Jens-Frederik Nielsen: Mittarfittaarnitsinni nunarput ineriartortissavarput

Ilulissani mittarfiup ammarnera tassaavoq nunatta Ilulissallu oqaluttuarisaanerani pisoq pingaaruteqarluinnartoq. Naalakkersuisut Siulittaasuat tamanna ilaatigut oqalugiarnermini eqqaavaa.

Maannalu 2.200 meterisut takitigisumik mittarfittaarpugut, nunarsuarmut aqqutissat nutaat ammaanneqarput. Mittarfik nutaaq aqqutigalugu København-imut toqqaannartumik timmisartuussineq aallartinneqarpoq, kiisalu nunatta avannaanut angallanneq pisariunnginnerulerluni.

• Ilulissani mittarfik nutaaq mittarfiinnaanngilaq. Mittarfiliornermi aqqutinik nutaanik pilersitsivugut. Mittarfiliornermi periarfissanik nutaanik pilersitsivugut. Mittarfiliornermi nunarput ineriartortipparput, Jens-Frederik Nielsen oqarpoq.

Naalakkersuisut Siulittaasuat erseqqissarpaa nunatta ataqatigiissarneqarnerani attaveqaatit pitsaasuusariaqartut. Suliffeqarnerup ilinniartitaanerullu iluani periarfissat pitsaanerulissapput kiisalu ilaquttanik tikeraarniarnermi aqqutissat pitsaanerulissallutik.

Naalakkersuisup Siulittaasuat suleqataasorpassuarnut qujassuteqarpoq. Ilaatigut Greenland Airports-mi sulisunut, Air Greenlandimut, qallunaat Naalagaaffiannut kiisalu Ilulissani innuttaasunut qujassuteqarluni.

• Periarfissat nutaat pilersinneqaraangata allannguutissat aamma nutaat takkuttarput. Oqaloqatigiinnerit ingerlanneqassapput siunissamilu takkukkumaartussanut tamatta akisussaaqataalluta peqataasariaqarpugut. Aqqut nutaaq atorluartigu – immitsinnut qanillinerulluta nunarsuarmullu aamma qanillinerulerluta, Jens-Frederik Nielsen ilaatigut oqarpoq.

Sukumiinerusumik paasissutissat pillugit attaveqarfissaq: Naalakkersuisut Siulittaasuanut allatsi Inuujuk Petersen, inpn@nanoq.gl