Naalakkersuisut danskillu naalakkersuisui suliniutinik nutaanik Kalaallillu Nunaannut aningaasaliissutinik isumaqatigiissuteqarput

Isumaqatigiissummut ilaatigut danskit naalakkersuisa piffissami 2026-2029 Kalaallit Nunaanni suliniutinut aningaasaliinernullu arlalinnut 1,2 mia. kr-nik pingaarnersiuinerat isumaqatigiissutigineqarpoq.

Isumaqatigiissutip ilaata kalaallinut innuttaasunut aningaasaqarnikkut ilungersunartorsiornerpaasunut ikiorsiisoqarnissaa ilaatigut kingunerissavaa.

Taamattaaq illuatungeriit pilersuinermut immikkoortumut aningaasanik pingaarnersiuisoqarnissaa isumaqatigiissutigaat – ilaatigut Ilulissani imermik pilersuinermik suliniummut kiisalu pilersuinermut suliffeqarfimmut namminersorlutik oqartussanit pigineqartumut Nukissiorfinnut taamaaliornikkut ullutsinnut naleqqunnersumik patajaannerusumillu Kalaallit Nunaanni nukissiornermik attaveqaateqarnissaanut ilapittuisoqarsinnaaqqullugu.

Isumaqatigiissut ulloq 9. februar 2026-mi sinaakkutitut isumaqatigiissutip atortussanngortinneqarnissaa pillugu isumaqatigiissutip ilaanik siullermik nangitsineruvoq, ilaatigullu 2027-mit kingornalu Danmarkimi kalaallit napparsimasut katsorsarneqarnerannut nutaamik aningaasaliinermik malitseqarluni.

Attaveqaatinut immikkoortumi Kalaallit Nunaanni nunat tamat akoranni mittarfiit nutaat ingerlanneqarnerannut kiisalu 2027-mi Ittoqqortoormiini nunap immikkoortuani mittarfimmik nutaamut Qaqortumilu immami itisuumi umiarsualivimmik nutaamut misissueqqaarnissamut aningaasaliissuteqarnissaq nunat isumaqatigiissutigaat.

Aningaasaqarnermut ministeri Peter Hummelgaard ima oqarpoq:

”Isumaqatigiissutip ilaatigut ugguuna sukumiisumik iliuuseqarnissamik ataatsimut anguniakkavut piviusunngortippavut. Suliniutinut kalaallit innuttaasut ulluinnarni malugisinnaasaannut aningaasaliivugut, peqatigisaanillu inuiaqatigiit kalaallit nukittuumik piujuartitsisumillu ineriartortinnissaanut Naalakkersuisut suliniarnerat taperserparput. Isumaqatigiissut Naalakkersuisunik qanimut siunnerfeqartumillu suleqatiginninnerup inerneraa, tamannalu annertuumik nuannaarutigaara. Maannalu suleqatiga Aqqaluaq B. Egede peqatigalugu sinaakkutitut isumaqatigiissutip ineriartorteqqinnissaanut oqaloqatigiinnittalu pitsaasut nanginnissaanut qilanaarpunga.”

Aningaasaqarnermut Naalakkersuisoq Aqqaluaq B. Egede, ima oqarpoq:

”Isumaqatigiissutip immikkoortuata aappaata inissinnera nuannaarutigaara, maannalu suliniutit aalajangersimasut suliarinerat nangissinnaalerparput. Peqqinnissaqarfimmut immikkoortumi isumaqatigiissutikkut kalaallit napparsimasut Danmarkimiittarnerannik ataavartumik aaqqiissutissap tungaanut alloriarpugut. Taamattaaq 2030-p kingorna aningaasalersuinerup isumaqatigiissutiginera pitsaasorujussuuvoq. Taamattaaq isumaqatigiissuteqartugut illuatungeriit peqatigiilluta sinaakkutitut isumaqatigiissummi suliniutit allat nangittumik atuutilersinnissaannik aningaasalersuinermik malitseqartitsinissarput naammagisimaarnartorujussuutippara, taamaalillutik taanna pisariaqartinneqavissunik takutitsisuussalluni.”

Danskit naalakkersuisuisa Naalakkersuisullu Kalaallit Nunaat imminut napatittoq pillugu sinaakkutitut isumaqatigiissutip atuutilersinnera ineriartorteqqinneqarneralu suli ataqatigiissumik ingerlappaat.

Sinaakkutissatut isumaqatigiissummik atulersitsinermut isumaqatigiissutip ilaa 2