Avataasiornermi aalisakkat aalajangersimasut pillugit 2027-mut TAC aalajangersarneqarpoq

Naalakkersuisut Kitaani aamma Tunumi avataasiornermi aalisakkat aalajangersimasut pillugit 2027-mut TAC aalajangersarneqartoq ulloq 2. november akueraat.

Qalerallit

Kalaallit Nunaata Kitaa

Kalaallit Nunaata kitaani avataasiorluni qalerallit 2027-mi pisarineqarsinnaasut 17.309 tonsinut aalajangersarneqarput. Tamanna ukioq kingullermut sanilliullugu 355 tonsinik ikileriaataavoq. TAC-p aalajangersarneqarnera ukioq kingullertuulli aarlerinaateqarpoq (Fmsy). Aalisakkat agguataarneqarput aamma pisarineqarsinnaasut Canada peqatigalugu aalajangersaaffigineqarput.

Tunu

Tunumi avataasiorluni qalerallit 2027-mi pisarineqarsinnaasut 8.243 tonsinut aalajangersarneqarput. Taakku ukioq kingullermut sanilliullugit 349 tonsinik amerleriarput. Islandilu isumaqatigiissut naapertorlugu pisarineqarsinnaasut aalajangersarneqarput.

Suluppaakkat

Tunumi avataani suluppaagarniarnermi (Sebastes Norvegicus) 2027-mi pisarineqarsinnaasut 4.732 tonsinut aalajangersarneqarput. Taakku ukioq kingullermut sanilliullugit 217 tonsinik amerleriarput. Islandilu isumaqatigiissut naapertorlugu pisarineqarsinnaasut aalajangersarneqarput.
Tunumi suluppaagartassat pillugit aqutsinissamik pilersaarut naapertorlugu immami itisuumi suluppaakkat (Sebastes mentella) 2027-mi pisarineqarsinnaasut immikkut 300 tonsinut aalajangersaaffigineqarput.

Aalisakkat minnerusut pillugit pisassiissutit.

Tinguttuut, tupissutit, nataarnat aamma qeeqqat pisarineqarsinnaasut aalajangersaavigineqarput. Aalisakkat taakku siuliani pineqartunik aalisarnerni saarullinniarnernilu pingaarnertut pisarisoorneqartarput. Kalaallit Nunaata kitaani qeeqqat pisarineqarsinnaasut 227 tonsinut aalajangersarneqarput, taakkulu ukioq kingullermut sanilliullugit 548 tonsinik ikileriarput. Kalaallit Nunaata kitaani tinguttuut 2027-mi 150 tonsinut pisassiissutigineqassasut aalajangersaasoqarpoq. Aalisagaqatigiit taakkua siornatigut pisassiissutissaannik aalajangiisoqarnikuunngilaq.

Pisarineqarsinnaasut pisassallu Naalakkersuisut.gl-imi takussutissianngorlugit takuneqarsinnaapput.
Pisassiissutit GFJK-p nittartagaani, ullut tamakkiallugit pisassiissutinit pisarineqartut malinnaaffigineqarsinnaasartumi, aamma takuneqarsinnaapput.

Paasissutissat amerlanerit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut ugguuna saaffiginnissinnaapput; apn@nanoq.gl.