Nunalerinermik inuussutissarsiutip ineriartortinneqarnera workshopimi ukkatarineqartoq

Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, nunalerinermut soqutigisaqaqatigiinnik peqataasunillu Qaqortumi 26.-27. august 2026-imi ulluni marlunni workshopertitsinermut qaaqqusivoq. Kalaallit Nunaanni nunalerinerup siunissami qanoq ineriartortinneqarsinnaaneranik eqqartueqatigiinneq workshopimi siunertaavoq.

Workshop Hotel Qaqortumi ingerlanneqarpoq, nunalerinermut uumasuuteqarnermullu Kalaallit Nunaanni ilisimasaqarnermik, misilittagaqarnermik soqutiginninnermillu peqartunik assigiinngitsunik peqataaffigineqarluni. Oqallinnerit, saqqummiussinerit eqimattallu suleqatigiinnerisigut peqataasut inuussutissarsiutip ineriartortinneqarnissaanut isummersuutiminnik isumassarsiaminnillu tunniussipput.

Ataqatigiissumik aaqqiissutissanik ujartuineq

Kalaallit Nunaanni nunalerinerup ineriartortinneqarnissaa oqartussaasut, nunalerisut, kattuffiit, immikkut ilisimasallit kiisalu inuussutissarsiuummut attuumassuteqartut allat suleqatigiinnerannik pisariaqartitsivoq. Taamaattumik misilittakkat assigiinngitsut isummallu assigiinngitsut ataatsimoortillugit oqaloqatigiissutigisinnaasaannik periarfissamik pilersitsinissaq Naalakkersuisut pingaartippaat.

Workshopertitsinermi arlalinnik saqqummiussisoqarpoq, taakkulu nunalerinerup ineriartortinneqarneranut tunngatillugu peqataasunut isiginnittaatsinik assigiinngitsunik saqqummiussipput, kiisalu kingusinnerusukkut oqallinnernut eqimattallu suleqatigiinnerannut aallaaviullutik. Ilaatigut nunalerinermut periusissiap inissisimaneranik, ullumikkut tapiissuteqartarnermik aaqqissuussinernik kiisalu niuernermi atuisullu naatsorsuutigisaanik saqqummiussisoqarpoq.

Isumassarsianik avataaniit aamma pissarsiffiuvoq.
Ilaatigut Savalimmiuni piginneqatigiilluni immuliorfinnik inuussutissarsiutillit ineriartortitsinermut misilittagaat saqqummiunneqarput. Taakku Kalaallit Nunaanni pilersitsinissamut aaqqissuussinissamut oqallinnermi isumassarsiorfigineqarput.

Tamatuma tunngavigisaanik nunalerinerup qanoq ineriartortinneqarsinnaanera kiisalu ukiuni aggersuni suut salliutinneqartariaqarnersut pillugit suliaqarneq ingerlanneqarpoq.

Ilaatigut nunalerisut akornanni suleqatigiinnerup nukittorsarneqarnissaa kiisalu nunalerisut ataasiakkaat Nunalerinermut Siunnersuisarfik peqatigalugu suleqatigiinnerata nukittorsarneqarnissaa pisariaqartinneqartoq tikkuarneqarpoq. Peqatigisaanik siunnersuinermik ineriartortitsinissamut pitsanngorsaanissamullu periarfissat kiisalu inuussutissarsiuummi piginnaasanik ineriartortitsinissaq sammineqarput, taamaalilluni siunnersuineq nunalerisut ataasiakkaat ingerlatsinerannik inuussutissarsiutillu ataatsimut ineriartortinneqarneranik annertunerusumik tapersersuisinnaaqqullugu.

Nunalerinermut maannakkut tapiissuteqartarnermik aaqqissuussinerit aamma pingaarutilimmik sammisaapput. Tassani erseqqissarneqarpoq aaqqissuussinerit qanoq ilusilersorneqarsimanersut

qimerloorneqartariaqartut, taamaalillutik nunalerinerup ineriartortinneqarneranut sapinngisamik pitsaanerpaamik tapersersuisinnaaqqullugit.

Nunalerinermut tapiissuteqarnermut aaqqissuussinerit maanna atuuttut aamma pingaaruteqartumik sammisaapput. Tassani tikkuarneqarpoq aaqqissuussinerit sukumiinerusumik

misissorneqartariaqartut, nalilersorneqarlunilu aaqqissuussinerit nunalerinerup ineriartortinneqarneranut sapinngisamik pitsaanerpaamik tapersiisinnaanersut.

Kiisalu Neqi A/S aamma toqoraaviup nunalerinermi pingaaruteqartumik inissisimanera immikkut sammineqarput. Peqataasut Neqi A/S-ip pitsanngorsarneqarnissaanut ineriartortinneqarnissaanullu pisariaqartitsineq oqallisigaat, taamaalilluni suliffeqarfik nunalerinermik inuussutissarsiuteqartunut siunissamilu tunisassiornernut annertunerusumik tapersiisinnaanngorlugu.

