Nunani avannarlerni aqutsisut meeqqanik inuusuttullu internetimik atuisarnerini illersorusuppaat

Nunani avannarlerni aqutsisut Marienborgimi nalunaarut, meeqqanik inuusuttullu internetimik atuisarnerini illersuinissamik imalik, marlunngornermi oktobarip ulluisa 27-ani atsiorpaat. Helsinkimi N8-t ataatsimiinnerini, Naalakkersuisut Siulittaasuata Jens-Frederik Nielsenip peqataaffigisaata, nalaani tamanna pivoq.

Nunani avannarlerni aqutsisut isumaqarput, digitalikkut attaveqaatit allaanerusumik ilusilersorneqartariaqartut.
Nunani avannarlerni aqutsisut naapertorlugit oqaluttuarisaanermi kinguaariit ilikkagaqarniarnerminni inuulluataarnissaminnilu ukkissisinnaannginnerusut aatsaavissuaq pilerseratarsinnaagigut. Meeqqat amerlavallaartut timiminnik aalatitsinatik allamullu saatinneqartuaannarlutik alliartorput.

Nalunaarutip atsiorneqarneratigut aqutsisut imminnut Europami nunanilu tamalaani ineriartornermik killormut saatitsiniarlutik suliniarnissaminnut pisussaaffilerput.

Naalakkersuisut Siulittaasuat, Jens-Frederik Nielsen:

- Meerartagut inuusuttortagullu ilumuuillunga ernummatigaakka. Digitalip silarsuaanik atuisinnaanngortinnikuuagut, naak inersimasorpassuit taakkunannga qanoq atuinissaminnik nalorsartartut ilisimagaluarlugu. Nunarsuaq uukapaatitsiniarnernik, paasissutissanik eqqunngitsunik, toqqorterluni sunniiniarnermik aalajangersimasumillu ilioqqusinermik tatisimanninnermik ulikkaarpoq.
- Kinguaariinuku qanorittut ilusilersorlugit aallartissimasugut? Kinguaariit nunarsuarmi pissutsinik piviusunik pisartunut ungasittorujussuit ullumikkut perorsariaannaavagut. Kinguaariit sunnerniartittuaannaavittut, eqqissillutik ilinniarnissaminnut ukkassinissaminnullu ajornartorsiuteqartartut.
- Tamannali soorunami tamanut atuutinngilaq. Inuit attaveqartarfiini ataatsimoornerit aamma pilersinneqartarput kiisalu ilisimasassarsiornissamik periarfissiisarlutik. Taakkuali ajoqutissartaannut tappiillissanngilagut.

Jens-Frederik Nielsenip oqarnera naapertorlugu meeqqatta alliartorneri algoritmenut aamma teknikikkut suliffeqarfissuarnut isumagisassanngortissanngilagut.

- Meeqqat inuusuttullu inersimasunik killiliisartunik aamma digitalimut tunngasunik apeqqusiisinnaasunik pisariaqartitsipput. Teknikimut akerliuneq matumani pineqanngilaq, meeqqavulli inuusuttortavullu illersorneqarnissaat pineqarluni.

Marienborgimi nalunaarut uani atuarneqarsinnaavoq