Kalaallit Nunaanni Nuna Allanngutsaaliugaq nutaaq ullumikkut atoqqaarfissiorneqarluni ateqalerpoq Pilivik

Kommune Qeqertalik, Qeqqata Kommunia, Naalakkersuisut ullumikkut Kalaallit Nunaata Kitaani Nuna Allanngutsaaliugaq nutaaq pisortatigoortumik atoqqaarfissiorlugu nalliuttorsiutigaat. Tamanna Kangerlussuarmi Aasivissuit sermiani aaqqissuussisoqarnerani pissaaq, tamatumalu kingorna Kangerlussuarmi kaffillertoqassalluni. Peqatigisaanillu Nunap Allanngutsaaliukkap aqqa saqqummiunneqassaaq: Pilivik Nuna Allanngutsaaliugaq.

”Nunap Allanngutsaaliukkap Pilivik ammarneqarnerani nunatsinni nunamik allanngutsaaliukkamik, nammineerluta pilersitatsinnik siullermik peqalerpugut. Tassani pinngortitaq asseqanngitsoq ataatsimoorluta paarissavarput, aammalu sumiiffik maanna kinguaariinni inuusuni tulliuttunilu atorneqarsinnaasaattut misigineqarsinnaasaattullu ingerlateqqissavarput,” Avatangiisinut, Pinngortitamut, Nukissiuteqarnermut Ilisimatusarnermullu Naalakkersuisoq Jørgen Rosbach oqarpoq.

Nuna Allanngutsaaliugaq Pilivik 22.000 km²-it missaannik annertussuseqarluni Kangerlussuup Qeqertarsuullu Tunuata akornanniippoq, sermersuup iigartartuniit kangerluit itisuut sinerlugit sinerissami nunamut isorartussuseqarluni. Kikkulluunniit Nunami Allanngutsaaliukkami killilersorneqaratik angalasinnaapput, aammalu aallaaniarneq, aalisarneq paarnanillu nunianneq maannakkutut ingerlaannarsinnaallutik.

Nuna Allanngutsaaliugami pilersinneqarpoq pinngortitami naleqartitaasut illersornissai aammalu sumiiffimmi atueriaasitoqaq tunngavigalugu atorneqartarnissaa qulakkeerissallugit. Sumiiffinni ataasiakkaani killilikkani piffissani aalajangersimasuni uumasut sunnertiasut illersorniarlugit immikkut ittumik mianerineqassapput, soorlu qasigissat, nerlerit, qeerlutuut tuttullu.

Saniatigullu Nuna Allanngutsaaliugaq aammalu inatsisit aalajangersakkat allat tunngavigalgit periarfissiipput sumiiffimmi ingerlatsinermi aalajangersimasumik ingerlatsinissamut. Nuna Allanngutsaaliugaq tunngatillugu nalunaarut aammalu takornariartitsinermut inatsisit tapertariipput, kommunillu pilersaarusiornerisigut aammalu zoninnguinermikkut takornariartitsinerup ineriartortinneqarneranut nalimmassarneqartumik tapersiisinnaallutik. Tassuunalu pinngortitaq illersorneqarsinnaalluni, sumiiffik innuttaasunit atorneqarsinnaalluni takornariartitsinerlu ataatsimut killilersugaasumik nalilersorneqarsinnaalluni.

Pilivik Kalaallit Nunatta kitaani nuna allanngutsaaliugaq tamakkerlugu sumiiffinni illersukkanut ataatsimut taaguutigineqassaaq. Sumiiffimmi nunat aqqi pioreersut allanngussanngillat, aammalu kangerluit, qaqqat, piniariartarfiit sumiiffiillu allat pisortatigoortumik aqqi allanngussanngillat. Taamaattumik Nunap Allanngutsaaliukkap atserneqarnerani sumiiffimmi nunat aqqi, imaluunniit kulturikkut oqaluttuarisaanerit kinaassutsillu taakkununnga attuumassutillit allannguuteqassanngillat.

Ateq Pilivik ukioq manna juunimi juulimilu atsiinissamik unammisitsisoqarnerani siunnersuutitut nassiussat akornanni toqqarneqarpoq. Innuttaasoq siunnersuuteqarnermini imatut tunngavilersuuteqarpoq: “Qangarsuaaniilli tuttunik, umimmannik eqalunnillu ukiussamut peqqumaatissanik pissarsiniartarnermi pingaaruteqartunut ilaasimavoq, aammalu ulloq manna tikillugu piniariartarfittut atorneqarluni”.

”Ateq Pilivik Nunap Allanngutsaaliukkap ineriartortinneqarnerani najugaqartut peqataalluarnerannik takutitsivoq. Kommunit Nunap Allanngutsaaliukkap pilersinneqarnissaanut suliniuteqartuupput, aammalu najugaqartut soqutigisaat, misilittagaat ilisimasaallu nunamik allanngutsaaliukkamik suliaqarnermi ilusilersueqataasimapput, tamannalu ingerlaannassaaq,” Qeqqata Kommuniani borgmesteri Malik Berthelsen oqarpoq.

