Múte B. Egedep Bruxellesimut pisortatigoortumik tikeraarnermini EU-p Kalaallillu Nunaata suleqatigiinnerat ukkataraa

Suliffissuaqarnermi Periusissiornermut Europa-Kommissæri Stéphane Séjourné-lu

Nunanut allanut, Inussutissarsiornermut Aatsitassanullu Naalakkersuisoq Múte B. Egede ulluni 1. – 3 september Bruxellesimut pisortatigoortumik tikeraarpoq. Tassani EU-Artic Forumimi oqalugiarpoq, nunallu inoqqaavinik inuusuttunillu oqaloqatigiinnernut peqataalluni. Ataatsimiinneq ukiut tamaasa Issittumi suleqatigiinneq sammisaralugu Europa-Kommissionimit aaqqissuunneqartarpoq.

Naalakkersuisup oqalugiarnermini EU-p Kalaallit Nunaannut Issittumullu pingaarutilimmik suleqataanera erseqqissaatigaa. Issittumi suleqatigiinnermi innuttaasut qitiutinneqarnissaasa pingaarutaa, Naalakkersuisup aamma erseqqissarpaa. Tamanna aamma Naalakkersuisut EU-p Issittumut periusissiaanut ilapittuutaanni pingaarnertut oqariartuutit ilagaat. EU-p issittumut periusissiaa maanna nutarterlugu suliarineqarpoq.

Naalakkerssuisut EU-p Issittumut periusissiaanut ilapittuttaat Nunat tamalaat akornanni suleqatigiinnernut Europa-Kommissærimut, Jozef Síkela-mut 2026-mi aggustimi tunniunneqarpoq. Naalakkersuisoq Kommisær Síkelalu ilapittuummik erseqqinnerusumik oqaloqatiginninnissamut Bruxellesimi tikeraarnermi naapipput. Taakku aamma EU-p Kalaallillu Nunaat suleqatigiinnerat oqaloqatigiissutigaat. EU-p Kalaallit Nunaatalu suleqatigiinneranni EU-p Kalaallit Nunaannut ukiuni 2028-miit 2034-mut tapiissutaasa 530 mio. EUR-nut marloriaatinngortinneqarnissaat Europa-kommissionip siunnersuutigaa. Tamatuma saniatigut pilersaarutit suliniutillu aalajangersimasut, kalaallinut iluaqutaasussat suleqatigiissutigineqarput.

Múte B. Egede ima oqaaseqarpoq:
”EU Kalaallit Nunaannut pingaarutilimmik suleqataavoq. Suleqatigiinnerput ikinngutigiinnermik, ataqqinninnermik, ataatsimut naleqartitanik qanimullu oqaloqatiginninnermik tunngaveqarpoq. EU-p Kalaallit Nunaatalu suleqatigiinnerata suli qaninneruleriartorlunilu nukittuneruleriartornera Naalakkersuisut iluarisimaarpaat. EU aamma Issittumi suleqatigiinnermi pingaarutilimmik inissisimavoq. Taamaammat EU-p Issittumi periusissiaata nukittorsarneqarnera Naalakkersuisut nuannaarutigaat, periusissiamullu pisortatigoortumik ilapittuummik ilanngussiffigalugu. EU-mik qanimut suleqatigiinnerup nangillugu ineriartortinnissaa qilanaaraarput.”

Tikeraarnermi Naalakkersuisup aamma Pigissaarnermut aamma Suliffissuaqarnermi Periusissiornermut Europa-Kommissæri Stéphane Séjourné kiisalu Nukissianut aamma Inissianut Europa-Kommissæri, Dan Jørgensen naapippai. Naggataagut Múte B. Egedep Europa-Parlamentimi ilaasortat naapippai, NATO-milu ataatsimeeqatiginninnernik ingerlatsilluni.

Attavissaq: Paasissutissanik annertunerusunik pissarsiniarnermi Nunanut Allanut Naalakkersuisoqarfik nap@nanoq.gl-imut attavigiuk.

Nunanut allanut, Inussutissarsiornermut Aatsitassanullu Naalakkersuisoq Múte B. Egede oqalugiartoq

Nukissianut aamma Inissianut Europa-Kommissæri, Dan Jørgensen-lu

Europa-Kommissæri, Jozef Síkela-lu