Naartunaveersaasersuisimanermut suliami inuit pisinnaatitaaffiinut tunngasortaannik nalunaarusianik tamanut saqqummiussineq

1960-ikkunnit ulloq manna tikillugu Naartunaveersaasersuisimanermut suliami inuit pisinnaatitaaffiinut tunngasortaannik immikkut ilisimasallit misissuinerinik nalunaarusiat utaqqisat ullumikkut aggustip 28-ani tamanut saqqummiunneqassapput.

Tassunga atatillugu Naalakkersuisut tusagassiortunut katersortitsisarfianni nal. 13.00 tusagassiortunik katersortitsisoqassaaq. Tusagassiortunik katersortitsinermi tusagassiortut kisimik peqataasinnaassapput. Soqutiginnittut internetikkut malinnaasinnaapput.

1960-ikkunnit ulloq manna tikillugu Naartunaveersaasersuisimanermut suliami inuit pisinnaatitaaffiinut tunngasortaannik immikkut ilisimasallit misissuinerat Naalakkersuisut 2024-mi aallartitippaat.

Immikkut ilisimasalinni ilaasortaasoq ataaseq 2025-mi decembarimi, ataaserlu 2026-mi januaarimi suleqatigiinnit tunuarput. Ilaasortat akornanni suliatigut aaqqiagiinngissuteqarneq, ilaatigullu nunat tamalaat akornanni politikkitigut inissisimanermut ernumassuteqarneq patsisaavoq. Taamaakkaluartoq ilaasortat taakku marluk immikkut ilisimasaqarlutik suleqatigiinnit tunuartut namminneq nalunaarusiatik tunniuppaat.

Nalunaarusiat taakku marluk pitsaassutsikkut qulakkeerneqarnissaat siunertaralugu aalajangerneqarpoq, nalunaarusiat imminnut attuumassuteqanngitsunit pitsaassutsikkut naliliiffigineqassasut. Pitsaassutsimik naliliinerit pillugit oqaaseqaatit taakku marluk ullumikkut aamma tamanut saqqummiunneqassapput. Immikkut ilisimasaqarlutik suleqatigiit aamma ilaasortat tunuarnikut taakku marluk, pitsaassutsimik naliliinermut atatillugu pisarnertut, pitsaassutsimik naliliinerit tunuliaqutaralugit nalunaarusiaminnik iluarsiissuteqarnissaminnut periarfissaqarsimapput, taamaalillunilu pitsaassutsimik naliliinernut qanoq isummissanerlutik namminneq nalilersinnaasimallugu.

Kingorna nalunaarusiat iluarsisat inaarutaasut Naalakkersuisunut kiisalu Inatsisartunut tunniunneqarput, taamaalillunilu ullumikkut tamanut saqqummiunneqassallutik.

”Nalunngilarput nalunaarusianik taakkunannga tamanut saqqummiussinissaq qangali utaqqineqarsimasoq, taamaattumillu aamma eqqugaasimasut eqqarsaatitsinniipput. Tamanna pillugu suliaq manna peqqissaarullugu, saqqummerlutillu misigisimasaminnik oqaluttuartut ataqqillugit suliaammat erseqqissaatigissallugu Naalakkersuisunut aamma pingaaruteqarpoq. Tamanna pillugu tamanut saqqummiussinermi suliamik matusinermik isumaqanngilaq, killuanilli tullertut suna alloriaataassanersoq Naalakkersuisut erseqqissumik, pimoorussisumillu eqqartuissallutik politikkikkut suliaqarnissamut siullertut alloriaataasoq tusagassiortunik katersortitsinermi matumani ukkatarineqassaaq. Suliami matumani eqqugaasimasut ataqqillugit tassuugu avammut nalunaaruteqarani isumaliutigilluagaasunik aalajangiisarnissaq Naalakkersuisut pingaartippaat. Ullumikkut tusagassiortunik katersortitsinermi nalunaarusiat saqqummiutissallugit, immikkullu ilisimasallit paasisimasaat tamanut saqqummiunnissaat piffissanngorpoq”, taama oqarpoq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen.

