Meeqqat tapersersorneqarnissaannut inatsit kommuninik partiinillu qanimut suleqateqarluni nutarterneqassaaq

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisup Mariane Paviasen Jensenip Meeqqat tapersersorneqarnissaannut Inatsisartut inatsisaata nutarterneqarnissaanut atatillugu Inatsisartuni partiit tamaasa aallarniutaasumik oqaloqatiginerat aammalu kommuninut suleqatigiissitsinerit, maanna naammassivai

Ataatsimiinnerit suleqatigiissitsinerillu siunertaraat sulinerup aallartinneraniilli peqataatitsinissaq siammasissoq qulakkiissallugu aammalu ulluinnarni meeqqanik, inuusuttunik ilaqutariinnillu qanimut sullissisut misilittagaannik, isiginnittaasiinik siunnersuutaannillu katersinissaq.

"Inatsisip nutarterneqarnerani sulinerup ataatsimut aallaaveqarnissaa qulakkiissallugu uannut aalajangiisuusumik pingaaruteqarsimavoq. Kommunit partiillu naleqarluartunik misilittagaqarput ilisimasaqarlutillu, taakkulu ilanngunneqarnissaat pingaaruteqarpoq inatsit meeqqat ilaqutariillu pisariaqartitaannik suli annertunerusumik tapersersuisoq qulakkiissagutsigu," Naalakkersuisoq Mariane Paviasen Jensen oqarpoq.

Oqaloqatigiinnerni erserpoq kommunit partiillu akornanni inatsimmi inatsisinik allanngortitsinissamik pisariaqartitsineq aammalu unammilligassat iliuuseqarfigineqartussat pillugit annertuumik isumaqatigiittoqartoq. Isummersuutit siunnersuutillu amerlasuut taakku Naalakkersuisoqarfiup inatsisip allanngortinneqarnissaanut siunnersuummik suliaqarneranut ingerlaqqittumut maanna tunngavissiipput.

"Kommunit partiillu akornanni annertuumik isumaqatigiittoqarnera nuannaarutigaara. Soorunami isiginnittaatsit pingaarnersiuinerillu ilaatigut assigiinngikkaluartut, inatsit qanoq nukittorsarneqarnissaanut ataatsimoorussamik kissaatit isumassarsiallu amerlasimapput. Tullertut suliassaassaaq isummersuutit amerlasuut ataatsimoortillugit katersornissaat oqimaalutarnissaallu aammalu allannguutissatut siunnersuummut ataqatigiissumut ilanngunnissaat. Tassani isiginnittaatsit pisariaqartitallu saqqummiunneqartut sapinngisamik ersersinniassavagut” Naalakkersuisoq Mariane Paviasen Jensen oqarpoq.

Naalakkersuisup peqatigisaanik erseqqissarpaa inatsisip nutarterneqarnerani meeqqat ilaqutariillu tapersersorneqarnerisa nukittorsarneqarnissaat kisiat pineqanngitsoq, aammali kommunit sulinerminni atugaat piviusut inatsimmi annertunerusumik tarrarsorfigineqarnissaat qulakkeerneqassasoq.

"Uannut pingaartitat ilaat tassaavoq kommunit sulinerminni atugaat piviusut inatsimmi annertunerusumik aallaavigineqarnissaat, taamaalilluni meeqqat ikiorserneqarnissaat pilertornerusoq anguneqarsinnaaniassammat. Inatsiseqassaagut meeqqat ilaqutariillu tapersersorneqarnerannik nukittorsaasumik, peqatigisaanilli kommunit isumalluutaannik, piginnaasaatigut periarfissaannik aammalu ulluinnarni sulinerminni unammilligassaannik eqqarsaatiginnittumik," Naalakkersuisoq oqarpoq nangillunilu:

"Kommuninik partiinillu oqaloqateqarnikka pissarsiffiusut nuannaarutigeqaakka. Ataatsimut piumassuseqarneq Kalaallit Nunaanni meeqqat ilaqutariillu tapersersorneqarnerisa nukittorsarneqarnissaannik sulinerup ingerlaqqinnissaanut patajaatsumik tunngavissiivoq," Naalakkersuisoq Mariane Paviasen Jensen oqarpoq.

Naalakkersuisup Meeqqat tapersersorneqarnissaannut Inatsisartut inatsisaata allanngortinneqarnissaanut siunnersuut Inatsisartunut 2027-mi upernaakkut ataatsimiinnermi saqqummiunneqarnissaa siunertaralugu sulissutigaa.


Attavissaq
Sukumiisumik paasisaqarusukkuit Naalakkersuisumut Allatsi Misu Benjaminsen e-mailikkut mibe@nanoq.gl imaluunniit oqarasuaatikkut: +299 24 79 51 attavigiuk.