Nunani avannarlerni naligiimmik suleqatigiinnissamik kissaateqarneq Múte B. Egedep ersarissarpaa

Assi: Stine Østby/norden.org

Nunat Avannarliit Siunnersuisoqatigiivisa 78-issaanik ataatsimiillutik oktobarip 27-ani, 28-anilu Helsinkimi ataatsimiinnerini Nunanut Allanut, Inuussutissarsiornermut, Aatsitassanullu Naalakkersuisoq Múte B. Egede peqataavoq. Nunani avannarlerni politikkikkut ataatsimeersuaarnerni annersaavoq, tassanilu inatsisartut kiisalu naalakkersuisut peqataasarlutik. Nunat Avannarliit Siunnersuisoqatigiivisa nuna siulittaasoqarfigisaanit, ukioq manna Finlandiusumit, ataatsimiinneq aqunneqarpoq.

Ataatsimiinnermi nunanut allanut, illersornissamullu politikkimut tunngatillugu oqallinnermi Múte B. Egede peqataavoq. Ataatsimiinnermut atatillugu Issittoq pillugu nunanut allanut naalakkersuisut ataatsimiinnerini Múte B. Egede aamma peqataavoq.

Kalaallit Nunaata, Kunngeqarfik Danmarkip aamma USA-p akornanni illersornissamut isumaqatigiissut, EU-p issittumut periusissiaa pillugu Issittumilu Siunnersuisoqatigiit Siulittaasoqarfiani Naalakkersuisut inissisimanerat, NATO-llu Issittumiinnerulernera ataatsimiinnerni Naalakkersuisut ilisimatitsissutigaat.

Helsingforsimi isumaqatigiissut nutarterneqarsinnaanera, ukioq manna ataatsimiinnermi sammisaavoq pingaarutilik. Nunani avannarlerni naalakkersuisut suleqatigiit 2026-mi marsimi aalajangerput, Helsingforsimi isumaqatigiissutip nutarterneqarnissaanut isumalioqatigiissitamik pilersitsiniarlutik. Nunat Avannarliit Siunnersuisoqatigiivini aamma Nunani Avannarlerni Naalakkersuisut Siunnersuisoqatigiivini nunat avannarliit aaqqissuussamik suleqatigiinnerini sinaakkutit Helsingforsimi isumaqatigiissutip nassuiarpai.

Pingaartumik nunat tamalaat akornanni politikkitigut immikkut inissisimanitsinni Nunani Avannarlerni naligiimmik suleqatigiinnissap pingaaruteqassusia Múte B. Egedep tassani ersarissarpaa. Taamaalilluni suleqatigiinnermi Kalaallit Nunaata naligiimmik suleqataalernissaa siunertaralugu, Helsingforsimi isumaqatigiissutip nutarterneqarsinnaanera misissorneqassasoq Naalakkersuisunit kissaatigineqarsimavoq.

Múte B. Egede imak oqaaseqarpoq:

”Piffissaq kingulleq nunanut allanut politikkitigut unammillernartoqarsimavoq pissutsilli aamma periarfissiisimapput, nutaanillu suleqateqalersimalluta. Maannakkut akornatsinni akioriilluni oqallinnissamut, avissaartuunnissamullu piffissaanngilaq. Naligiinneq tunngavigalu suleqatigiinnissamut piffissanngorpoq.
Tamanna pillugu suleqatigiinnermut sinaakkutit 2026-mi nutarterneqarnissaannik nunat avannarliit anguniagaqarmata naammagisimaarinnippunga. Piviusumik naligiinneq tunngavigalugu suleqatigiilernissap anguniarneqarneranut eqeersimaartumik peqataavugut. Nunat Avannarliit suleqatigiinnerini nunanik assigiinngisitsisoqarluni aaqqissuussisimaneq kissaatigiunnaarparput. Piviusumik naligiilluni suleqatigiinnerup anguneqarnissaa Naalakkersuisut peqataasinnaaneranut aalajangiissuuvoq.”

Naalakkersuisut Siulittaasuat kiisalu Nunat Avannarliit Siunnersuisoqatigiivini Inatsisartut ilaasortaatitaat marluk, Nunat Avannarliit Siunnersuisoqatigiivisa ataatsimiinnerini aamma peqataapput.

Attavissaq: Paasissutissanik ersarinnerusunik pissarsiniarnermi naalakkersuisumut allatsi Niels Dorph, mailimut: ndor@nanoq.gl-imut attavigineqarsinnaavoq.