Nuummi pisussat pingasut

EU-p ataatsimiititaliarsuata siulittaasua Ursula von der Leyen aamma danskit ministeriunerat Mette Frederiksen ulloq 6. september Nuummut tikissapput. Tikeraarneranni EU-p Kalaallillu Nunaata suleqatigiinnerisa nukittorsarneqarnerinut ataatsimoorullugu nalunaarut ilaatigut atsiorneqassaaq.

- Nunarsuarmi politikikkut pissutsinut tunngatillugu EU-p erseqqissumik tapersersorluta nalunaarutigaa peqatigisaanillu suleqatigiinnitta annertusarnissaanik kissaaterput akorluarpaat. Ullut aggersut assut qilanaaraakka aamma Kalaallit Nunaannut ataatsimoorullugu suleqatigiinnermik isumaqatigiissut pillugu itinerusumik oqaluttuarnissara qilanaaralugu, Naalakkersuisut siulittaasuat Jens-Frederik Nielsen oqarpoq.

Savalimmiormiut naalakkersuisuisa siulittaasuat Beinir Johannesen aamma danskit ministeriunerat Mette Frederiksen ukiup affakkaartuinik naalagaaffeqatigiit ataatsimiittarnerini ulloq 7. september ataatsimeeqatigineqassapput. Ukiup affakkaartumik naalagaaffeqatigiit ataatsimiinnerini politikkikkut aningaasaqarnikkullu soqutigisat eqqartorneqassapput.

-Ukiuni makkunani pisussaaffilerneqarpugut qanimut suleqatigiissalluta. Soorlu inuit pingasut umiatsiami ataatsimoorlutik ipoqatigiittariaqartut ataatsimoorussamik anguniagaqarnissarput qulakkeerniarlugu, taamatut aaqqissugaanerput inissisimavoq, Jens-Frederik Nielsen oqarpoq.

Nunanut allanut, Sillimaniarnermut aamma Illersornissamut Politikki-mut suleqatigiisitaq ulloq 8. september ataatsimiissapput. Tassani Nunanut Allanut, Inuussutissarsiutinut Aatsitassanullu Naalakkersuisoq Múte B. Egede aamma Aningaasaqarnermut Naalakkersuisoq Aqqaluaq B. Egede savalimmiormiut danskillu naalakkersuisuisa siuttui ministeriilu arlallit peqataassapput.

Annerusumik paasisaqarusukkuit uunga attaveqarsinnaavutit: Naalakkersuisut Siulittaasuata allattaa Inuujuk Petersen, Inpn@nanoq.gl +299 580424

EU-mit tikeraartoqarnermi peqataaniarluni nalunaarnissaq piumasaqaataavoq aamma tusagassiortutut allagartaq atuuttoq piumasaqaataalluni. Peqataaniarluni tusagassiortunut attaveqaammut Rosa Thorsen-imut Rsth@nanoq.gl ulloq 4. september 10.00 kingusinnerpaamik nalunaartoqarsinnaavoq.