Imarisassat tusarnaarlugit atuarlugitNaalakkersuisut nunatsinni peqqissaaviit oqartussaassuseqarnerat annertusarumavaat
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Peqqissaavinni sulisut annertunerusumik aalajangeeqataanissaminnut oqartussaassuseqassasut anguniagaavoq. Naalakkersuisut nalunaarut 2011-meersoq allanngortikkumavaat, akisussaaffik aalajangeeqataasinnaanerlu sumiiffikkaartuni nukittorsarumallugu.
Ukiuni amerlavallaani nunatsinni peqqissaaviit ulluinnarni ingerlatsinerminni qitiusumiit aqunneqarnerannik aallaaveqarsimavoq. Sulisuusut tikkuarpaat qitiusumiit aqutsisut taarseraannerat peqqutaalluni, patajaatsumik ingerlaavartumillu ineriartortitsinissap kalluartaraa. Taassumap saniatigut sumiiffinni sulisuusut killilimmik sunniuteqarsinnaanerat, sulinerminni aammalu innuttaasut peqqinnissaqarfimmut saaffiginninnerannut kalluaasinnaasoq.
Tamanna Naalakkersuisut allanngortikkumavaat.
Peqqissaaviit periarfissikkumavagut namminneerlutik ineriartortitsinissamut akisussaaqataanissaannut aammalu sulisoqarnikkut sunniuteqarluarsinnaanerannut. Sulisuusut aqutsisuusullu sumiiffinni pissutsinut ilisimannittuupput, taamaalillutik periarfissaqarnerussapput aaqqiissutissanik aalajangiinissaminnut.
Patajaatsumik suliffeqartitsinikkut anguniagaavoq aammalu sulisut pikkorissut attanneqarnissaannut peqqinnissaqarfiullu innuttaasut pisariaqartitaannut tulluarsarneqarluni. Aalajangiinerit sapinngisamik sumiiffinni innuttaasunut pineqartunut naapertuutissapput.
Sumiiffinni sunniuteqarsinnaanerup annertusinissaa isumaqanngilaq pitsaassutsimut akisussaaffik annikinnerulissasoq.
Qitiusumik peqqinnissaqarfiit suli pitsaassutsimik aammalu ataqatigiittumik peqqinnissaqarfiup ineriartortinnissaanut pisussaaffeqassapput. Taamaattorli suleqatigiinnerup sumiiffinni sulisuusunut tatiginninnerusumik aammalu akisussaaffiup aggulunnera piginnaassallu ersarinnerussapput.
Siunertaavoq peqqissaaviup sulinermini namminerisamik aamma aalajangiisinnaanera taamatullu siunissami suliassanut akisussaaqataanissaat.
Nalunaarut pisortatigoortumik tusarniaassutigineqarumaarpoq.
Tamatuma saniatigut peqqinnissaqarfiup qullersaannut Naalakkersuisut peqqusipput, maannamut peqqissaavinni Immikkoortumi Disko-mi allannguutaasimasut unitsinneqassasut. Assersuutigalugu
Qeqertarsuarmi pigaartuni allannguuteqarfiusumi atorunnaarsitsissasut, sulisuusut innuttaasullu toqqissisimanermik misigerusullutik kissaateqarnerat allannguummi matumani naammassineqarsimanngimmat.
Paasisaqarnerorusukkuit Peqqissutsimut Inunnullu Innarluutilinnut Naalakkersuisoqarfik uunga emailimut: pn@nanoq.gl. attavigineqarsinnaavoq. Oqarasuaat: 34 50 00.