Ilutigisaanik Naalakkersuisut tusagassiorfiit aamma tamat kaammattorpai mianersuusseqqullugit, suliarlu pillugu oqaaseqarneq aamma iliuuseqarneq eqqugaasunut sunniuteqarsinnaammat eqqarsaatigeqqullugu:

”Eqqaamassavarput suliamik matuminnga toqqaannartumik eqqugaasimasunik arnaqarmat aammali inuiaqatigiittut eqqugaasimanerput. Tamanna pillugu neriuutigaara suliaq pisariaqartumik mianersuullugu, pineqartullu ataqqillugit sammineqassasoq.” Taama oqarpoq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen.

Naalakkersuisut kingumut innersuussutigissavaat, suliamut tunngatillugu ataqqinninnissamik aamma akornusersorneqannginnissamik Spiralilersuisimaneq pillugu aqutsisoqatigiit kissaateqarlutik oqaaseqarnerat ataqqeqqullugu.

Professor Emeritasit taakku marluk pitsaassutsimik naliliineq pillugu oqaaseqaataat tulliuttumi iserfissiaq aqqutigalugu takuneqarsinnaapput:

Professor emerita, Rashida Manjoo-p pitsaassutsimik naliliineq pillugu oqaaseqaataa

Professor emerita, Christine Chinkin-p pitsaassutsimik naliliineq pillugu oqaaseqaataa

Nalunaarusiat taakku marluk tulliuttumi iserfissiat aqqutigalugit takuneqarsinnaapput:

Kalaallit Nunaanni 1960-imiilli naartunaveersaasersuisarsimanermi inuit pisinnaatitaaffiinut tunngasut pillugit akuliusimaffigineqanngitsumik nalunaarusiaq, Dalee Sambo Dorough-imit aamma Miriam Cullen-imit.

Spiralilersuisimaneq pillugu suliaq – Inatsisilerinerup, tarnip aamma intersektionel-ip tungaatigut isigalugu, Jonas Christoffersen-imit aamma Jensine Nedergaard-imit

Paasissutissat:

