PolarExpo 2026-imi aalisarnerup siunissaa pillugu, Peter Borg, oqalugiarpoq

Aalisarnermut, Piniarnermut, Nunalerinermut Imminullu Pilersornissamut Naalakkersuisoq Peter Borg, oktobarip 6-aniit 8-anut PolarExpo 2026-imi Ilulissani ingerlanneqartumi peqataavoq. Taanna ammaanersiornermi oqalugiarpoq, ilaatigut qassutaarsiutit aamma aqutsiveqarfik 47-imi qaleralinniarneq pillugit oqallinnerni peqataalluni.

PolarExpo 2026 aalisarnermik inuussutissarsiuteqartut naapillutik misilittakkanik paarlaasseqatigiissinnaanissaannut, kiisalu inuussutissarsiutip ineriartortinneqarnissaanut siunissamilu periarfissanut katersuuffiuvoq.

Peter Borg ammaalluni oqalugiarnermini Kalaallit Nunaanni aningaasaqarnerup, suliffissaqartitsinerup aammalu inuiaqatigiinni ulluinnarni inuunerup ingerlanneqarnerani aalisarnerup pingaaruteqassusia pingaarnermik oqalugiummini malunnartippaa. Imaani pisuussutitsinniit qallukkat kisiat tunngavilersuutiginagit pisuussutinilli, qanoq pitsaanerusumik atuinissaq Kalaallit Nunaannilu naleqarnerulersitsinissaq pingaaruteqartoq naqissuserpaa.

” Aalisarnerup ineriartortinnera taamaallaat qanoq annertutigisumik pisaqartarnerput aallaavigalugu ineriartortinneqarsinnaanngilaq. Pisagulli aallaavigalugit atorluaanikkut qanoq pissarsiaqaatiginerusinnaanerigut aamma isiginiassavarput. Aalisagaq tamaat atorluarnerussavarput, qanoq tunisassiarisinnaanera, inuussutissarsiortunullu allanut qanoq iluaqutaasinnaanera aamma nutaaliorusussuseqartunut isiginiassavarput. Peqatigisaanillu aalisartut suliffeqarfiillu isumassarsianik nutaanik, periutsinik nutaanik tunisassianillu nutaanik ineriartortitsisinnaanissaannut periarfissanik pitsaasunik pilersitsilluta,” Peter Borg oqarpoq.

Aalisarnermi unammilligassat periarfissallu pillugit oqallinneq

Peter Borg, PolarExpomi qassutaarsiutinik aamma aqutsiveqarfik 47-imi qaleralinniarnermik oqallinnerni peqataavoq. Tassani aalisarnermut tunngasut pingaarutillit kiisalu inuussutissarsiuteqartut susassaqartullu akornanni pingaartitaminnik oqalliseqatigiipput.

Peter Borgip oqalugiarnermini aamma imaani pisuussutigut pillugit ilisimasanik annertusaanissaq, imartatsinni pisuussutinik akisussaassuseqartumik aqutsinissarlu pisariaqartut erseqqissarpai. Peqatigisaanillu aalisartut, suliffeqarfiit susassaqartullu allat aaqqiissutissanik nutaanik ineriartortitsisinnaanissaannut pitsaasunik atugassaqartitsinissaq pingaaruteqarneranik oqariartuuteqarpoq.
Misileraalluni aalisarnerit, aalisarnermut ilinniartitaanerup ineriartortinneqarnera kiisalu sumiiffinni aalisarnermik ineriartortitsinissamut pilersaarutit suliniutaapput ilisimasanik nutaanik pilersitsisinnaasut, nunatsinni sumiiffinni assigiinngitsuni aalisarnerullu ineriartortinneqarneranut iluaqutaasinnaasut.

” Pisuussutit pigereerpagut, naleqarnerulersitsinissamulli piginnaasassanik ilisimasaqarnerulernissarput pisariaqartipparput, pisariaqartitagullu tassaapput kinguaariit tulliuttut ingerlatsisussat piginnaasanik peqalersinnissaat,” Peter Borg oqarpoq.

Avannaata Kommuniani Aalisarnermut Piniarnermullu Ataatsimiititaliaq naapippaa

Peter Borgip Ilulissani tikeraarnerminut atatillugu Avannaata Kommuniani Aalisarnermut Piniarnermullu Ataatsimiititaliaq aamma ataatsimeeqatigaa. Ataatsimiinnermi aalisarnermut piniarnermullu tunngasut kiisalu pingaarnertut piniakkat killilersukkat pillugu avitseqatigiilluni eqqartuisoqarpoq.

Peter Borgip aamma Ilulissaniinnermini KNAPK-p immikkoortortaqarfia kiisalu KNAPK-p saattuarniarneq pillugi siunnersuisoqatigiivi ataatsimeeqatigai.