Imarisassat tusarnaarlugit atuarlugitInunnut innarluutilinnut sapaatip akunneritinneqartoq 2026: Illoqarfinni aqqanerni nunaqarfinnilu pingasuni malunnartinneqarpoq
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Inunnut innarluutilinnut sapaatip akunneritinneqartumi, sapaatip akunnerani 41-mi, qulequtaqartumi "Innarluutiga - nukittuffiga", nunarput tamakkerlugu innuttaasunit pitsaasumik taperserneqarpoq. Qulequttami ataatsimoorussami illoqarfinni aqqanilinni nunaqarfinnilu pingasuni sammisaqartitsisoqarpoq. Sammisassaqartitsinermut aningaasaateqarfik 220.000 kr.-inik aningaasartalik najukkani aaqqissuussisunut innarluutillit nukittuffii, peqataatitsineq ataatsimoornerlu pillugit aaqqissuussinernik ingerlataqarnissamut periarfissiivoq.
Peqqissutsimut Inunnullu Innarluutilinnut Naalakkersuisoq tapersersuineq annertooq nuannaarutigaa:
"Nunatsinni sumiiffiit assigiinngitsut inunnut innarluutilinnut sapaatip akunneritinneqartumi malunnartitsinissamut suliniuteqarsimanerat takullugu pitsaaqaaq. Qulequtaq 'Innarluutiga - nukittuffiga' ersersitsivoq innarluutillit inuiaqatigiinnut misilittakkaminnik, nukittuffiminnik pisinnaasaminnillu pingaarutilinnik tunniussassaqartut".
Sammisassaqartitsinerit ilaatigut ataatsimoorussanik aaqqissuussinernik, saqqummiinernik, kulturikkut sammisassanik, ataatsimoorluni nerisitsinernik imaluunniit kaffisornernik, tiitornernik ataatsimoornernillu imaqarsimapput. Taakku innarluut pillugu paasinninnerup oqaloqatigiinnerullu annertusarnissaannut iluaqutaasimapput.
Inunnut innarluutilinnut sapaatip akunneritinneqartoq nunatsinni inuiaqatigiinnik peqataatitsinerusumik pilersitsinissamut tapertaavoq, tassani kikkut tamarmik naligiimmik peqataallutillu inuiaqatigiinnut iluaqutaasinnaasut ersersinniarneqarpoq.
Naalakkersuisup aaqqissuussisunut, kajumissutsimik sulisunut peqataasunullu tamanut qujaniarpoq inunnut innarluutilinnut sapaatip akunneritinneqartumi iluatsilluartumik ingerlanneqarneranut annertuumik suleqataasimanerannut.
Paasisaqarnerorusukkuit Peqqissutsimut Inunnullu Innarluutilinnut Naalakkersuisoqarfik uunga emailimut attavigineqarsinnaavoq: pn@nanoq.gl., oqarasuaat +299 34 50 00.