• Naartunaveersaasersuisimanermut suliami inuit pisinnaatitaaffiinut tunngasortaannik immikkut ilisimasallit misissuinerat aallartinneqartoq 2024-p upernaani Naalakkersuisut nalunaarutigaat.
• Nunarsuatsinni tamarmi atuuttunik inuit pisinnaatitaaffiinik, nunallu inoqqaavisa pisinnaatitaaffiinik unioqqutitsisoqarsimanersoq immikkut ilisimasallit misissuinerisa qulaajartussaavaat. Taassuma saniatigut inuiannik toqoraaneq pillugu nunat assigiinngitsut akornanni isumaqatigiissutit isumasiuinerinut atatillugu killissamik qaangiisoqarnersoq nalilertussaavaat.
• Piffissami 1992-imit 1960 tikillugu spiralilersuisimaneq pillugu qallunaat-kalaallit arlaannaannulluunniit atanngitsumik qulaajaanerinut atanngitsumik tassunga immikkut ilisimasaqarlutik suleqatigiit pilersinneqarput.
• Immikkut ilisimasallit suliaqarnerminni qeqqanut killinnermut nalunaarusiaq 2025-mi maajimi tunniuppaat. Immikkut ilisimasallit noqqaassuteqarnerisigut, nalunaarusiap inaarutaasup tunniunneqarnissaa 2026-mi januaarip 31-anut kinguartinneqarpoq.
• Immikkut ilisimasalinni ilaasortani sisamaasuni marluk 2025-mi decembarimi, 2026-milu januaarimi aalajangerput, suliatigut aaqqiagiinngissuteqarneq kiisalu tunuliaqutigalugit tunuarniarlutik. Taamaakkaluartoq immikkut ilisimasallit tunuarnikut namminneerlutik nalunaarusiaqarput, Naalakkersuisunut tunniussaminnik.
• Immikkut ilisimasallit misissuinerinit nalunaarusiat taakku marluk Naalakkersuisup Naartunaveersaasersuisimanermut suliamut akisussaasup piffissaagallartillugu 2026-mi januaarimi tiguai.
• Kingorna nalunaarusiat ilisimatuunit marlunnit suleqatigiinnut atanngitsunit pitsaassutsikkut nalilerneqarput, taakkulu nalunaarusiat pillugit pitsaassutsimik naliliinerminnik immikkut tunniussillutik. Nalunaarusiat pitsaassutsikkut qulakkeerumallugit pitsaassutsikkut naliliiffigineqassasut aalajangerneqarpoq.
• Pitsaassutsikkut naliliineq professor emeritasinit marluusunit, nalunaarusianik taakkunannga marluusunik, kinaassutsimillu isertuussiviusunik suleqatigiinnut atanngitsunit ingerlanneqarpoq. Professor emeritas taaguutaavoq, Professorimut soraarninngorsimasumut imaluunniit piffissaq tamakkerlugu atorfimmit ikaarsaartumut tunniunneqartartoq. Suliatigut piffissami sivisuumi tapersiisimaneq akuersaarlugu taaguut pingaartumik ataqqinaatitut tunniunneqartarpoq, aamma imaanngilaq tamakkiisumik atorfinitsisoqartoq imaluunniit akissarsisitsisoqartoq, kisiannili ilisimatusarfimmut suli atalersitsisinnaalluni.
• Kingorna pitsaassutsimik naliliinerit immikkut ilisimasallit tiguaat, kingornalu pisariaqartutut nalilertillugu namminneq nalunaarusiami imarisaat iluarsiissuteqarfigisimallugit. Nalunaarusiat tamanut saqqummiunneqartut immikkut ilisimasallit iluarsiissutaannik ilaqarput.
• Nalunaarusiat Naalakkersuisut nittartagaanni kalaallisut, qallunaatut, tuluttullu tamanut saqqummiunneqassapput.

Katersortitsineq KNR TV-kkut toqqaannartumik aallakaatinneqassaaq.


Oqaloqateqarnissannik pisariaqartitsivit?
Oqaloqateqarnissat pisariaqartikkukku Inulerivik attavigisinnaavat.
Tarnip pissusaanik immikkut ilisimasallit akeqanngitsumik kinaassuserlu isertuullugu oqaloqatigineqarsinnaapput piffissani ukunani:

Marlunngornerit nal. 10.00-12.00

Sisamanngornerit nal. 13.00-15.00

Oqarasuaat: 801190

Utaqqisinnaanngitsumik oqaloqateqarnissat pisariaqartikkukku, taava Tusaannga attavigisinnaavat.

Tusaannga ulloq unnuarlu ammasarpoq, kinaassuseq isertuunneqarsinnaavoq, akeqaranilu.

Oqarasuaat: 801180
SMS: 1899

Periarfissaq immikkoortoq Danmark-imi najugalinnut atuuttoq
Danmark-imi najugaqaruit oqaluussaqarnerlu pisariaqartikkukku, weekend-imi maanna Tusaannga attavigisinnaavat SMS-erlutit +299 1899-imut.

Sianerfigitissinnaaniassagavit, naartunaveersaatersornermut tunnganera aammalu telefon-normut allannissaa pisariaqartipparput.

Periarfissaq weekend una kisimi atuuppoq.

Attavissaq
Sukumiisumik paasisaqarusukkuit naalakkersuisup allattaa Paarna Deemand Christiansen e-mailikkut padc@nanoq.gl imaluunniit oqarasuaatikkut: +299 24 79 51 attavigiuk.