippaa nunamut suliaqarfiusumut ingerlatseqatigiiffiup pissuseqaataa. Kalaallit Nunaannut inuiannullu kalaallinut paasinnissinnaannginneq ataqqinninnginnerlu ingerlatseqatigiiffiup suliap ingerlanera tamaat takutitsisimanini nangillugu pivoq.
Suliassami eqqartuussivimmi allakkiat aalajangiisuulluinnartut kalaallisut pigineqartariaqarnerat pissusissamisoorpoq. Imarisai tamakkiisumik ilisimanagit, suliassami taama pingaaruteqartigisumi allakkianik naalakkersuisut akuersissuteqarnissaat piumasarineqarsinnaanngilaq. Tamanna ingerlatseqatigiiffimmut arlaannulluunniit, nunami sumiluunniit suliaqarnissamik kissaateqartumut, ersarilluinnartariaqaraluarpoq.”

Tusagassiortut saaffiginninneranni saaffigineqassaaq:
Jørgen T. Hammeken-Holm, Naalakkersuisoqarfimmut pisortaaneq
E-mail: joeh@nanoq.gl
Tlf.nr.: +299 346846