Inunnut innarluutilinnut sapaatip akunnerititami 41-mi sammisaq – 2026: Uanga innarluutiga – Uanga nukittoqutiga

Inuit innarluutillit innarluuteqarnertik immini immikkut nukittoqutigalugulu piginnaasaqaatigaat.

”Inuit innarluutillit nukittoqutaat piginnaasaallu inunnut innarluutilinnut ukioq manna sapaatip akunnerititami 41-mi ukkartaraavut. Inuit innarluutillit inunnut innarluuteqanngitsunut naleqqiullutik maluginiutitigut avatitigullu ineriartornermikkut misikkarinnerupput. Taamaammat inuit innarluutillit innarluuteqarnertik pissutigalugu immikkut nukittoquteqarnerisa piginnaasaqarnerisalu ukkatarineqarnerulernissaannut iluaqutaasussanik kikkulluunniit suliniuteqarnissaannik kaammattorusuppakka. Immikkut nukittoquteqarlutillu piginnaasaqarnerat pitsaaqutaattut isigalugillu inuiaqatigiinni sutigut tamatigut peqataatinnissaannut tunngavissatut isigissavagut,” Peqqissutsimut Inunnullu Innarluutilinnut Naalakkersuisoq Anna Wangenheim oqarpoq.

Inuit innarluutillit inuit innarluuteqanngitsutulli naligiimmik pineqarnissamut pisinnaatitaaffeqarlutillu periarfissaqarput. Inuilli innarluutillit innarluuteqarnertik pissutigerpiarlugu immikkut nukittoquteqarlutillu piginnaasaqarput. Inuk isigiarsuttoq tusarnaallaqqissuusinnaavoq. Inuk tusillassimasoq tapissorujussuusinnaavoq. Inuk issiavimmik kaassuartakkamik atuisoq suleqatiginnikkusussuseqarnerunissap ukkatarineqarneranik kinguneqarsinnaasumik innuttaqatiminut atassuteqallaqqissinnaavoq. Inuk ikorfartorteqarnissamik pisariaqartitsisoq inoqatinut atassuteqarlualersitsisinnaavoq.

Nunatsinni inuaqatigiit inunnut innarluutilinnut allatut isiginneriaaseqalernissaat – tassa inuit innarluutillit immikkut nukittoqutitik pisinnaasatillu atorlugit ulluinnatsinni sunniuteqaqataalluarsinnaasutut isigineqarnerulernissaat, inunnut innarluutilinnut sapaatit akunnerititap 41-p malunnartinneqarnerani siunertaasarpoq.

Pingaarnertut ukkatarineqartut
• Inuit innarluutillit immikkut nukittoquteqarnerisa inuiaqatigiinni qanoq iliornikkut isiginiarneqarluarnerusinnaanerat innarluutilinnut 2026-mi sapaatip akunnerititami 41-mi ukkatarineqarpoq
• Inuit innarluutillit immikkut piginnaasaqarnerisa inuiaqatigiinni qanoq iliornikkut peqataatilluarneqarnerusinnaanerat inunnut innarluutilinnut 2026-mi sapaatip akunnerititami 41-mi ukkatarineqarpoq

Aningaasanik maanna qinnuteqartoqarsinnaasoq
Innuttaasut tamatumanilu suliatigut susassareqatigiit Uanga innarluutiga – Uanga nukittoqutiga ukkataralugu aaqqissuussinissamut tapiiffigineqarnissamik qinnuteqarsinnaapput.

Kikkulluunniit tamatumunnga tunngatillugu aaqqissuussinissamut tapiiffigineqarnissamik qinnuteqarsinnaapput. Tamatumunnga tunngatillugu immersugaq nassiunneqassaaq uunga: pn@nanoq.gl, “spaatip-akunnera 41-2026”-mik qulequtserlugu.
Qinnuteqarnissamut sisamanngorneq 8. oktobari 2026 piffissaliussaavoq.
Inunnut innarluutilinnut sapaatip akunnerititamut 41-mut tunngatillugu aaqqissuussinissamut tapiissutinut tunngasunik apeqquteqartoqarsinnaavoq uunga allalluni: pn@nanoq.gl


Paasisaqarnerorusukkaanni Peqqissutsimut Inunnullu Innarluutilinnut Naalakkersuisoqarfimmi pn@nanoq.gl attavigineqarsinnaavoq.
E-maili: pn@nanoq.gl, oqarasuaat +299 34 50 00.