Imarisassat tusarnaarlugit atuarlugitNaalakkersuisut siulittaasui pingasut naapinnissaat
Nassiussisuuvoq: Naalakkersuisut Siulittaasuata Naalakkersuisoqarfia
Naalakkersuisut Siulittaasuat Jens-Frederik Nielsen pingasunngornermi oktoberip 7-iani Islandimi nunat pingasut ataatsimiinneranni peqataassaaq, Islandip ministeriunerat Kristrún Frostadóttir kiisalu Savalimmiut Lagmandiat Beinir Johannesen peqatigalugit. Ataatsimiinnermi Atlantikup Avannaani suleqatigiinnerup nukittorsarnissaa eqqartorneqassaaq, kiisalu Issittumi soqutigisat ataatsimoorussat oqaluuserineqassallutik.
– Pingaaruteqarpoq nunatut eqqarligut suleqatigisagullu ataavartumik oqaloqatigisarnissaat. Tikeraarnermi matumani ilaatigut nunat tamalaat akornanni pissutsit kiisalu nunatta pingasut akornanni qaninnerusumik ataqatigiissaarinissamut periarfissat oqaluuserisassatta ilagaat, Jens-Frederik Nielsen oqarpoq.
Tikeraarnermi Keflavik Air Base alakkarneqassaaq, kiisalu Islandip isumannaallisaanera isumannaallisaanerullu tungaatigut ingerlatsineq paasissutissiissutigineqassalluni. Tikeraarneq Naalakkersuisut Siulittaasuata Jens-Frederik Nielsenip Islandimut siullerpaamik pisortatigoortumik tikeraarnerissavaa, angalanerlu Danmarkimi folketingip oktoberip 6-iani ammarneqarnerani peqataareernermiit ingerlanneqassalluni. Pilersaarutit malillugit Naalakkersuisut Siulittaasua oktoberip 9-ani Nuummut utersimassaaq.
Sukumiinerusumik paasissutissat pillugit attaveqarfissaq: Naalakkersuisut Siulittaasuanut allatsi Inuujuk Petersen, inpn@nanoq.gl