Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

Imarisassat tusarnaarlugit atuarlugit

Naalakkersuisut erseqqissaapput: Kommunit ulloq unnuarlu paaqqinniffinnik nutaanik qinnuteqarlutillu pilersitsisinnaapput

Naalakkersuisut kommunit ulloq unnuarlu paaqqinniffinnik nutaanik pilersitsinissaannut suli tapersersuipput.

Nassiussisuuvoq: Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik

Ullumi allaaserisami Sermitsiaq.AG-mi saqqummersinneqartumi oqaatigineqarpoq Naalakkersuisut ulloq unnuarlu paaqqinniffinnik nutaanik pilersitsinissamut qinnuteqaatit matugaat. Tamanna eqqortuunngilaq.

Naalakkersuisut namminersorlutik ingerlanneqartunik ulloq unnuarlu paaqqinniffinnik pilersitsinissamut qinnuteqaatinik taamaallaat unitsitsigallarput. Kommunit suli periarfissaqarput ulloq unnuarlu paaqqinniffinnik nutaanik pilersitsinissaminnut, aammalu Naalakkersuisut suli kommunit tamatumunnga suliniuteqarnerat tapersersorpaat.

“Siullermik ajuusaarpunga paasissutissaq paasinerlunneqarsinnaasutut saqqummiunneqarsimammat. Kommunit suliassaqarfimmi ineriartortitsinermi pingaaruteqarluinnartumik inissisimapput, aammalu Naalakkersuisut kommunit najukkani pisariaqartinneqartunik neqeroorutinik pilersitsinissamut suliniuteqarnerat tapersersorpaat. Aaliangiinerput namminersorlutik ingerlanneqartunik ulloq unnuarlu paaqqinniffinnik pilersitsinissamut qinnuteqaatinuinnaq tunngavoq, kommunillu suliniutaannut tapersersuinerput allanngortinngilaa,” Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.

Taamaattumik pingaaruteqarpoq erseqqissassallugu nutaanik ulloq unnuarlu paaqqinniffinnik pilersitsinissamut ataatsimut unitsitsisoqanngimmat, kisianni namminersorlutik ingerlanneqartunik ulloq unnuarlu paaqqinniffinnik pilersitsinissamut qinnuteqaatit utaqqiisaasumik tigoorarunnaarneqarallarmata.



Attavissaq
Sukumiisumik paasisaqarusukkuit Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik e-mailikkut miin@nanoq.gl imaluunniit oqarasuaatikkut: +299 34 50 00 attavigiuk.