Imarisassat tusarnaarlugit atuarlugitNaalakkersuisoq erngup nukinganik atuinissamut periarfissat annertuut pillugit nittarsaassivoq nukissiornermilu suleqatigiinneq nukittorsarlugu
Avatangiisinut, Pinngortitamut, Nukissiuutinut Ilisimatusarnermullu Naalakkersuisoq Berlinimi Parisimilu angalavoq, Tasersiaq aamma Tarsartuup Tasersua pillugit erngup nukinganik periarfissat annertuut aningaasaliisartunut soqutiginarsarniarlugit. Erngup nukinganik atuinermi periarfissat piffissami aggersumi unammisitsinikkut neqeroorutigineqartussanngorput.
Nassiussisuuvoq: Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik
”Erngup nukinganik atuinermi periarfissat annertuut atorluarneqarnissaat sulissutigaara, inuussutissarsiutinut nutaanut periarfissanik aamma sumiiffinni suliffissanik pilersitsisoqarsinnaaqqullugu” Avatangiisinut, Pinngortitamut, Nukissiuutinut Ilisimatusarnermullu Naalakkersuisoq Jørgen ”Juulut” Rosbach oqarpoq.
Parisimi aamma nukissiornermi imminut pilersornerulernissamut tunngatillugu misilittakkanik ilisimasanillu paarlaasseqatigiinneq immikkut sammineqarpoq. Frankrigi nunarput assigalugu nukissamik nammineerluni tunisassiornerup annertusarneqarnissaa anguniarlugu periusissiortarput, taamaaliornikkut nunarsuarmi niuerfinni ineriartorneq kiisalu nunat tamalaat akornanni pissutsit sunniuteqarnerat eqqarsaatigalugit nukissamik pilersuineq patajaallisarneqarsinnaalluni.
Oqaloqatigiinnermi ilaatigut nukissiuutinik ataavartunik annertusaaneq, nukissiornermut aaqqissuussinerit pitsanngorsarneqarnerat kiisalu erngup nukinganik nukissiorfissuit aserfallatsaaliorneqartarnerat pillugit misilittakkanik aalajangersimasunik paarlaasseqatigiittoqarpoq. Tikeraarnermi Naalakkersuisoq ilaatigut Roselend-La Bâthie-mi erngup nukinganik nukissiorfimmut takornariartinneqarpoq.
“Frankrig erngup nukinganik nukissiorfissuaqarnermut uagutsinniit ukiorpassuarnik misilittagaqarneruvoq. Taamaattumik taakkunannga ilinniarfigisinnaasavut amerlapput. Nukissiamik imminut pilersornerulernissamut anguniagaqarluartumik pilersaaruteqarput, aammalu teknikkikkut aaqqiissutissanik niuerfimmi pisariaqartinneqartunik siunnerfeqarluartumik ilisimatusarlutik. Misilittakkat taakku uagutsinnut assut pingaaruteqarput.” Avatangiisinut, Pinngortitamut, Nukissiuutinut Ilisimatusarnermullu Naalakkersuisoq Jørgen ”Juulut” Rosbach oqarpoq.
Paasisaqarnerorusukkaanni naalakkersuisup allattaa Malik Schmidt 34 58 38 mkst@nanoq.gl-imut attavigineqarsinnaavoq