Savaatillit Peqatigiit Suleqatigiissut siulittaasuat Suulut Hansen workshopimut atatillugu ima oqarpoq:
”Workshopimut peqataaneq pitsaasuuvoq. Uagut savaatillit misilittakkavut, unammilligassavut kiisalu nunalerinerup qanoq ineriartortinneqarsinnaaneranik siunnersuutivut saqqummiussinnaasimavagut. Uagutsinnut pingaaruteqarpoq inuussutissarsiuteqartut tusarnaarneqarnissaat, aamma saqqummiussavut sulinermi aalajangersimasumi ingerlateqqinneqarnissaat. Taamaattumik nuannaarutigaarput maanna suleqatigiissitaliortoqarmat, workshopimi inernerit tunngavigalugit sulinermik nangitsisussamik. Neriuutigaarput tamanna savaateqarnermik inuussutissarsiuteqarnermut aamma Kalaallit Nunaanni nunalerinermut ataatsimut pitsaanerusunik sinaakkutissanik nutaanillu periarfissanik pilersitseqataassasoq.

Suliap ingerlaqqinnissaanut tunngavik pingaarutilik

Workshop oqalliffiuinnanngilaq, aammali Naalakkersuisut nunalerinerup ineriartortinneqarneranut suleqqinnissaannut tigussaasunik pingaarutilinnik isumassarsiaqarfiuvoq.

Inuussutissarsiornermi periarfissat unammilligassallu pillugit ataatsimoortumik paaseqatiginninnissaq aamma siunertaavoq, kiisalu suliassaqarfiit suliniutinik nutaanik, suleqatigiinnerup pitsaanerulersinneqarnissaanik imaluunniit sinaakkutissat allanngortinneqarnissaannik pisariaqartitsiffiusut paasiniarnissaat.

Suliat ingerlaqqinnerat

Workshopip inernerisa pingaarnerit ilagaat nunalerinerup siunissaa pillugu sulineq workshopertitsinerit ingerlateqqinnissaat.

Taamaattumik suleqatigiissitaliortoqarpoq, taanna workshopip nalaani saqqummiunneqartut, siunnersuutit isumassarsiallu tunngavigalugit sulinermik ingerlaqqissalluni. Suleqatigiissitaliap assigiinngitsut isiginnittaatsit siunnersuutillu pitsaassusilerlugit ataatsimoortissavai, kiisalu qanoq nunalerinermut suliniutinut tigussaasunut allanngortinneqarsinnaanersut misissorlugit.

Taamaalilluni suleqatigiissitaq workshopip Naalakkersuisullu nunalerinerup ineriartortinneqarnissaanut sulinerata ingerlaqqinnerata akornanni ataqatigiissaarisutut inissisimasussaavoq. Suleqatigiissitaliap sulinera Naalakkersuisup nunalerinerup ineriartortinneqarneranut sulineranut ilanngunneqassaaq, siunissamilu aalajangiinissamut suliniutinullu tunngavissaq pitsaanerulersinneqarnissaanut iluaqutaassalluni,.

Naalakkersuisup, Peter Borgip, nunalerinerup ineriartortinneqarnera inuussutissarsiummik ulluinnarni ingerlatsisut qanittumik oqaloqatiginerisigut ingerlanneqartariaqartoq erseqqissarpaa:
”Workshopip nunalerinermi periarfissanik, unammilligassanik pisariaqartitanillu qanoq ittunik pisariaqartitsinersoq pillugu paasisaqarfigilluarparput. Oqaloqatigiinnerit pitsaasut siunnerfeqartullu ingerlanneqarput, pingaartumillu nuannaarutigaara peqataasut misilittakkaminnik, isumassarsiaminnik siunnersuutiminnillu tigussaasunik ammasumik avitseqatiginnimmata. Neriuutigaara workshopi aamma nunalerinermi inuussutissarsiuteqarnermi unammilligassat ullumikkut atukkat aaqqiiffigineqarnissaannut neriuuteqarluarpunga.

Angusat pingaaruteqartut ilagaat maanna alloriarnerup tullianut ingerlariassagatta, tassalu suleqatigiissitaq workshopip nalaani saqqummiunneqartunik isumassarsianik siunnersuutinillu ingerlaqqilluni suliaqassasoq. Isumassarsiat pitsaasut oqallisigiinnarnagit timitalerneqassapput, Kalaallit Nunaanni nunalerinerup nukittorsarneqarnissaanut ineriartortinneqarnissaanut suliarineqarlutik.

Naalakkersuisut inuussutissarsiuteqartullu akornanni ingerlaavartumik suleqatigiinnissaanut aallarniutitut Workshop isigivara. Kalaallit Nunaanni nunalerineq nukittunerusoq piujuartitsinerusorlu pilersissagutsigu, ineriartortitsineq inuussutissarsiummik ulluinnarni ingerlatsisut qanittumik oqaloqatigalugit ingerlanneqartariaqarpoq.”