Nuna Allanngutsaaliugaq kommuninit marluusunit suliniutigineqalerpoq, taakkulu 2020-mi suliniummut alloriarneq siulleq tiguaat. Taamanili paasissutissanik katersineq, 2022-mi, 2023-mi aamma 2025-mi innuttaasunik ataatsimiisitsinerit, kiisalu 2025-mi decembarimiit 2026-mi martsimut tamanut ammasumik tusarniaaneq Nunap allanngutsaaliukkap killeqarfissaata malittarisassaalu ilusilersorneqarnerannut peqataasimapput. Nuna Allanngutsaaliugaq kalaallit namminneq suliniutigaat, najukkani innuttaasut tunniusimanerannik tunngaveqartoq aammalu EU-mit Grøn Vækst aqqutigalugu tapersersorneqarnerisigut aningaasalersorneqarluni.

”Ammaanersiorneq ukiuni arlalinnit kommunit Naalakkersuisullu akornanni suleqatigiinnerannik, aammalu innuttatta akuutinneqarnerannik nalliuttorsiorfiuvoq. Nuna Allanngutsaaliugaq najukkami naleqarnerulersitsissaaq, aammalu ataatsimoorluta pinngortitap paarinissaanut, piujuartitsiffiusumillu takornariaqarnerup sumiiffinni ileqquusumik atuinermik ataqqinniffiusumik qulakkeernissaanut qilanaarpugut,” Kommune Qeqertalimmi borgmesteri Simigaq Heilmann oqarpoq.

Atoqqaarfissiorneqarnera ullumikkut nal. 12:30-14:00 Aasivissuit Sermia eqqaani nalliuttorsiutigineqassaaq. Nunap Allanngutsaaliukkap kujataani Kangerlussuup eqqaani ingerlanneqassaaq Peqataassapput innuttaasut, Kommune Qeqertaliup aamma Qeqqata Kommuniata borgmesteriinit, aammalu Avatangiisinut, Pinngortitamut, Nukissiuteqarnermut Ilisimatusarnermullu Naalakkersuisumit najuuffigineqarluni ingerlanneqassaaq. Tamatuma kingorna nal. 15.30-17.30 Kangerlussuaq Multihus-imi kaffillertoqassaaq.

Oqalugiaatit uani atuarneqarsinnaapput:
• Qeqqata Kommuniani borgmesteri Malik Berthelsen-ip oqalugiaataa
• Kommune Qeqertalimmi borgmesteri Simigaq Heilmann-ip oqalugiaataa
• Avatangiisinut, Pinngortitamut, Nukissiuuteqarnermut Ilisimatusarnermullu Naalakkersuisoq Jørgen Rosbach-ip oqalugiaataa 

Oqaaseqarnikkut oqaatigineqartoq atuuppoq.

Kalaallit Nunaata kitaani Nuna Allanngutsaaliugaq, naatsumik oqaluttuaralugu

Ateq: Nuna Allanngutsaaliugaq Pilivik.
Nunat aqqi: Pilivik Nunamut Allanngutsaaliukkamut ataatsimoortumik taaguutaavoq. Sumiiffimmi nunat aqqi pioreersut pigiinnarneqassapput atuinnarneqassallutillu.
Annertussuseq: 22.249,80 km².
Inissisimaffik: Kalaallit Nunaata kitaani, Kangerlussuup aamma Qeqertarsuup Tunuata akornanni.
Ulloq atuutilerfik: 1. juuni 2026.
Pisortatigoortumik atoqqaarfissiorneq: 14. septembari 2026.
Oqaluttuassartaa: Ukiut 50-it sinnerlugit ingerlanerani Kalaallit Nunaanni Nuna Allanngutsaaliugaq siulleq aammalu nunami nammineerluni ineriartortitaq siulleq.
Suliniuteqartut: Kommune Qeqertalik, Qeqqata Kommunia aamma Wild Nature Foundation.
Aningaasalersuisoq: EU Grøn Vækst.
Siunertat pingaarnerit pingasut: Pinngortitamik illersuineq, najugaqartunut aamma piujuartitsiviusumik takornariaqarnermut atorneqarnerata ingerlaannarnissaa.

Nunami Allanngutsaaliukkami ingerlatsineq siunissami Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfimmit isumagineqassaaq, taassumalu innuttaasut suleqatigalugit pinngortitamik illersuinerup, najukkami atuinerup takornariaqarnerullu oqimaaqatigiimmik ingerlanissaat qulakkiissavaa.

Attaveqarfissaq: Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik, pan@nanoq.gl, 34 50 00.